O La‘u Fuafuaga o le Musika e Sola Ese Mai Ai
Alixa B., Netherlands
Ata na tusia e Ben Simonsen
A o tietie atu i se malaga faaleaoaoga i le pasi, sa ou saofai i luma o se teineitiiti sa faaauau ona faia ni faamatalaga le mafaufau ma tausuaga na ou le maua ai se lagona lelei. Na tau atu e o‘u faiaoga ma isi tamaiti aoga ia te ia e tuu, ae sa ia faaauau pea. Sa ou le iloa le mea e fai, o lea sa ou filifili ai e toso mai la‘u laau faalogologo MP3 ma faalogologo i nisi o a’u musika e fiafia i ai.
Sa ou kiina i le faatulagaga o pese ma o se tasi o pese muamua na sau o se pese mai le youth.lds.org/music. Sa ou sauni e aluese mai ai ae sa tau mai e se mea o i totonu e tau lava ina ou faalogologo i le musika. Sa ou faalogo atu i musika musuia mo le 20 minute na sosoo ai. O upu na faamalosiau mai ia te au e onosai, ma sa latou faamanatuina mai ia te au o au o se afafine faapelepele o le Tama Faalelagi.
Mulimuli ane i le vaiaso, sa faia se siva a la‘u aoga. E ui lava ina latou faaaogaina vaega mama o pese siva lauiloa, e toatele tagata i la‘u vasega na amata ona feei atu le upu ua aveesea i se tasi o pese faapitoa.
Sa ou toe lagonaina foi le le to‘a lelei. Sa nonofo latalata ane faiaoga ma na foliga mai latou te lei amanaiaina. Sa ou tilotilo ifo i lo‘u tapulima. Sa ou vaai i la‘u taulima mai le konafesi a le autalavou o faapea mai, “ia outou tutu i nofoaga paia, ma aua le masi’i ese (MF&F 87:8).”
Sa ou iloa o le mea o loo ou tu ai e leo se nofoaga paia, o lea na ou tuua ai seia oo ina sau se pese fou.
Ou te iloa o musika e mafai ona aumaia se faatosinaga loloto i o tatou olaga. Ou te iloa o le faalogologo i musika musuia i la‘u laau faalogologo MP3 i le lua aso talu ai na fesoasoani e aumaia ia te au le lototele na ou manaomia e tuua ai le siva. O nei aafiaga na fesoasoani ia te au e latalata atili atu ai i lo‘u Tama Faalelagi.