Ko e Fakamoʻoni ʻa ʻĒtaní
ʻOku nofo e tokotaha ʻokú ne fai e talanoá ʻi ʻIutā, USA.
Naʻe hangē naʻe ʻi ai e fakamoʻoni ʻa e tokotaha kotoa pē, tukukehe pē ʻa ʻĒtani.
“[Fanongo, fakafanongo.] [ʻE fanafana mai ʻa e Laumālie Māʻoniʻoní.] [Fanongo, fanongo ki he kihiʻi leʻo siʻí”](Childrenʻs Songbook, 106).
Naʻe tangutu ʻa ʻĒtani ʻi he taimi feʻinasiʻaki mo sio ki hono fai ʻe hono kaungāmeʻa lelei taha ko Samú, ʻene fakamoʻoní. Naʻe tangutu ʻi muʻa hono kaungāmeʻa ko Selá ʻo tatali ki hono taimí. Naʻe lea ʻa Samu ʻo kau ki ha ngāue tokoni naʻá ne fai. Naʻá ne pehē naʻe ʻi ai haʻane fakamoʻoni ki he ngāue tokoní. Naʻe fakamoʻoni ʻa Sela fekauʻaki mo e fāmilí. Naʻe fai foki ʻe he faiako ʻa ʻĒtaní ʻene fakamoʻoni. Naʻe lea fekauʻaki mo e ngāue fakatemipalé. Naʻa nau fakamoʻoni kotoa ʻoku moʻoni ʻa e Siasí. Naʻe hangē naʻe ʻi ai e fakamoʻoni ʻa e tokotaha kotoa, tukukehe pē ʻa ʻĒtani.
“Ko e hā ha meʻa ʻoku ʻi ai haʻaku fakamoʻoni ki ai?” Ko e fifili ia ʻa ʻĒtaní.
Naʻe fakakaukau ki he ngaahi taʻu siʻi kuo hilí, ki he taimi naʻe papitaiso ai mo hono ngaahi kaungāmeʻá. Naʻe fai ha lea ʻe heʻene faiako Palaimeli ko Sisitā Kalaitá, ki he Laumālie Māʻoniʻoní.
[Naʻá ne pehē], “ʻOku lava ke ʻoatu ʻe he Laumālie Māʻoniʻoní kiate koe ha ongoʻi māfana ʻi ho lotó. Te ne lava ke tokoni ke ke ʻilo ʻa e meʻa ʻoku moʻoní. Pea ko e founga ia ʻokú ke maʻu ai ha fakamoʻoni ki he meʻa ʻokú ke tui ki aí.”
Naʻe feinga ʻa ʻĒtani ke fai e meʻa ʻoku totonú kae lava ke ne ongoʻi e Laumālie Māʻoniʻoní. Naʻá ne lau e folofolá mo lotu. Ka naʻe ʻikai ke ne teitei ongoʻi ʻa e loto māfana ne fakamatalaʻi ʻe he kakaí. Naʻe ʻuhinga nai ia naʻe ʻikai ke ʻi ai haʻane fakamoʻoni?
Naʻe nofo ʻa e fehuʻi ko ʻení ʻi he fakakaukau ʻa ʻĒtaní ʻi he kotoa ʻo e ʻaho hono hokó. Naʻá ne kei fakakaukau pē ki ai ʻi he taimi naʻá ne heka sikeiti-pooti ai mo Samu he tuku ʻa e akó. Naʻe fifili pe ʻe fēfē haʻane ʻeke ange kia Samu.
Fāifai pē pea fehuʻi ange ʻe ʻĒtani, “ʻEi, Samu, naʻá ke ilifia ʻi he taimi naʻá ke fai ai hoʻo fakamoʻoní ʻaneafí?”
Naʻe hifo leva ʻa Samu mei heʻene papa-sikeití ʻo lue atu ki he musié. Naʻá ne tangutu hifo mo pehē mai, “ʻIkai fuʻu fēfē. Ne u ʻosi vahevahe kimuʻa ʻeku fakamoʻoní ʻi he pō fakafāmilí.”
Naʻe tangutu ʻa ʻĒtani mo [Samu] ʻo hili pē ʻene papa-sikeití ʻi hono fungá. “Ka naʻá ke ʻilo fēfē ʻoku ʻi ai haʻo fakamoʻoni?”
“ʻOi, naʻá ku lotu pea naʻá ku ongoʻi fiemālie ki ai.”
Naʻe kamokamo māmālie pē ʻa ʻĒtani mo vilohi ha foʻi veʻeteka ʻaki hono nimá. Naʻe hangē naʻá ne fie maʻu ke ne ongoʻi pehē foki mo iá.
Naʻe tūʻulutui ʻa ʻĒtani ʻi hono veʻe mohengá, ʻi he pō ko iá, he lolotonga e fakapoʻuli mo lōngonoa ʻa e falé, ke lotu.
Naʻá ne pehē, “Tamai Hēvani, kātaki muʻa ʻo tokoniʻi au ke u maʻu ha fakamoʻoni. Tokoni mai ke u ʻiloʻi ʻoku moʻoni ʻa e Siasí. Ko ha palōfita ʻa Siosefa Sāmita. Pea ʻoku moʻoni ʻa e Tohi ʻa Molomoná.”
Naʻe longo ʻa ʻĒtani ʻi he lolotonga ʻo ʻene lotú. Naʻe fakakaukau ʻi ha kiʻi taimi siʻi. Peá ne fehuʻi pē kiate ia, “Kuó u ʻiloʻi nai ha faʻahinga meʻa?”
Peá ne hoko mai leva ha ongoʻi lōngonoa mo nonga kiate ia. Naʻe ʻikai ko ha ongo māfana ne mālohi fēfē. Ka naʻe ʻiloʻi ʻe ʻĒtani, ko e Laumālie Māʻoniʻoní ia.
Naʻe haʻu ha fakakaukau ki he ʻatamai ʻo ʻĒtani: “ʻOku ou ʻilo ʻoku ou ʻiloʻi.” Pea ʻi heʻene fakakaukau ki aí, naʻá ne fakatokangaʻi kuó ne ʻosi ongoʻi ʻa e loto nonga ko ʻení kimuʻa.
Ko e taimi kotoa pē naʻá ne lau ai e Tohi ʻa Molomoná, naʻe ongo lelei mo tonu. ʻOkú ne ʻiloʻi ʻeni ko e Laumālie Māʻoniʻoní ia ʻi Heʻene fakamoʻoni ange ki aí. Ko e taimi naʻe ʻalu ai ki he lotú pea naʻe ongo lelei mo tonu ke ʻi aí, ko e Laumālie Māʻoniʻoní foki mo ia. Kuó ne ʻosi maʻu pē ha fakamoʻoni!
Naʻe ʻikai fie maʻu ia ke ne ʻilo e meʻa kotoa pē he taimí ni. Ka naʻá ne ʻiloʻi ʻoku moʻoni ʻa e Laumālie Māʻoniʻoní mo lava ke Ne tokoniʻi ia ke kei tanumaki ʻene fakamoʻoní.
Naʻe kamata leva ke toe lotu ʻa ʻĒtani. Ka ʻi he taimi ko ʻení, ke fakamālō pē.