O Le Laveaiina o le Manulele Laitiiti

Ata

Hummingbird on a color background

Ata na pueina e Kojihirano/iStock/Thinkstock

I le tolauapiga a Tamaitai Talavou i mauga o Kalefonia, sa faatalitali ai teine ma taitai mo le meaai o le afiafi i se fale e foliga i se A. A o matou faatalitali, sa vaaia e nisi o teineiti se mea i lalo o se laulau. O se manulele laitiiti atonu na lele mai i totonu o le fale, ma ua le iloa lona ala i fafo, ma iu lava ina palasi i lalo i le fola. Sa latou fesili mai ia te au e fesoasoani.

Sa foliga mai o le manulele ua lata ona mate, o lona gutu sa afifiina e faamoega o aupogaleveleve ma ona fulu ua taufelefele solo. Sa ou tuuina o ia ma le faaeteete i totonu o se ipu ma aveina atu i fafo. Sa ou faamoemoe o le a toe maua mai e ia lona lava malosi ae o le mea moni lava sa faamoemoeina o ia o le a iu lava ina toe foi atu i le ala o le natura uma. Ae peitai, a o ou faasipa atu le ipu ina ia tuu lemu le manulele laitiiti i luga o le eleele, a o see atu i le afa o le ipu, na mau le uu a le manulele laitiiti i le augutu o le ipu i ona maiuu laitiiti. Na ou uuina i luga le ipu, na nofonofo le manulele i le augutu o le ipu, ma moeiini ona mata. O le a nei la?

O se tasi o taitai, i le vaaia o le manulele, na faasukaina se vai ma aumai ia te au. Muamua, sa ou aveesea faamoega o aupogaleveleve mai le gutu maai pei se nila. E lei minoi le manulele. Ona ou lolō lea o se tamatamailima i le vai faasuka ma tuu atu se mataua i le siui o le gutu umi. Na mou le mataua, e ui lava e lei minoi le manulele. Atonu na see atu le vai i totonu o le gutu umi? Sa ou toe lolō lou tamatamailima ma tuu atu i le gutu umi o le manulele. O le taimi lea o se laulaufaiva laitiiti, e manifinifi atu i lo se lauulu, na etoina le tumutumu o lou tamatamailima.

Mo le 10 i le 15 minute, na inuina ai e le manulele laitiiti le mataua e tasi i le taimi. O le taimi lea, sa faapotopoto mai ai ni nai isi taitai ma siomia au, ma sa ou ofoina atu ia te i latou e taumafai i le fafagaina.

Na faafuasei lava ona pupula mata o le manulele, ma o ona fulu na felavesai solo na vave lava ona tulaga lelei. Ina ua uma ona inu ni nai isi mataua se lua, sa amata ona apata ona apaau, ma faataitai mo sina taimi, ma lele sao loa i luga. Sa ia faatalitali mo sina minute i luga a‘e o i matou, ona mou ese atu lea.

Sa matou tutu ai iina, ua faateia. Ona, e pei lava ona faafuasei le lele ese atu o le manulele, na oo mai ai ni lesona faaleagaga:

• E masani lava, a o tatou aapa atu i e e leo toe toaaga mai, o a tatou taumafaiga e foliga mai e leo faia se eseesega. Ae o le alofa tatou te ofoina atu e see atu i le mavaevae—e pei o le suavai i le gutu umi e leo minoi o le manulele laitiiti—ma tuuina atu meaai faaleagaga ia e i ai se aso e mafai ai ona fua mai ni taunuuga.

• E i ai taimi tatou te le mafai ai ona agai pea i luma i tatou lava; tatou te manaomia se lima fesoasoani alofa, ma agalelei.

• O nisi taimi o le tagata e lavelavea i le faamoega o aupogaleveleve o agasala po o le fai ma vaisu ma e manaomia le fesoasoani a se uo po o se taitai perisitua ma le fesoasoani a le Faaola ina ia saoloto.

• Tatou te manaomia meaai faaleagaga masani ina ia mafai ona tatou tumau, a leo lena tatou te le maua le malosi faaleagaga ma pauu atu i uunaiga leaga.

• Na tumau ai pea le tautau o le manulele laitiiti. E moni lava. O le tautau ai pea i luga o le ipu na faia ai se eseesega uma. E i ai taimi, e tatau ona faigofie lava ona tumau i le faatuatua a o tatou feagai ma luitau tiga ma o nisi taimi e sili ona ogaoga o le olaga.

Fai mai le Feagaiga Fou o le Matai e silafia e oo lava i le pau o le manuiti (tagai i le Mataio 10:29–31). Ua ou iloa nei o loo Ia silafia foi le pau o le manulele laitiiti. Ma o loo silafia e Ia outou.