Titiraki & Kaekaaia
“N na kanga ni kabwarabwara nakon raoraou bwa bukin tera uruakan tuan te itiaki bon te iango ae buakaka?”
Te Tama are i Karawa e tangiriira bwa ti na kukurei ao n tau ibukin Tamneina, ai ngaia are E anganiira ana tua ni buokiira ni kawakina ara iango, taeka, ao mwakuri i nanon tiia aika riai. Te Tua ibukin te itiaki e buoka kawakinan te mwaaka ibukin karikaia ataei i nanon tian te mare. Teuana bukina E tuatua bwa mwaakan karikaia ataei e riai n tii kaotaki i marenan te bu-mwaane ao te bu-aine bon ibukina “ataei a inaomata nakon te bungiaki i nanon te kabaebae n te mare.”1
Ko kona n tibwaua te kaobi man Ibukin Kakorakorakiia te Roronrikirake ma raraom. E anga bukina aika bati bukin tera e tamaroa kawakinan tuan te itiaki: “Ngkana ko itiaki man te wene ni bure, ko katauraoiko ni karaoi ao ni kawakini berita aika tabu n te tembora. Ko katauraoiko ni katea te mareaki ae matoatoa ao ni karokoia ataei i nanon te aonaaba bwa mwakoron te utu ae akea tokina ao n tangiraki. Ko kamanoko man te urubwai man te tamnei ao te namakin aika a roko man te reitaki i marenan te mwaane ao te aine aika tibwauaaki i tinanikun te mare. Ko bon kamanoko naba man aoraki aika kaikoaki. N tiku n itiaki man te wenenibure e buokiko n riki n onimakiniko ao ni kukurei ni koaua ao ni kirikirakea am konabwai ni karaoi babaire aika tamaroa ngkai ao n taai aika a na roko.”2
Te Tembora
Tamara are i Karawa iai bukina ae tabu ibukira ni kabane, ao bukina anne e kona ni kakoroaki bukina n te tembora. Ti riai ni kororaoi n rin te tembora bwa aonga ara utu ni kabaeaki n aki toki. Ti na maeka ma Tamara are i Karawa riki, ao te kabanea ni kakaawaki ti na karekea te kimareirei ae akea tokina, are a aki kona ni karekea naake a aki kororaoi.
Alofa M., ririki 18, Samoa
Mare ao te Utu
Ti kaungaaki bwa ti na itiaki man te wenenibure bwa ti aonga ni kororaoi n rinnako n te tembora ao ni kawakin berita aika tabu. Ngkana ti iira tuan te itiaki, ti na kona ni karika te mare ao te utu ae matoatoa n taai aika a na roko. Tatan e bon tauraoi ikekei n taainako ni kaririira, ma n rinanon te tataro, booki aika tabo, rao aika tamaroa, ti kona n tokanikai i aona.
Resty M., ririki 16, Philippines
Mwiina aika Buakaka
A bati mwiina aika buakaka n uruakan tuan te itiaki, ma tiaki ni kabane ake ko reiakin n te kiraati n tuan te mauri. Uruakan tuan te itiaki e kona ni kanakoa te Tamnei man maium, kaikoakiia ake ko kaan ma ngaia, ao ni karikiko bwa kona namakiniko bwa ko bon buakaka. I tuangko bwa kona mataku n ana Rongorongo te Moomon n te witeo ae arana “Chastity: What Are the Limits?” [n teyouth.lds.org n te taetae n Imatang, Botukare, ao Tibein].
Matthew T., ririki 17, Utah, USA
Itiaki ao Karinerine
Man iirakin tuan te itiaki, ti teimatoa n itiaki i matan te Atua, ti karineira, ao ni buokiia tabeman ni karineira naba. Ngkana ti ongotaeka nakon tuan te itiaki, ti kaotia bwa ngaira natin te Atua ao bwa ti taui aroaro aika a rietata. Ti na totokoi raraoma. Ngkana ti ongotaeka iroun Tamara are i Karawa, ai moarara riki nakon te tua aio, maiura e na kakukurei riki i aon te aba ao i nanon te aonaaba ae e na roko.
Alyana G., ririki 19, Philippines
Te Bwaintangira ae Tabu
Ngkana te bwaintangira ni karikan te ataei e iangoaki bwa e aki kakaawaki, te bwaintangira ae kakaawaki aio mai iroun te Atua e na karaoaki bwa te bwai ae taneiai te aba. Te anganako te bwaintangira e aki namakinaki bwa te kaniwanga ngkana te aomata are ko anganna e aki iangoia bwa e onoti. Temanna e riai n taainako n taraa karikan te ataei bwa e tabu; bwa ngaira ana tembora te Atua ni kabane ao n riai n tiku n itiaki ao ni kororaoi n aron te tembora.
Jaron Z., ririki 15, Idaho, USA
Te Tamnei ma Ngaira
Ngkana ko tiku n itiaki man te bure, kona rangi ni kukurei riki ao kona kakabwaiaaki. Rabwataraa ai aron tembora, ao te Tama are i Karawa “e aki mena n tembora aika a barekareka” (Aramwa 7:21). Ai ngaia are ngkana ti tiku n itiaki man te bure, te Tamnei e kona ni maeka ma ngaira.
Maryann P., ririki 14, Arkansas, USA
Titiraki aika a Kakaawaki
Kaekai aia titiraki raraom man titirakinaia tabeua titiraki: “Terana ngkana buum nakon taai aika na roko e taraataraaiko ngkai?” Ni kabane aomata ake I a tia n ongo taekaia ake a tia n urua tuan te itiaki a tia n raraoma iai. “Terana ngkana natim n taai aika a na roko e titirakiniko ngkana ko a tia n urua tuan te itiaki?” Raoraom e kainnanoia n reiakinna bwa kakaawakira tuan te itiaki ngkai, i mwaain te nati te mwaane ke te nati te aine e titiraki te titiraki anne. Ko kainnanoia bwa kona kawakiniko n itiaki ao ni kororaoi ni kaira te maiu ae kukurei, ao ni marurung n akea namakinan te kairua man uruakan te tua ae tabu.
Robyn K., ririki 13, Utah, USA
Tamaroa ao Itiaki
Te Uea e kukurei n te tamaroa ao te itiaki, ao bwaai ni kabane a riai n riki n taina ae riai. Te tua ibukin te itiaki bon te tua mai iroun te Uea. Te tataro ao ana iraorao te Tamnei bon te bootaki ae kororaoi n ataia bwa rikim n itiaki bon te kakabwaia.
Selene R., ririki 18, Nicaragua
I nanon te Mare
N na kabwarabwara nakoia raraou bwa uruakan tuan te itiaki bon te iango ae buakaka ibukina te mwaaka ibukin karikan te ataei e karaoaki tii ibukiia taanga aika mareaki n te tua. Ngkana ti urua tuan te itiaki, ti kabua te Tamnei ae Raoiroi i nanon maiura.
Augustina A., ririki 15, Ghana