Kunea te Kimwareirei n te Maiu

N te taina I wareka ana taeka Unimwaane Richard G. Scott man te Kooram n Abotoro are te Tengaun ma Uoman n te maungatabu ni kabuta. E ngae ngke I a tia n ongo ao ni wareka te taeka aio mai i mwaaina, teuana te kibu ae e katika nanou ao n tiku n au iango.

Tabeua te aoa i mwiina natiu te mwaane, ae e maeka n te abwatimente ma raoraona, a roko ni kawarai. E a tia ni karaoa ana mwakuri ni mitinare ae bwanin ana tai ao e a tia n reirei tabeua te tiemetita n te kaoreti. E aki koaua bwa terana ae e riai ni kamatebwaia n te reirei ao te mwakuri raa ae e na riai ni karaoia. Ibukina e a tia ni bwarananona ao n namakinna bwa te reirei, n te tai aio, e bon kabane tai ao ni kabane mwane, e a katuka moa ana kamatebwai ao ni moana ana mwakuri ae bwanin.

E tuangai bwa temanna mai buakoia raoraona e taekinna bwa na nako n te abamakoro teuana n te Bahamas ke te Caribbean, karekei aia mwakuri, ao ni kakukureiia i nanon tabeua te namwakaina. Natiu te mwaane e bon kukurei ibukin te iango arei. I kona n oota raoi bwa e kangaraa ni karirii te aekaki n atatai ae akea te raraoma iai nakon te kairake n ataeinimwaane.

N te tai anne, ana rongorongo Unimwaane Scott are e katekenano e roko n au iango. I anaa te Ensign ao ni wareka are imwina nakon natiu te mwaane: “Ko mena ikai i aon te aonaaba bwa iai bukina ae tabu. Tiaki n ae e na akea tokin te kakukureiaki ke te teimatoa ni kabwanina kakaean te kukurei. Ko mena ikai bwa kona kataaki, bwa ko na kakoaua bwa ko kona ni karekei riki rakan kakabwaia ake e a tia ni katauraoi te Atua ibukim. Uaan te tataona kinnano e bon rangin kainnanoaki” (“Finding Joy in Life,” Ensign, Meei 1996, 25).

N aki taekina te bwai teuana, natiu te mwaane e anaa te maekatiin, e nako, ao ni warekia ni kabwanina te rongorongo. I mwiin ni kabane are e taekinna bwa e na aki manga nakon te abamakoro.

Imwiina ao e rin n te reirei ni bureitiman, te kawai are e a kairia ni kaitiboaa iai ma buuna nakon taai aika a na roko. A mareaki i nanon te Mesa Arizona Tembora ao n te bong aei a karikirakeia teniman ataei aika tikiraoi. I nanon 2010 natiu te mwaane e a kabanea ana tikurii ae te batiera(bachelor) ao e bon koaua bwa e “kunea te kimareirei i nanon te maiu.”

Ana iango natiu te mwaane ni kan mwananga e na kona n ae te taneiai ae tamaroa; ma e kona naba ni kamamate nakon te tamnei. Ni katoa te tai are I iangoa te taneiai aio, te Tamnei e riinga nanou.

I kakaitau ibukin aia taeka burabeti ao anne are I a bon wirikirikiaki bwa N na uringa te taeka are e buokai ni karekea te kairiiri. I kakaitau naba bwa natiu te mwaane e kakauongo nakon ana tia uarongorongo te Uea ao ni kariaia te Tamnei bwa e na mwakuri irouna. I ataia bwa kakabwaia aika bati ao nanoanga a roko ngkana ti kakauongo ao n irii ana reiei te Tia Kamaiu ao Ana toro.