Filemu i Sauaga
Beka F., Montana, ISA
Ata na tusia e Ben Simonsen
Sa ou faasasao i luga o lo‘u nofoa ina ua ou faalogo i le autu o le failauga na sosoo ai: o le mafuaaga e sese ai le Ekalesia Mamona, ma pe aisea foi ua avea ai Mamona o ni tagata taufaasese inoino i tagata. I le taimi o le lauga, sa ou lagonaina ua mumu ou alafau, ma o le te’i ma le faalataina sa tiga ai lo‘u fatu. E faapefea ona mafai ona filifili e au lava uo, i le iloaina o au o se Au Paia o Aso e Gata ai, e fai ni tautalaga pepelo ma faatiga i luma o la‘u vasega Igilisi atoa?
Ina ua tatagi le logo, sa oo mai ia te au le failauga ma nisi o au uo. Faatasi ai ma le Agaga o loo mu i totonu o au, sa ou fai atu ia te i latou o mea sa fai mai ai e sese ma o le Ekalesia e le inoino i tagata e le talitonu i o tatou talitonuga. O le tali mai, na latou osofaia au i faamatalaga ma tuuaiga sese. Sa ou lagona le tuuatoatasi. Sa ou mafaufau, “E faapefea ona tonu, pe afai o loo ou ola i mea ua ou iloa e moni, ae e tatau ona sauaina au?”
Ina ua ou taunuu i le fale mai le aoga i lena aso, sa ou vaaia se i-meli mai i lo‘u tinamatua. Sa ia ta‘u mai ia te au e sue le Mataio 5:11–14. Faatasi ai ma loimata i ou mata, sa ou faitauina: “Amuia outou pe a latou upuleaga ma faasaua ia te outou, ma latou tuuaiina pepelo outou i mea leaga uma ona o a’u. Ia outou olioli ma fiafia lava: aua o i le lagi lo outou taui e tele: aua na faapea ona latou faasaua i perofeta lea na muamua ia te outou. … O outou o le malamalama o le lalolagi outou. E le mafai ona lilo le aai ua tu i luga o le mauga.”
Sa faatumulia lo‘u loto e le Agaga Paia a o ou faitauina na upu. Ou te iloa o sauaga o le a faamalolosia ai a tatou molimau, ma ou te iloa o faamanuiaga i le lagi o le a matua aoga ai lava le tiga tatou te oo i ai iinei i le lalolagi. Na faia e le Faaola ia mafai ai ona tatou maua le filemu pe a sauaina i tatou ona o le ola ai i Lana talalelei, ma ou te matuai faafetai lava mo lena mea.