Faavavau ona Fesootai i Lo‘u Aiga

Ina ua vaetamaina au i le tolu o ou tausaga, na faatagaina e lo‘u tina moni e faaaloaia ou matua fou pe afai e ioe mai i laua ia faia ou sauniga pe a atoa lou 12 tausaga. Sa ia mafaufau sa tatau ona lava lou matua e fai ai le filifiliga mo au lava ia, ae sa sili ona faigata le faatalitali.

Ioe, sa faigata ona vaaia le toatele o a‘u uo o papatiso ina ua atoa le valu tausaga, ae o le mea sa sili atu ona faigata o le iloaina sa le mafai ona faamauina au i o’u matua fai ma ou tei matutua e toa lima seia atoa le 12 o o‘u tausaga. Sa ou fefe nei tupu se mea ia te au ma o le a le mafai ona ou faamau atu ia i latou.

A o latalata mai lo‘u aso fanau lona 12, sa amata ona matou fuafuaina lo’u papatisoga ma le faamauina i lo‘u aiga. Sa tuu mai e ou matua ia te au e filifili po o le fea malumalu o le a faamauina ai i matou. Sa ou manatu lava o le Malumalu o San Diego Kalefonia e sili ona matagofie, o lea na ioe ai lo’u aiga atoa e tietie atu i Kalefonia mo le faamauga.

Sa le mafai ona ou faatali e avea ma se aiga e faavavau faatasi ma o‘u matua ma nai ou tei. I le taimi o lou faamauga, sa ou lagonaina le Agaga malosi, e faigata ona faamatalaina i upu. O lea ua iu lava ina faamauina au i lo‘u aiga, ua suia ou lagona o le popole i le mafanafana ma le toafilemu, i le iloaina ua faavavau nei lou fesootai atu ia i latou.