Ae Faapefea Pe Afai … ? Fesili e uiga i le Auauna Atu i se Misiona

O sauniuniga mo le misiona e tatau ona mautinoa lava e aofia ai le aoaoina e uiga i le talalelei, ae e le faapea e tatau ona e iloa mea uma lava ae e te le‘i alu. Mo se faataitaiga, a o avea ma se alii talavou, o Elder Neil L. Andersen o le Korama a Aposetolo e Toasefululua sa popole e lei saunia o ia e auauna atu i se misiona. Sa ia fai mai, “Ou te manatua na ou tatalo, ‘Le Tama Faalelagi e, e faapefea ona ou faia se misiona ae e matua itiiti se mea ua ou iloa?’ Na ou talitonu i le Ekalesia, ae sa ou lagonaina na matuai le lava lou malamalama faaleagaga. A o ou tatalo, na oo mai se lagona: ‘E te le iloa mea uma, ae ua lava mea ua e iloa!’”¹

O le malamalama o le talalelei o le a oo mai a o e galue ma le faamaoni e aoao i mataupu faavae o le talalelei ma suesue i tusitusiga paia, ma o le a le tuua na o oe. O le a taialaina oe e le Agaga Paia, ma o le a e maua ni soa, taitai o le misiona, ma lou peresitene o le misiona e fesoasoani ia te oe i au taumafaiga. Ia manatua mea na aoao mai e Elder Jeffrey R. Holland o le Korama a Aposetolo e Toasefululua: “O le tele o lou faatuatua po o le maualuga o lou malamalama e le o le mea lea e taua—o lou faamaoni a’ia’i e te faatinoina e tusa ai ma lou faatuatua ma le upumoni ua uma ona e iloa.”²

O le mauaina o se molimau o se vaega taua o le sauniuniga o le misiona. Atonu e te lagonaina faapea o lau molimau e vaivai, ae o le a tupu a o e faia se taumafaiga faamaoni e faatupulaia. Tau lava ia manatua:

• Saili ni taimi toafilemu e suesue ma tatalo ai. E te manaomia le taimi ina ia mafai ona e lagonaina le musumusuga a le Agaga.

• Ola i le talalelei. Tagai i le Ioane 7:17 ina ia iloa ai pe aisea o le a fesoasoani ai lenei mea i lau molimau e tuputupu ae.

• Fausia sina mea itiiti i le taimi. “O la [outou] malaga faaleagaga o se faagasologa o le olaga atoa. Tatou te le iloa mea uma i le amataga po o le aluga foi o le olaga. O lo tatou liua e oo mai i lea laasaga ma lea laasaga.”³

Ia manatua foi o lau molimau atonu e malosi atu nai lo le mea o e manatu i ai. Na faamatala mai e Elder Holland lenei tala: “Na fai mai talu ai nei se alii e 14 tausaga ma sina faalotolotolua, ‘Brother Holland e le mafai lava ona ou fai atu ua ou iloa e moni le Ekalesia, ae ou te talitonu e moni.’ Sa ou matua opoina lena tamaitiiti. Sa ou fai atu ia te ia … o le talitonu o se upu taua, ae o se faatinoga e sili atu ona taua, ma e le tatau ai ona ia faatoese i le ‘na ona talitonu.’ Sa ou fai atu ia te ia na fetalai mai Keriso Lava Ia, ‘Aua tou te matatau, tau lava ina talitonu.’ … Sa ou fai atu i lena tama o le talitonuga i taimi uma lava o le laasaga muamua e agai atu ai i le naunautaiga maumaututu. Ma sa ou tau atu ia te ia lo’u mitamita tele mo ia ona o le faamaoni i lana tauiviga ia iloa e moni le ekalesia.”⁴

Afai e i ai se mea sese i lou olaga, e mafai ona e faaleleia. O lou epikopo po o le peresitene o le paranesi o le a fesoasoani ia te oe ia iloa le mea e tatau ona e faia ina ia e mama ai e ala i le Togiola a Iesu Keriso. Ua saunoa mai Elder Richard G. Scott o le Korama a Aposetolo e Toasefululua, “Ou te uunaia outou ia aua nei e tatalo pe tatau ona e alu; ae ia ole atu i le Alii e taitai oe i soo se mea e alagatatau, e avea ai ma se faifeautalai faamisiona agavaa ma malosi.”⁵

Ua faasoa mai e Repeka S. mai Rusia lona aafiaga: “E ui lava na ou salamo, o le tausalaina ma le tiga na ou mafaufau ai ou te le mafai ona faia se misiona ona o au mea sese sa matuai leaga lava. Ae peitai, o lo‘u epikopo ma le peresitene o le siteki na fesoasoani ia te au e iloa ai le mana faamalolo o le Togiola i lo’u olaga. Ou te matua faafetai lava mo le salamo. O le agavaa e sili ona taua i se misiona. E le mafai ona e aoao atu e ala i le Agaga pe afai e te le agavaa ai (tagai i le MF&F 42:14). E tatau ona i ai se filemu i lou loto e auauna atu ai ma lou loto atoa. Na te faia ai le eseesega tele!”

Ata

Two images. Sister missionaries in Hong Kong. They are walking down a sidewalk. (PWO #12618) A group shot of people at a baptism in Thailand before the baptism. An elder missionary in white standing next to a woman also in white. (PWO #12508)

E faigata ona tuua e pele, ae maise lava o le iloaina o mea o le a ese pe a e toe foi atu—mo au uo, mo lou aiga, ma aemaise lava mo oe. Atonu e te popole e uiga i le auala o le a pulea ai lou aiga mea tau tupe e aunoa ma oe ma le ala o le a latou tali atu ai i lau misiona. Ae o le Alii o le a ia tausia i latou e te alofa i ai ma faamanuia i latou mo lau auaunaga (tagai i le MF&F 100:1). E ui o le a e misia i latou, e manaomia oe e le Alii e fesoasoani i isi aiga ia maua le fiafia o le talalelei. Ia talitonu e finagalo le Tama Faalelagi i le mea e sili ona lelei mo oe ma lou aiga, ma ia manatua, “E talitonu le faatuatua e i ai mea maoae ua teuina mo i tatou taitoatasi e le Atua.”⁶ O loo i ai i le Alii faamanuiaga ofoofogia o loo faatalitali mai mo oe ma lou aiga pe a e maua le faatuatua e agai ai i luma.

E mafai ona foliga mai le tau o se misiona o se osigataulaga tele, ae e silafia e le Alii le mea e finagalo o Ia e te faia. Ua saunoa mai Peresitene Boyd K. Packer, Peresitene o le Korama a Aposetolo e Toasefululua, “ou te tautala atu i lena alii talavou e le iloa pe faapefea ona totogi se misiona. Ou te le iloa foi. Ae ou te iloa le mea lenei: afai e te maua le faatuatua ma naunau o le a e alu, o le a i ai se ala.”⁷

Loran C. mai Egelani sa i ai lenei aafiaga: “Faatoa amata lava au pepa o le misiona ae logo mai au e le faletupe o loo tele lau aitalafu o kata fai faatau. Sa ma faia ma lo‘u epikopo se faatulagaga o se fuafuaga o le paketi pe fia o le a ou totogia i lau aitalafu, o la‘u misiona, o la’u sefuluai, ma isi au tupe faaalu. Sa manaomia ai le tele o le osigataulaga, ma sa ou manatu o le a le mafai ona ou ausia la‘u sini. Ae ui i lea, sa ou totogi la‘u sefuluai ma le faamaoni ma o le Alii na laa mai i totonu. O se meaalofa mai se tagata ese na tuuina mai ia te au le tupe na ou manaomia e totogi uma ai lau aitalafu ma faataunuuina ai la’u sini o le misiona.”

O le manatu i le faaaluina o le aso atoa, i aso uma e talanoa ai i tagata e te le iloa e mafai ona faigata. Na manatua e Sam L. mai Kalefonia, ISA: “Mo se tasi e le fiafia e oo lava i le tali atu i lo‘u faitotoa, o le manatu i le tuitui i le faitotoa a se tagata ese e talanoa i ai e uiga i le talalelei na foliga mai e mamao lava mai le mafaia.

“I se konafesi a le autalavou a le siteki, sa talosagaina i tatou e o atu faatasi ma faifeautalai ma talai atu le talalelei. O faatasi ma ni faifeautalai moni? I tagata moni lava? Sa ou popole, ae ou manatuaina loa se mau: ‘Aua o aʼu le Alii lou Atua o le ua taofi i lou lima taumatau, o le ua fai atu ia te oe, aua e te fefe; o au o le a ou fesoasoani ia te oe’ (Isaia 41:13). Sa ou tatalo mo lena fesoasoani, ma e ui lava sa ou maasiasi lava au ia, sa ou lagonaina le malosi e ala i le Agaga Paia ma na faapena foi ona tuu atu ni kopi se lua o le Tusi a Mamona.”

Ata

Four separate images. Elder missionaries out walking in an alleyway. Shot in the Philippines. (PWO #12508) Missionaries riding in a vehicle. Shot in the Philippines. (PWO #12508) Elder missionaries in Hong Kong. They are walking outdoors. (PWO #12618) Missionaries in Portugal teaching a woman. (PWO #12548)

Atonu e te manatu o le faaaluina o le taimi mo se misiona ae o loo e saunia mo le kolisi po o se matata ua lamatia ai lou lumanai, ae e moni lava e mafai. E finagalo le Alii ia e manuia, ma o le a Ia fesoasoani ia te oe. E leai se mea e te faataulagaina o le a tutusa lona taua e pei o lau auaunaga faafaifeautalai.

E toatele tagata talavou ua faia faaiuga faapena. O William H. mai Ausetalia na tuua se matata faamanuiaina o le lakapi, ma le le iloa pe o le a ia maua se avanoa e taalo ai pe a foi mai i le fale (tagai i le “Malolo mo se Misiona,” Liahona, Iuni 2012, 50–52). O Joseph B. mai Filipaina na savali atu i totonu o le ofisa o le failautusi a le kolisi, saunia e faataulagaina se avanoa mo le olaga atoa mo le a‘oga (tagai i le “Mo se Taulaga Mu,” Liahona, Sete. 2007, 40–42). Pe tupu pe leai le mea na e faamoemoe i ai ina ua maea lau misiona, e leai se avanoa o le a sili atu le taua nai lo lau auaunaga o se faifeautalai.

E finagalo le Tama Faalelagi ia i tatou ina ia fiafia, ma o le a Ia le faatonuina i tatou e faia ni mea o le a le faamanuiaina ma fesoasoani ai ia i tatou. Afai e te faia ma le faamaoni mea ua poloaiina ai oe e le Alii, e tusa lava pe faigata, o le a e iloa o faamanuiaga e oo mai e sili mamao atu lava nai lo soo se mea e ofoina mai e le lalolagi. O le a e salamo lava i le auauna atu i se misiona.