Ibukin Kakorakoraia Kairake
Tera te Rao ae Koaua?
Nanon te taeka ae raoraora e a tia ni bitaki n te aonaaba ni boong aikai, n te tai are ngaira ni kabane ti a reitaki rinanon bwaai n reitaki aika boou. N te bong aio ti kona n iangoia bwa iai “raoraora” aika bati. E bon koaua: ti bon kukurei n te konabwai ni kona ni kaongoaki ao ni karekea te atatai bwa terana ae riki i nanon maiuia ara reitaki aika bati n ikotaki naba ma raraora ae ngkai ao ake ngkoa, ao ti kona n tiku n reitaki ibukiia aomata aika ti tuai ni kaitibo ma ngaia n te rabwata, ma ti bon araniia bwa raoraora.
I nanon taian bwai n itoman, te taeka ae “raoraora” e kamanenaaki n taainako ni kabwarabwaraia aomata aika ti kona n reitaki ma ngaiia nakon are aomata ake iai ara reitaki ma ngaia. Iai am konabwai ni kanakoa nakon “raoraora” te rongorongo, ma aio tiaki titebo ma te reitaki ma te aomata i aon temanna ma temanna.
N tabetai tabeaiangara e mena i aon karekean raoraora. Tao ti riai ni katuruturua i aon te riki bwa te rao.
E rawata nanona bwa tera nanon ae te riki bwa te rao. I aki kona ni mwaninga n ana taeka Unimwaane Robert D. Hales man te Kooran n Abotoro are te Tengaun ma Uoman ibukin bwa terana nanona n riki bwa te rao ao mwakana ae korakora i aoia raoraora i nanon maiuira. Ana kabwarabwara e a tia i nanon maiu n te tai ae maan. “Rao bon aomata aika a kabebetea maiuakinan ana euangkerio Iesu Kristo.”1 N nanona aio, n taraakin ana warebea temanna moa bon oin raoi te iraorao ae koaua. Bon taraakin temanna moa i mwaain are boni ngaira. Bon te riki ni kokoaua raoi, te rao ni koaua, ao n itiaki ni kabanea ara mwakuri. Tao bon te taeka ae komitemente are e a buokiira n ataa nanon raoi te taeka ae iraorao.
Ngke natiu te aine, Emi, bon 15 ana ririki, e karaoa ana babaire bwa aekakira raoraona are e na kakaaia. N teuana te ingabong I noora ana kaobi n ana Boki Moomon bwa e uki nakon Alma 48. E a tia ni mwakeni kiibu ake a kabwarabwara Kaben Moronai: “Moronai bon te mwaane ae aintoa ma ni korakora; bon te mwaane ae kororaoi ana atatai. … Eng, ao bon te mwaane ae matoatoa n ana onimaki iroun Kristo” (kiibu 11, 13). I nanon te mwaatin e a tia ni korea, “I tangiria ni maroro ao ni mare ma te mwaane n ai aron Moronai.” Ngke I taraataraa Emi ao aekaia kairake n ataeinimwaane are e iraorao ma ngaia ao i mwiina e maroro ma ngaia ngke e a koro 16 ana ririki, I kona n noria bwa e bon kataia ni karekei anua akanne i bon irouna ao ni buokiia tabeman ni kakoroi bukin tabeia ae natin te Atua mwaane, taan taua te nakoanibonga, ao taama ao taan kairiiri n taai aika a na roko.
Rao ni koaua a rootia naake iai irekerekeia ma ngaia ni “waerake teutana riki [ao] n riki n tamaroa riki teutana.”2 Kam kona n ibuobuoki i marenami, ai moarara riki ni buokiia kairake n ataeinimwaane, ni katauraoi ibukin ao ni karaoi mwakuri ni mitinare aika kakannato. Kam kona n ibuobuoki i marenami n tiku n itiaki ni maium aio. Arom ao am iraorao aika tamaroa e kona n iai ae akea tokina tiaki tii i aon maiuia te koraki ake ko reitaki ma ngaia ma irouia naba roro aika na roko.
Te Tia Kamaiu e weteia Ana reirei bwa Raoraona. E taku.
“Aio au tua, Bwa kam na i tangitangiri, n ai arou ngkai I tangiringkami.
“Akea te tangira iroun te aomata, ae korakora riki nakon ae te anga maiuna i bukiia raona.
“Raou ngkami, ngkana kam karaoi baika I tuangngkami.
“I aki manga atongkami bwa tooro; bwa te toro e aki ata ane e karaoia ana toka: ma I atongkami bwa raou; bwa I kaoti nakoimi bwaai ni kabane ake I ongo iroun Tamau” (Ioane 15:12–15; e kairaki karawawatan te iango).
Ngkana ko maiuakina ao n tibwaua ana euangkerio Iesu Kristo, ko na karokoia aomata nakoim ake a na tangiria n riki bwa raoraom—tiaki tii n te kaontaeki i aon bwaai n itoman ma te aekaki n rao are e kaotia te Tia Kamaiu n Ana taeka ao n Ana katoto. Ngkai ko kataia n riki bwa te rao nakoia tabeman ao ni karika am taura bwa e na otanako, am mwakuri e na kakabwaiai maiuia aika bati ake ko reitaki ma ngaia. I ataia bwa ngkai ko katurua rikim bwa te rao ngkoe nakoia tabeman, n aron are e kabwarabwaraaki irouia burabeti ao katoto i nanon booki aika tabu, ko na kukurei ao ko na riki bwa te tia bitiia ibukin te tamaroa i nanon te aonaaba ao kona karekea n te bongina te berita ae mimitong are e taekinaki i nanon booki aika tabu ni kaineti ma te iraorao ae koaua: “Te berita aio [i nanon booki aika tabu] e tuangiira bwa te reitaki i marenara are e riki n te maiu aio e na riki naba i marenara n te maiu ae na roko ma ngaia [te reitaki anne] e na bootaki ma te mimitong are akea tokina” (D&C 130:2).
Kamatataaki n te korotamnei © iStockphoto.com/Fonikum ao iroun Les Nilsson