E Mafai na Faavavau Aiga

Ata

O le mana o le perisitua e fusia ai aiga faavavau o se tasi o meaalofa silisili a le Atua. O tagata uma e malamalama i le ata o le faaolataga e moomoo mo lena faamanuiaga tumau. Na o sauniga o faamauga e faatinoina i malumalu faapaiaina o Le Ekalesia a Iesu Keriso o le Au Paia o Aso e Gata Ai ua ofoina mai i ai e le Atua le folafolaga o aiga e mafai ona fusia faatasi faavavau.

Na toefuatai mai ki o le perisitua e mafai ai lenei mea i le lalolagi e le perofeta o Elia ia Iosefa Samita i le Malumalu o Katelani. I na ki o le perisitua ua tuufaasolo mai i se laina e le‘i motusia e ala i perofeta soifua i Le Ekalesia a Iesu Keriso o le Au Paia o Aso e Gata Ai e oo mai i le taimi nei.

O le Faaola i Lana misiona faaletino na fetalai i le mana e faamau ai aiga i nei upu ia Peteru, o Lana Aposetolo taitai, ina ua Ia fetalai, “Ou te avatu foi ki o le malo o le lagi; o se mea foi e te fusifusia i le lalolagi, e fusifusia foi lea i le lagi; o se mea foi e te tala i le lalolagi, e tatalaina foi lea i le lagi.” (Mataio 16:19).

E na o le malo selesitila e mafai ona tatou nonofo ai i ni aiga faavavau. O iina e mafai ona tatou i ai o ni aiga i le afioaga o lo tatou Tama Faalelagi ma le Faaola. Sa faamatalaina e le Perofeta o Iosefa Samita lena aafiaga matagofie i lenei ala i le Mataupu Faavae ma Feagaiga:

“A afio mai le Faaola o le a tatou vaai ia te ia e pei ona i ai o ia. O le a tatou vaai o ia o se tagata e pei o i tatou lava.

“Ma o lea lava mafutaga ua i ai ia te i tatou iinei o le a i ai ia te i tatou iina, ae o le a nao na faatasia ma le mamalu e faavavau, o se mamalu e lē o ia i tatou i le taimi nei” (MF&F 130:1–2).

Na fautua mai lenei mau e faapea e mafai ona tatou taulai atu ma le mautinoa mo se tulaga faatonuina faalelagi i a tatou mafutaga i totonu o o tatou aiga. E mafai ona lava lo tatou popole i tagata o tatou aiga, ola ma e ua maliliu, e faia mea uma tatou te mafaia e ofoina atu ia te i latou sauniga o le perisitua o le a noatia ai i tatou i le lagi.

O le toatele o outou, talavou ma matutua, o loo faia lena mea. Ua outou sue igoa o tuaa o e na lei mauaina sauniga e mafai ai ona faamauina faatasi outou.

Toetoe lava o outou uma e i ai aiga o loo feola e lei faamauina i aiga i le mana o le perisitua. O le toatele e i ai aiga o loo feola ua maua sauniga o le perisitua, ae e leo tausia feagaiga na latou osia ma le Atua. O le Atua o le a faamanuiaina oe ina ia mafai ona e fesoasoani e aapa atu ia i latou uma na o aiga i le faatuatua. Ua i ai ia te oe se folafolaga ua faia e le Alii i Ona soo o e o atu e aumai isi ia te Ia:

“Ma ai se tasi na te talia outou, o iina o le a Ou i ai foi, ona o le a Ou alu muamua atu i o outou luma. O le a ou i ai i lo outou lima taumatau ma lo outou agavale, ma o le a i ai loʼu Agaga i o outou loto, ma siʼo faataamilo outou e aʼuagelu, e sapasapai outou i luga.” (MF&F 84:88).

Mai lo‘u faamalama i le ofisa ou te vaai ai i tamaitai ma alii faaipoipo i aso uma o tapue a latou ata i fugalaau ma vaipuna matagofie. O le tama faaipoipo e masani lava ona siiina i luga lana manamea i ona lima, pe mo na o ni nai laa tautevateva itiiti, a o pueina e le pueata ni ata o le faaipoipoga. O taimi uma lava ou te vaaia ai lena mea, ou te mafaufau i ulugalii ua ou iloa e i ai taimi—o nisi taimi i se taimi puupuu lava faatoa uma la latou aso o le faaipoipoga—ua siiina e le tasi le isi i isi auala ina ua amata ona faigata le olaga. E mafai ona leai ni galuega. E mafai ona fananau mai fanau ma le tele o luitau. E mafai ona oo mai ma‘i. Ma o lea la, o mausa o le faia i isi e pei ona tatou manao e fai mai ia te i tatou—a o sili atu ona faigofie—o le a avea i tatou ma toa ma toa tamaitai i na taimi faigata pe a manaomia le malosi sili atu nai lo le mea tatou te mafaufau tatou te mafaia.

Tatou te nonofo aitalafu i o tatou aiga i le ituaiga sootaga e mafai ona tatou avatu i le afioaga o le Atua. E tatau ona tatou taumafai e aua le faaita atu pe talia foi le ita. E mafai ona tatou filifili e vave faamagalo atu ma le atoatoa. E mafai ona tatou taumafai e saili le fiafia o isi nai lo tatou lava. E mafai ona tatou agalelei i a tatou upu e tautala ai. Ao tatou taumafai e faia nei mea uma, o le a tatou valaaulia le Agaga Paia i o tatou aiga ma o tatou olaga.

O lau faamautinoaga ia te oe e faapea, faatasi ai ma le fesoasoani a le Alii ma loto salamo, o le a mafai ona tatou maua se vaaiga i lenei olaga o le ituaiga olaga tatou te mananao i ai i le faavavau. E alofa le Tama Faalelagi ia te i tatou. E finagalo o ia ia tatou toe foi atu ia te Ia. O le Faaola, e ala i le mana o Lana Togiola, e mafaia ai suiga i o tatou loto e tatau ona tatou faia ina ia mafai ona ulu atu i totonu o malumalu paia, osia feagaiga e mafai ona tatou tausia loa, ma i se taimi o le a ola i ni aiga faavavau i le mamalu selesitila—toe i ai i le aiga.

Ata

Ata pue o le Malumalu o San Diego Kalefonia