O Uiga Paia o Iesu Keriso: E Mama

Ia suesue ma le agaga tatalo lenei savali ma saili ia iloa mea e faasoa atu. O le a mafai faapefea e le malamalama i uiga paia o le Faaola ona faateleina lou faatuatua ia te Ia ma faamanuiaina ai i latou o loo e tausia e ala i le faiaoga asiasi? Mo nisi faamatalaga, alu i le reliefsociety.lds.org.

Faatuatua, Aiga, Toomaga

“Ia tuu le amiomamā e teuteuina ai ou mafaufauga e lē aunoa; ona solo malosi ai lea o lou lototele i luma o le Atua; ma o le a to ifo i luga o lou agaga le mataupu faavae o le perisitua e pei o le sau mai le lagi” (MF&F 121:45).

O le a le mama? Na saunoa Peresitene James E. Faust (1920–2007) faapea: “O le uiga faaleatua lava ia i lona atoaga, e aofia ai itu uma o le amiotonu lea e fesoasoani e fau ai a tatou amio.”¹ Na faaopoopo mai Peresitene Gordon B. Hinckley (1910–2008): “O le alofa i le Atua o le pogai lea o mea mama uma, agalelei uma, malosi uma faaletagata.”²

O le sootaga i le va o tamaitai ma le mama, na saunoa i ai Elder D. Todd Christofferson o le Korama a Aposetolo e Toasefululua: “E aumaia e tamaitai faatasi ma i latou i le lalolagi se uiga auaumama faapitoa, se meaalofa faalelagi lea latou te atamamai ai i le faaosofia o na uiga e pei o le faatuatua, lototele, malamalama i lagona o isi, ma faaleleiga atili o mafutaga ma aganuu. …

“Tuafafine, i au fegalegaleaiga uma lava, o lou sootaga ma le Atua, lou Tama Faalelagi, o le o le punavai o lou malosiaga amiotonu, e tatau ona e faamuamua i taimi uma o lou olaga. Ia manatua o le mana o Iesu na oo mai e ala i le tuuto atu o Lona loto i le finagalo o le Tama. … Ia taumafai ia avea ma le ituaiga soo faapena o le Tama ma le Alo, ma o le a le mafai ai lava ona galo au faatosinaga.”³

Mau Faaopoopo

Salamo 24:3–5; Filipi 4:8; 2 Peteru 1:3–5; Alema 31:5; Mataupu Faavae ma Feagaiga 38:23–24

Ata

Christ surrounded by people, feeling a woman touching His robe. This has an issue of blood, and touches the Lord's robe in order to be healed. This painting is a smaller version of "Thy Faith Hath Made Thee Whole."

Faamatalaga mai le Ua E Ola i Lou Faatuatua, saunia e Walter Rane

Mai Tusitusiga Paia

I lenei vaitaimi, o tamaitai uiga mama, ua tumu i le faatuatua, o loo aapa atu i le Faaola. I le Luka e 8 ua tatou faitau ai i le fafine sa ia te ia le punatoto mo le 12 tausaga na le mafai ona faamaloloina. Sa ia sailia le faamalologa ina ua ia “alu ane i tua [o Keriso], ma pai ane i le tuupao o lona ofu: ona utu loa lea o lona puna toto. … Ua fetalai atu Iesu, Na pa’i mai lava se tasi ia te a’u: aua ua ou iloa ua alu atu le mana⁴ nai ia te a’u.” Ua faapau atu lenei fafine faatuatua i Ona luma, ma faamatala mai “ia te ia i luma o le nuu uma le mea na pai atu o ia ia te ia” ma “faamaloloina loa. Ona fetalai atu lea o ia ia te ia, Lo’u afafine, ina faalototeleina ia oe: ua e ola i lou faatuatua; ina alu ia oe ma le manuia” (tagai Luka 8:43–48; tagai foi 6:17–19).

E ala atu i Lona mama,⁵ ua mafai ai e Keriso ona faamaloloina, faaagavaaina, faamalosia, faamafanafana, ma faafiafiaina pe a tatou filifili ma le lototele ma le faatuatua e aapa atu ia te Ia.