Tatau ai Pē Kapau ʻOkú Ke Mā

ʻĪmisi

shy missionary

Naʻá ku ʻinitaviu ha kau ʻeletā ʻi he lolotonga ʻeku hoko ko e palesiteni fakamisiona foʻou ʻi Palāsilá. Naʻá ku kole ki ha tokotaha ke ne fakamatala mai kau kiate ia.

Naʻá ne pehē, “ʻOku ou fuʻu mā ʻaupito.” Naʻe hohaʻa na kuo fakafeʻātungiaʻi ia heʻene maá ʻo ʻikai malava ke ngāue.

Naʻá ku ʻeke ange, “ʻOkú ke pehē ʻe kei lava pē ʻa e ʻEikí ʻo tokoniʻi koe ke ke hoko ko ha faifekau lelei?”

“ʻOku ou tui ʻe lava ʻa e ʻEikí ʻo fai ha meʻa pē.”

“Pea tuku ā ke Ne tokoni atu. ʻOkú ke pehē te ke lava ʻo fai ia?”

Naʻá ne pehē, “Te u lava.”

Kuo pau ke u tala atu, naʻá ku fakakaukau ʻi heʻene lue atú, “Sai, ʻofa pē ʻe ʻaonga.”

Naʻe fakalau vave atu ʻa e ngaahi uiké, pea ʻikai hano taimi, kuo ōmai ʻa e kau faifekau tatau ke toe ʻinitaviu. ʻI he taimi ko ʻení, ne fakahoko mai ʻe he hoa ʻo e faifekau naʻe maá, “Palesiteni, ʻoku ʻikai ke u ʻilo pe ko e hā e meʻa naʻá ke talaange ki aí, ka naʻe ʻaonga moʻoni. Kuo fakaʻau ʻo lelei ange ʻene talanoa mo e kakaí.” Pea naʻá ku nofo ʻamanaki ai ke toe talanoa mo ia.

Ko e taimi naʻe hū mai ai ki hoku ʻōfisí, naʻe sio pē ki hono vaʻé.

Naʻá ne pehē mai, “ʻOku ou maʻu ha ongoongo lelei.” “ʻOku ou kei mā pē, ka naʻá ku kole ki he ʻEikí ke tokoni mai. Pea ne u fakaava leva hoku ngutú ʻo kamata ke lea. Pea ʻokú ke ʻilo e meʻa naʻe hokó? ʻOku ou fai maʻu pē ia ʻi he taimí ni. ʻOku ʻikai ke u manatuʻi ʻe au e meʻa ʻoku ou lea ʻakí. Ko e meʻa fakaofó he ʻoku saiʻia ai ʻa e kakaí. ʻOku nau ongoʻi ʻa e Laumālié. ʻOku mahino au kiate kinautolu mo e meʻa ʻoku ou talaange kiate kinautolú.”

Naʻá ku fakatumutumu ʻi heʻeku sio ki he liliu ʻi he faifekau ko ʻení, ʻi heʻene falala ki he ʻEikí. Naʻe hoko ko ha meʻangāue maʻongoʻonga ʻi hono ʻomi ʻo e fiefiá ki ha kakai tokolahi.