Te Tamnei ae Raoiroi e Karaunano, Kairiko, ao e Kakoaua

Ana bwaintangira te Tamnei ae Raoiroi bon teuana te kabanea ni korakora ni kakabwaia ae ti kona ni karekea n te maiu aei, ibukina bwa te Tamnei ae Raoiroi e karaunano, e kairiko, e kauringiira, e kaitiakiira, ao e kairiira. E kona ni kanoaira “ma te kantaninga ao te tangira ae kororaoi” (Moronai 8:26). E reirei “koauan bwaai ni kabane” (Moronai 10:5). Ti karekea te kaotioti ao bwaintangira n te tamnei mairoun te Atua rinanon te Tamnei ae Raoiroi. Ae kakawaki riki, ti karekei ara kakoaua iroun te Tama are i Karawa ao Iesu Kristo rinanon te Tamnei ae Raoiroi.

Imwain ae ko bwabetitoaki, ko kona n namakina te Tamnei ae Raoiroi n te tai teuana ma teuana. Ma ti man karekean ana bwaintituaraoi te Tamnei ae Raoiroi imwiin am bwabetito ae ko kona n namakina iai kakukurein ana iraorao te Tamnei ae Raoiroi, ni karikiko bwa ko a tau. Te bwaintangira aei e karaoaki irouia ake iai irouia te Nakoanibonga ae te Merekitereka man te katokabai (taraa Mwakuri 19:6; D&C 33:15). Ni katoa bongin te Tabati imwiina, ko kona ni kaboui am berita n am bwabetito ngkana ko taua te toa ai ngaia are ko kona ni karekea ana kakabwaia te Uea are ko na teimatoa ni karekea Tamneina bwa e na memena iroum (taraa D&C 20:77).

Te Tamnei ae Raoiroi, n tainako ao e nanonaki bwa te Tamnei, bon te kateniman n Utu n Atua. E reirei te Burabeti Iotebwa Timiti: Iai rabwatan te Tama n iriko ao n ri kanga ai aron te aomata; te Nati naba, ma te Tamnei ae Raoiroi akea rabwatana n iriko ao riina, ma bon katotongan te Tamnei. Ngke arona bwa e aki kona, ao te Tamnei ae Raoiroi e aki kona n tiku iroura (D&C 130:22).

“Ibukina bwa Tamnein te Uea e aki kona ni maeka n taian tembora aika aki tabu” (Ereman 4:24), ti riai n tau n Ana iraorao. Ti karaoi man, ibuakon bwaai riki tabeua, karekean iango aika tamaroa, te maeka ma te etieti, ao n ukoukoria ni kawakin taian tua.

Imwiin karekean ana bwaintangira te Tamnei ae Raoiroi, ti kona ni karaoi bwaai aika mwaiti ni kaoa mwaakana n rooti maiura:

• Tataro

• Kamatebwai booki aika tabu.

• Kororaoi ngkana ti taua te toa.

• Taromauri n te tembora.

• Mataku n tamnei aika raraoi, kabonganai taetae aika itiaki, ao karekea te iango ae tamaroa.