Faifaiva i Tagata
Saunia e Elder Scott D. Whiting
O Le Fitugafulu
O tagata uma o e ua taliaina le valaauga e taitai i le Ekalesia ua tatou taliaina le valaaulia a le Faaola ina ia avea ma tagata faifaiva i tagata.
A o tausia lo matou aiga talavou i Hawaii, ma te faafetai ma lo‘u toalua mo le Au paia ofoofogia na fesoasoani ia i matou. O nei tagata pele o le ekalesia na opoina i matou ma faia i matou e pei lava o so latou aiga. I ni nai taimi e aveina e tamaloloa i le uarota lo‘u atalii laitiiti i ni malaga o faigafaiva i le vasa. O nei faigamalaga e le faaaogaina ai ni vaa ae nai lo o lena, o tomai faafaigafaiva na atiina ae e tagata Hawaii anamua.
O le faaaogaina o se tasi o na metotia, e gaugau ma faatulaga ma le faaeteete e se faifaiva atamai se upega lapotopoto o loo faapipii ai pulu mamafa faataamilo. Ona ia siiina lea ma le faaeteete le upega i se nofoaga i le matafaga papa i luga ae o se vailepa manino. A vaaia loa e ia i‘a o o mai i totonu o le vailepa, i le taimi sa‘o ma le tomai maoae, o le a ia lafo atu le upega, lea o le a fofola atu i lona lautele ma pau ifo i luga o se mamanu lapotopoto tele i luga o le vai o i lalo, e vave lava ona goto ifo i lalo ma maumau ai i’a na faapotopoto iina.
A o avea le tomai o sea ituaiga faifaiva o se mea e faagaeetia loto, o ia le tagata muamua o le a ta‘u atua ia te oe, a aunoa ma se upega lelei o loo mama, fonofonoina, ma ua toe faaleleia atoatoa, o ana taumafaiga o le a le aoga. E iloa e faifaiva popoto masani o lo latou faamanuiaina e faalagolago i luga o le atoatoa o a latou upega fagota ma o se faiva lelei, ma faamanuiaina e le amataina sei iloga ua uma ona siakiina upega ma ua lelei atoatoa.
Ua tatou vaaia se malamalama i lenei mataupu faavae i totonu o le uluai Aposetolo, ma nisi o i latou sa faifaiva e ala i le matata eseese. Ua tatou faailoa atu ai i nei alii faifaiva i le uluai mataupu o Mataio, Mareko ma Luka, lea na latou lafoina, suiina, ma fufulu a latou upega, ina ua latou fetaiai muamua i lo latou Matai o le lumanai (tagai i le Mataio 4:18, 21; Mareko 1:16, 19; Luka 5:2). Na fafagaina e nei alii o latou aiga ma aiga o isi e ala i le galulue i aso taitasi e pue i‘a. O a latou faamanuiaga ma o latou aiga e faalagolago i la latou sauniuniga ma le tomai ma le atoatoa o a latou upega.
Ina ua valaaulia e Iesu i latou e “mulimuli mai ia te au, ou te faia oulua ma faifaiva i tagata” “ona la tuua loa lea o la‘ua upega,” “tuua mea uma, ae mulimuli atu ia te ia” (Mataio 4:19, 20; Luka 5:11; tagai foi i le Mareko 1:17–18).
Sa ou mafaufau i le faataitaiga lenei i le tele o taimi a o ou mafaufau ia i latou o e tutu i le ulu o le Ekalesia ua tali atu ma le faatuatua e tali tutusa i le valaaulia e “mulimuli mai ia te au.” E pei o le Ekalesia anamua, e taitaia Le Ekalesia a Iesu Keriso o le au Paia o Aso e Gata Ai e ala i le perofeta ma aposetolo, o e ua tuua a latou upega ma a latou galuega na faigata le mauaina ma atiina ae ni tomai fou ina ia mafai ona auauna atu ma mulimuli i le Matai.
Taitai i Tagata
O le a le uiga o le avea ma “faifaiva i tagata”? I Ana upu faigofie o le valaaulia o Aposetolo anamua, na faalauiloa mai ai e le Faaola le mea o le a avea ma Ana aoaoga masani ma mamana—aoao atu i faataoto. Sa ia iloa o i latou ua valaauina e mulimuli ia te Ia o le a malamalama, i se tulaga, i Lona uiga o upu “faifaiva i tagata.”
Na aoao mai Peresitene Harold B. Lee (1899–1973), “Ina ia avea ma ‘faifaiva i tagata’ o se isi lava ala o le faapea ‘avea ma taitai i tagata.’ O lea la i le gagana i le taimi nei tatou te faapea atu … : ‘Afai tou te tausi i a’u poloaiga, ou te faia outou ma taitai i tagata.’”1
O se taitai i tagata o se tasi ua valaauina e fesoasoani i isi ia avea ma “soo moni o… Iesu Keriso” (Moronae 7:48). Tusitaulima 2: Taitaiina o le Ekalesia fai mai, “Ina ia faia lenei mea, e taumafai muamua lava taitai ia avea ma soo faamaoni o le Faaola, e ola i aso taitasi ina ia mafai ona latou toe foi atu e nonofo i le afioaga o le Atua. E mafai ona latou fesoasoani i isi e atiina ae ni molimau malolosi ma faalatalata atili atu i le Tama Faalelagi ma Iesu Keriso.”2
O tagata uma o e ua taliaina le valaauga e taitai i le Ekalesia ua taliaina le valaaulia a le Faaola ina ia avea ma faifaiva i tagata.
Upega ma Aufono
Mai le tulaga aupito maualuga o le taitaiga i le Ekalesia i le korama a le Perisitua Arona ma au peresitene o vasega o Tamaitai Talavou, ua faatulagaina taitai i aufono. Ua faatonuina taitai e saunia faaleagaga, auai atoatoa i aufono, auauna atu i isi, aoao atu le talalelei a Iesu Keriso, ma taitai le perisitua ma faalapotopotoga a ausilali o le Ekalesia. E le gata i lea, ia fausia le lotogatasi ma le toafilemu i le Ekalesia, saunia isi e avea ma taitai ma faiaoga, faamatuu atu tiutetauave, ma faamautinoa le tali atu.3
E pei lava ona faaaogaina e Aposetolo anamua lo latou iloa i le fagota e avea ma tagata faifaiva i tagata, e mafai ona tatou faaaogaina mataupu faavae o loo maua i lo latou faaaogaina o upega i aufono a le Ekalesia. E pei o se upega, o nei aufono e faatulagaina ma saunia e faapotopoto mai fanau a le Tama Faalelagi—o tagata taitoatasi o le aufono e pei o se manoa taua ma le autu o le upega. E pei lava ona aoga se upega pe afai ua lelei ona fonofonoina, e faapena foi a tatou aufono e faavaivai pe afai o tagata o le aufono e le o faatulagaina, taulai atu, ma faagaoioia pei ona tatau ai.
E mulimuli taitai o aufono i le faataitaiga a le au faifaiva Aposetolo anamua i le siakiina e le aunoa ma suiina nei “upega.” E faia e taitai o aufono lenei mea i le tuuina atu soo o aoaoga, taitai i fonotaga a aufono, tuuina atu ni manatu faaalia i taimi uma ma le talafeagai i tagata o le aufono, ma ofoina atu le alofa, faamalosiauga, ma le viiga. E leai se mea e suitulaga mo le malosi atoatoa ma le faapotopotoina gafataulimaina o aufono o loo lelei le faatautaia.
O Le Aufono a le Uarota
Atonu o le aufono o loo i ai le avanoa sili e uunaia ai tagata taitoatasi o le Ekalesia o le aufono a le uarota. O alii ma tamaitai i lenei aufono ua valaauina moni lava e avea ma faifaiva i tagata ma le tofiga e taitaia o le galuega o le faaolataga i le uarota, pe a faatonuina ai e le epikopo. Latou te nonofo ma auauna atu i a latou lava uarota, lea e mafai ai ona latou iloa ma fegalegaleai ma i latou ua valaauina i latou e taitaia.
“O tagata o le aufono a le uarota e taumafai e fesoasoani i tagata taitoatasi e fausia ni molimau, maua sauniga faaola, tausia feagaiga, ma avea ma soo faapaiaina o Iesu Keriso (tagai i le Moronae 6:4–5). O sui uma o le aufono a le uarota ua i ai se tiutetauave aoao mo le manuia o tagata o le uarota.4
O sui o aufono a le uarota e i ai se matafaioi taua i le faanatinati o le galuega o le faaolataga. Pe afai o le aufono a le uarota e le o galulue e pei ona tatau ai, e faatelegeseina le galuega. E tuuitiitia ai le malosi o le faapotopotoina o le “upega”, ma o taumafaiga a le aufono e maua mai ai ni taunuuga faatapulaa. Ae afai o le aufono a le uarota o loo faatulagaina ma taulai atu i le faamalolosia o tagata taitoatasi ma aiga, e mafai ona ofoofogia taunuuga.
Ou te masani i se uarota na tauivi ma se aufono e le o aoga a le uarota. Sa faigata mo le epikopo le taliaina o le taitaiga o loo maua i le Tusitaulima 2 aua sa lagolelei ona ala ma sa fiafia i lana mamanu tuai. Ina ua mavae le tele o fautuaga ma aoaoga a se peresitene alofa o le siteki, e ui i lea, o le epikopo na faamaluluina lona loto, salamo, ma amata ona gauai e faatulaga le aufono a le uarota e pei ona faatonuina. Sa ia matamata i vitio faaleaoaoga e maua i le LDS.org, sa ia faitau i vaega 4 ma le 5 o le Tusitaulima 2, ma sa ia galue ai i mea sa ia aoaoina.
Sa vave ona taliaina e sui o le aufono a le uarota suiga, ma sa i luga o i latou le agaga o le alofa ma le lotogatasi a o latou taulai atu i le faamalolosia o tagata taitoatasi ma aiga. I fonotaga taitasi, latou te saunoa umi e uiga i le tagata sailiili, tagata fou liliu mai, tagata ua le toaaga, ma tagata o i ai manaoga. Sa amata ona faalatalata atu o latou loto i nei uso ma tuafafine, ma amata ona tutupu mai vavega.
Na lipoti mai e le epikopo toetoe lava i le taimi lena na amata ai nei suiga na faia i le aufono a le uarota, sa amata ona o mai i le lotu tagata sa leiloloa ma le toaaga mai. Na fai mai nei tagata na faafuasei lava ona uunaia e toe foi mai i le Ekalesia. Sa fai mai i latou na maua se uunaiga manino ma le malosi e tatau ona latou toe mafuta faatasi ma le Au Paia. Sa latou iloa o le a alofagia i latou na latou manaomia le lagolago o le a tuuina atu e tagata.
Sa faasoa mai e le epikopo ua ia mautinoa sa faatalitali mai le Tama Faalelagi mo ia e mulimuli i fautuaga na ia mauaina ma faatulaga le aufono a le uarota e pei ona faatonuina ai o ia a o lei mafai ona Ia tuu le manao i totonu o loto ma mafaufau o nei tagata ua le toaaga mai ina ia toe foi mai i gaoioiga i le Ekalesia. Sa iloa e le epikopo, sa ia manaomia ona fatuina se siosiomaga alofa, ma le faafaileleina sa manaomia e nei tagata a o lei toe taitaiina mai i latou e le Agaga. Sa faamanatu mai e ana upu le aafiaga o Peteru le faifaiva:
“Ona maliu ane lea o [Iesu] i le tasi vaa, o le vaa o Simeona, ma faatoga atu ia te ia ia faaitiiti atu le vaa nai le auvai. Ona nofo lea o ia i lalo, ma aoao atu nai le vaa i le motu o tagata.
“Ua uma lana lauga ona fetalai atu lea o ia ia Simeona, Ina tuutuu atu ia i le loloto, ma ia tuu ifo ai a outou upega e maua ai ni ia.
“Ua tali mai Simeona ua faapea mai ia te ia, le Alii e, ua atoa le po ua tigaina ai i matou, e leai ni mea ua maua: a ona o lau fetalaiga ou te tuu ifo ai le upega.
“Ua uma ona latou faia o lea mea, ona latou siomia ai lea o le au ia tele lava” (Luka 5:3–6).
A o tatou faalogo ma mulimuli i le fautuaga na tuuina mai ia i tatou e ala i le perofeta o ona po nei, tagatavaai ma talifaaaliga—o “faifaiva i tagata” moni—ma a o tatou siakiina ma suisuia a tatou upega a o galue ai, o lo tatou malosi e faanatinatiina le galuega o le faaolataga o le a matua faateleina ma o le a avea i tatou ma meafaigaluega i aao o le Tama Faalelagi e faapotopoto Lana fanau.