Kamatebwaiakan Taetae n te Maungatabu Ni Bootaki

Inanon ririki aika bati ti a tia ni kukurei ni wareki rongorongo man te maungatabu n te utu, te rongorongo teuana imwin teuana. Ngkana ti a waaki, ti na katobibia te taibora ao ni wareka te barakarabe ni kabaibati temanna imwin temanna. Ma ti kunea bwa ti tii warekia nako ni kabanea, n aki tei n iangoia bwa tera nanon te rongorongo anne.

N te aro bwa ti na karekea ae mwaiti riki man bwaai aika ti wareki, kainabau ao ngai ti kaboa teuana kaobiin te beeba ni maungatabu ibukiia kain te utu n tatabemaniia ao ni baireia bwa mwaitira taetae ae ti kainnanoi ni kamatebwai ni katoa wiiki n te aro bwa ti aonga ni bane ni wareki imwain te maungatabu ni kabuta are imwiina. Tabeua wiiki ti na ti wareka teuana te taetae, ao ni wiiki ake tabeua ti na wareki uoua, ma ni kabane a na bane ni kamatebwai taian taetae ao ni mwaaaken taabo ake a tangiri. Ngkanne ibukin bootakin te utu n te tairiki ti na bane n reireiniira man tiekition ake ti a tia ni mwaaken.

N tainako ara ataei ana iai aia titiraki ake a na kananaua ara maroro, ke kainabau ao Ngai ti titiraki man ara kamatebwai. Ti kukurei n ongora irouia natira aika 13 nakon 19 aia ririki ni kabwarabwarai aia kaeka nakon titiraki aikanne, n tibwaui bwaai ake a tia n reiakin man te tieminari, n te Ekaretia, ke n oin aia kamatebwai. E riki aei bwa te kawai ae tamaroa n ongora ara kakoaua n tatabemanira nako n taai aika mwaiti n te tabo ae moan te kamwengaraoi ao n rau.

N te tai ae waekoa ti kunea bwa ara kamatebwai ni koroboki aika tabu iai te namakin iai ae titebo. Ni boong tabeua ti karaoi rinanon ti tabeua kiibu imwain te tai are e waekoa ni bua man ara maroro iaon kiibu aikanne ao a na kanga ni kamwakuri nakon te bwai ae riki inanon maiura.

Ara moaningabong a onrake ngkai ma maroro, ngarengare, ao n te katiteuanaki imwain ae ti nako nakon kawai aika kakaokoro. Iai ara kakoaua aika korakora n aia reirei ara burabeti ni kamatebwai ao ni bootaki n tataro ni katoabong. A tia ara utu ni bitaki nakon te utu ae ti teuana are ti reiakinna mai iroun ao ni kakorakoraia n tatabemaniia nako. Bwaai aikai ni kabane a riki man tangiran te kabwaia are e na reke man te maungatabu ni kabuta.