Ko e Lakanga Fakataulaʻeikí: Ko ha Taula Tuʻu Maʻu

Ne u tupu hake ʻi ha ʻātakai lōngonoa ʻi Lōkani, ʻIutā. Naʻe ʻikai haʻaku [ngaahi hohaʻa fakakeisiʻi] kau ki he meʻakaí pe nofoʻangá pe akó. [Kae mahalo] koeʻuhí ko e faingofua ʻa e moʻuí, naʻá ku fie maʻu ha meʻa ke u piki ki ai te ne fokotuʻu maʻu aú.

Kiate au, ko e taula ko iá ko e lakanga fakataulaʻeiki ʻo e ʻOtuá. Naʻá ku ʻi ha tūkunga hāhāmolofia ʻi heʻeku tupu haké. Naʻe ui ʻeku tangataʻeikí ke ne hoko ko e pīsope ʻi heʻeku taʻu tahá, pea naʻe hoko ko ʻeku pīsope ʻi ha taʻu ʻe 19. Naʻe hoko ʻene fakahinohino fakaetamai mo fakalaumālié ko ha tokoni kāfakafa kiate au.

ʻOku ou tui ko e ʻuhinga lahi taha ia naʻá ku nofo ʻamanaki ai ke maʻu ʻa e Lakanga Taulaʻeiki faka-ʻĒloné ʻi hoku taʻu 12. ʻOku ou manatuʻi ʻa e ʻaho makehe naʻá ku ongoʻi ai e ongo nima ʻeku tamaí ʻi hoku ʻulú, ʻi heʻene fakanofo aú. Hili iá, naʻá ku fakalakalaka hake ʻi he ngaahi tuʻunga ʻo e Lakanga Taulaʻeiki Faka-ʻĒloné mo maʻu ha ngaahi uiuiʻi naʻá ku fiefia ʻaupito ai.

Naʻe makehe ʻaupito kiate au hono tufa ʻo e sākalamēnití. ʻOkú te lava ʻo sio ki he tukupā ʻa e kakaí ke talangofua ki he ʻEikí mo tauhi ʻEne ngaahi fekaú, ʻi heʻenau maʻu ʻa e fakataipe ʻo Hono sinó mo e taʻataʻá.

Naʻá ku ʻosi mei he ako māʻolungá ʻi he fakalau atu ʻa e taimí, pea hili pē ha taʻu ʻe taha ʻi he [ʻunivēsití], kuo ui au ke ngāue fakafaifekau. Naʻá ku fiefia ʻi he miniti kotoa pē mo ʻofa ʻi hoku ngaahi hoá. Ko e taha ai naʻe hoko ko ha maʻuʻanga ivi kiate au. Naʻá ku ako ha meʻa lahi meiate ia ʻi heʻema fakahoko homa ngaahi fatongiá.

Koeʻuhí naʻe tau ʻa e fonuá, naʻá ku kau ki he Tautahi ʻa e ʻIunaiteti Siteití ʻi heʻeku foki mai mei heʻeku ngāue fakafaifekaú. Ko e taimi naʻe ʻosi ai ʻa e taú, naʻá ku foki leva ki he ʻunivēsití, mali, pea kamata ha fāmili. Naʻá ku fehikiʻaki ki ha ngaahi feituʻu kehekehe he ʻIunaiteti Siteití ʻi heʻeku ngaahi feʻunuaki fakapalofesinalé, ʻou ako ai ha meʻa lahi ʻi heʻeku ngāue ʻi ha ngaahi fatongia lahi ʻo e lakanga fakataulaʻeikí. Naʻe fāifai peá u tūʻuta ʻi Positoni, Masasūseti, ʻou hoko ai ko ha palesiteni fakasiteiki. Ko e feituʻu ia naʻe ui mei ai au ke hoko ko ha tokoni ki he Toko Hongofulu Mā Uá, pea ki he Kōlomu ʻo e Toko Hongofulu Mā Uá, hili ha māhina ʻe 17 mei ai.

Ko e hā kuó u ako ʻi heʻeku hoko ko ha mēmipa ʻo e Kōlomu ʻo e Toko Hongofulu Mā Uá?

Kuó u ako ʻoku ʻi ai ha fakahinohino, ha fakamaʻunga, mo ha maluʻi ʻi he lakanga fakataulaʻeikí.

Kuo ʻi ai maʻu ai pē ʻa e lakanga fakataulaʻeikí. Naʻe maʻu ʻe ʻĀtama ʻa e lakanga fakataulaʻeikí kimuʻa pea toki haʻu ki māmaní. Ko e taimi naʻe movete ai ʻa e hako ʻo ʻĀtamá mo e lakanga fakataulaʻeikí, naʻe fie maʻu leva ke fokotuʻutuʻu ʻa e founga hono fakaʻaongaʻi ʻo e lakanga fakataulaʻeikí. Naʻe fakahoko ia ʻe he ʻEikí ʻaki hono ui ʻo ʻĒpalahame ke ne tokangaʻi hono fāmili ʻo e kau maʻu lakanga fakataulaʻeikí. Naʻe hokohoko atu ʻa e faʻunga ko ʻení ʻia ʻAisake mo Sēkope, ʻa ē naʻe liliu kimui hono hingoá ko ʻIsilelí.

Hili ha laui senituli mei ai, kuo nofo pōpula ʻa e fānau ʻo ʻIsilelí. Naʻe fekau atu ʻe he ʻEikí ʻa Mōsese ke ne fakatauʻatāinaʻi kinautolu, ka ʻi he taimi naʻá ne fai ai iá, naʻá nau fakahaaʻi ai ʻoku ʻikai ke nau mateuteu ke hoko ko ha kakai ke maʻu e Lakanga Taulaʻeiki Faka-Melekisētekí. Ko ia naʻe tuku ai kinautolu mo e Lakanga Taulaʻeiki faka-ʻĒloné ʻo aʻu ki he kuonga ʻo e Fakamoʻuí.

ʻOku ou mālieʻia ʻi he meʻa ne fuofua fakahoko ʻe he Fakamoʻuí ʻi he taimi naʻe kamata ai ʻEne ngāué. Naʻá Ne fokotuʻu ʻa e Lakanga Taulaʻeiki Faka-Melekisētekí. Naʻá Ne ui ha kau ʻAposetolo ʻe toko hongofulu mā ua pea akoʻi kinautolu ʻi he ngaahi fono mo e fokotuʻutuʻu ʻo e lakanga fakataulaʻeikí. Naʻá Ne ui ʻa Pita ke hoko ko e ʻAposetolo pulé ʻo fokotuʻu ai e laini ʻo e mafaí ʻi Hono Siasí. ʻI he kuonga ko iá pea mo e kuongá ni, ko Sīsū Kalaisi ʻokú Ne fili ʻa ʻEne ʻAposetolo pule ke tokangaʻi ʻa e Siasí, pea ko e Fakamoʻuí pē ʻokú ne tataki ia ʻi hono ngaahi fatongia he lakanga fakataulaʻeikí.

Ko ia, ʻoku ʻi ai ha laine hangatonu ʻo e lakanga fakataulaʻeikí mei hotau ʻEikí mo e Fakamoʻuí ʻo fakafou ʻi he ʻAposetolo pulé ki he toenga ʻo e kau ʻAposetoló pea aʻu atu ki he kau maʻu lakanga fakataulaʻeiki kehe ʻi he Siasí. ʻOku foaki ʻa e ngaahi kī ʻo e mafaí ki he kau ʻAposetoló, pea ka kei ʻi he māmaní ai pē ʻa e ngaahi kī ko iá, ʻe tataki kitautolu ʻe he ʻEikí tonu Pē. ʻOku maluʻi kitautolu ʻe he tataki fakalangi ko ʻení mo fakapapauʻi mai he ʻikai teitei mavahe ʻa e Siasí mei he moʻoní. ʻE kei tuʻu tatau ai pē koeʻuhí he ʻoku ʻikai tataki ia ʻe ha taha fakamāmani. ʻOku tataki ia ʻe he ʻEikí.

Ko e faleʻi maʻongoʻonga taha ʻoku ou maʻu maʻamoutolú kau talavou, ke mou ako ʻa e ngaahi tokāteline ʻo e lakanga fakataulaʻeikí, ʻai ke mahino ʻa e mālohi ʻokú ke maʻu ʻi hono fakaʻaongaʻi ho lakanga fakataulaʻeikí, pea ako e founga te ne lava ai ʻo tāpuakiʻi hoʻomou moʻuí mo e moʻui ʻa e niʻihi kehé.

ʻOku ou palōmesi atu kapau te ke ako ʻa e ngaahi tokāteline ʻo e lakanga fakataulaʻeikí pea fakahoko ho ngaahi fatongia ʻo e lakanga fakataulaʻeikí, ʻe hoko ʻa e lakanga fakataulaʻeikí ko ha taula maʻu te ne paotoloaki hoʻo malu fakalaumālié mo ʻomi ha fiefia lahi kiate koe. Hoko ko ha kōlomu moʻoni ʻo e lakanga fakataulaʻeikí. Ala atu ki ho ngaahi kaungāmeʻá ʻo ʻomai kinautolu ki hoʻomou kōlomú. Fokotuʻu ha feohi fakatokoua ʻi hoʻomou kōlomú ke hoko ko ha makatuʻunga tuʻumaʻu ki hoʻomou moʻuí.