Pe ua Faatauvaa Tele Lau Meaai?

Ata

illustration of casserole dish with hands clasping in front of it

Ata na tusia e Bradley H. Clark

Mo le lua tausaga, sa ou faiaoga asiasi i se tuaoi ma o se uo e igoa ia Sister Morgan. Sa na o ni nai sefulu tausaga e matua ai ia te au, o lea sa ou aoaoina ai le tele o mea mai ia te ia ma lona olaga a o ia faia foi mai i a‘u savali o faiaoga asiasi.

A o avea au ma ana faiaoga asiasi, na iloa ua maua Sister Morgan i le kanesa. Sa ou maofa i le auala sa ia onosaia ai ona togafitiga faafomai i le lototoa ma toetoe lava o taimi uma e i ai se ataata i ona foliga.

I se tasi taimi o la‘u asiasiga, sa ia ta’ua ai o le aso o le a sosoo ai o le faamanatuga o lana faaipoipoga. Na vave ona oo atu le ma talanoaga i isi mea, ma iu ai le ma asiasiga.

O le aoauli na sosoo ai sa uunaia au e ave le meaai na ou kukaina ia Sister Morgan ma lana tane mo lo laua aso faailogaina. I le taimi muamua na ou le amanaiaina le musumusuga, ona sa ou kukaina se meaai o se aso masani o le vaiaso. E moni lava o lea ituaiga meaai faatauvaa o le a le sa’o mo se aso faailogaina faapitoa faapea.

Ae e lei tuua au e le uunaiga. Sa ou vili i lo‘u toalua i le galuega, ma le faamoemoe o le a ia ioe mai faapea o le manatu o se manatu leaga. Nai lo o lena, na ia faamalosiauina au e valaau atu Sister Morgan ma ta‘u atu i ai o lea ua ou aumaia se aiga o le afiafi.

O lou maasiasi i la‘u meaai faatauvaa ma le mea na ou manatu o se amio faamaualuga ia te au lava ia na taofia au mai le valaau atu i lau uo, ae na le mafai ona ou aveesea le lagona e tatau ona ou faasoa atu i la‘u aiga o le afiafi. O lea na ou tuu ai le meaai i se ipu ma savali atu loa ma le popole i le isi ituala.

A o ou ulu atu i lo la fanua, sa ou maua Uso ma Tuafafine Morgan ua feosofi i le la taavale. Sa ou faailoa atu sa ou aumaia se aiga o le afiafi mo lo la aso faamanatuina ma na ou faamoemoe e le afaina ia i laua.

Sa oo ane se ataata i foliga o Sister Morgan. Na ia faamatala mai ua la faia se faaiuga e faamanatuina lo la aso faailogaina i se faleaiga e vave le kuka i le lotoifale ona o ona togafitiga o le kanesa ua matuai vaivai ai o ia e kuka pe o foi i se isi lava mea. Sa foliga fiafia o ia ua mafai ona nofo i le fale mo le taumafataga o le afiafi.

O se lagona ua faamamaina ma le fiafia na ufitia au a o la taliaina la‘u meaai faatauvaa.

E le sili atu nai lo le lua masina mulimuli ane, faatoa uma lava ona faamaea togafitiga o le kanesa o Sister Morgan, na maliu lona toalua pele, mai se gasegase faafuasei. O le la aso faailogaina i le na o le lua vaiaso na muamua atu o lo la aso mulimuli lena.

Sa ou aoaoina i lena taumafanafana e uiga i le mulimuli i le leo itiiti ma le filemu o le Agaga i le auauna atu i isi. O le auaunaga ua poloaiina ai i tatou—po o le musuia—e tuuina atu e mafai ona lē lagolelei, le talafeagai, po o le faigofie i o tatou mata, ae atonu o le mea tonu lava lea e manaomia. O lenei aafiaga na ou lototoa ai e auauna atu i soo se tulaga e manaomia ai au e le Alii, ma na faateleina ai lo‘u faatuatua e faia “le galuega a agelu” (“Galulue e Pei o ni Uso i Siona,” Viiga, nu. 196).