Ko Ha Faingamālie hono Ua

Naʻá ku pukepuke ʻeku vālingí, ʻi he fuofua taimi naʻá ku fetaulaki ai mo iá.

Naʻe fakaʻefihi ofi mai kiate au, he lolotonga ʻeku hū ki he loki kaí, ʻo tau e kato ʻeku vālingí ʻi hoku vaʻé.

Naʻá ne pehē ʻi heʻene fakaofi maí, “Ko e vālingi.”

Peá u pehē ange, “ʻIo.”

Ne teʻeki ai ke u talanoa mo ha taha faingataʻaʻia fakaesino, pea naʻe ʻikai ke u ʻilo e meʻa ke u lea ʻakí. Naʻe muimui ʻia au ki heʻeku tēpilé ʻo tangutu hoku tafaʻakí, mo tuhu pē ki heʻeku kato vālingí.

Pea toe pehē mai, “Ko e vālingi.”

Naʻá ku fakaava ʻeku kató pea fakaofoofo hono fofongá. Naʻá ne taaʻi mālohi ʻaupito ʻa e ngaahi filó. Naʻe ʻiʻī hoku lotó ʻi he taimi naʻá ku fakakaukau ai ki ha motu ha foʻi filo heʻeku vālingí, peá u tāpuniʻi fakalelei leva ʻa e kató. Naʻe fāʻofua mai kiate au kimuʻa pea toki ʻalú.

Naʻá ku toutou sio maʻu pē ki ai talu ʻeni.

Ko e taimi pē naʻe sio ai kia au, naʻe fāʻofua kiate au ʻo ʻuma ki he tumuʻaki hoku ʻulú.

Naʻá ku feinga maʻu pē ʻi he toenga ʻo ʻeku ʻi he ako māʻolungá ke fakamamaʻo mei ai ʻi he taimi naʻá ku sio ai ʻoku haʻu. Ko e taimi naʻá ne ʻilo ai au pea lōmekina ʻaki au ʻene fāʻofuá mo ʻene ʻumá, naʻá ku kātakiʻi pē ʻi ha kiʻi taimi ʻo feinga ke malimali peá u ʻalu fakavavevave leva ʻo ʻikai foaki ha foʻi lea.

Ne u ngulungulu pē ʻi heʻeku sio ki ai ʻi heʻeku koniseti ʻōkesitulā fakaʻosi ʻi he ako māʻolungá, “Māsiʻi.” Naʻe lue māmālie mai ʻi he hili e konisetí, ki he feituʻu naʻá ku tuʻu ai mo hoku ngaahi kaungāmeʻá, ʻi tuʻa he faiʻanga konisetí.

Naʻe holomui hoku ngaahi kaungāmeʻá ʻi heʻene lue mai kiate au mo ha malimali, pea mafao mai hono nimá ke fāʻofuá.

“Viliami!”

Naʻá ku tafoki ʻo fakatokangaʻi ha fefine ʻoku lele hangatonu mai kiate kimautolu.

Naʻá ne taki hono nimá mo pehē mai, “Kātaki. ʻOku saiʻia ʻaupito ʻa Viliami he vālingí. Naʻá ne kole ke u ʻomai ia ki he koniseti he pōní. Ta ō, ʻofaʻanga.”

Naʻe ʻikai ke u fakatokangaʻi, kae tālunga e momeniti ko iá, naʻe teʻeki ai ke u ʻilo hono hingoá. Naʻá ku fetaulaki mo Viliami ʻi he taʻu ʻe ua kimuʻá ka naʻá ku fakamoleki ha taimi lahi he fakamamaʻo mei ai ʻo ʻikai ai ke u teitei feinga ke ʻiloʻi moʻoni ia. ʻI heʻeku vakai ki he sītuʻa atu ʻa Viliami mo ʻene faʻeé, ne lōmekina au ʻe he maá.

ʻOsi mei ai ha ngaahi taʻu, kuó u ʻosi mali, naʻá ku fāʻeleʻi ha kiʻi tamasiʻi fakaʻofoʻofa naʻe faingataʻaʻia fakaesino, naʻá ma fakahingoa ko Sipenisā. Naʻá ku faʻa fakakaukau maʻu pē kia Viliami ʻi heʻeku sio ki heʻeku kiʻi tamasiʻí, peá u fifili pe ʻe foua ʻe Sipenisā ha ngaahi meʻa tatau. ʻE fakamamaʻo nai e kakaí mei ai he lahi ʻo ʻene faʻa ʻumá pe maʻu ʻo ʻene fāʻofuá? ʻE palopalemaʻia nai hono toʻú hono ngaahi faingataʻaʻia fakaesinó?

Naʻá ku ʻave ʻa Sipenisā ʻi hono māhina faá ki homau falemahaki fakafeituʻú ke sio ki he toketaá. Naʻá u fakatokangaʻi ha hū mai ʻa ha ongomeʻa mei he falemahakí, ʻi heʻeku fakahifo ʻa Sipenisā mei he kaá. Naʻe ʻikai ke u meimei tui, ʻi heʻeku fakatokangaʻi atu ko Viliami mo ʻene faʻeé.

“Viliami!” Naʻá ku kaila atu ʻi he taimi ne mau vāofi ange ai, pea tā vave hoku mafú.

“Mālō e lelei!” Naʻá ne luelue māmālie mai ki he tauʻanga meʻalelé, mo malimali hono fofongá. Naʻe mafao mai hono nimá ʻo puke atu hoku nimá ʻo lulululu fiefia.

“ʻOkú ke fēfē hake?” Ko ʻeku ʻeké atu ia.

Naʻá ne fiefia ʻaupito mo ne pehē mai, “Ko e vālingi.”

Vālingi. Naʻá ne manatuʻi foki mo au. Naʻá ku kata mo tangi ʻi heʻeku pehē atu, “ʻIo, naʻá ku tā ʻa e vālingí.”

ʻI heʻema talanoá, naʻe ʻohake ʻe hoku lotó ha lotu ki he ʻaloʻofa ongongofua ʻa ha Tamai Hēvani ʻofa naʻá Ne ʻafioʻi e lahi ʻeku fakaʻamu ke toe feʻiloaki mo Viliamí. ʻOku ou fakamālō naʻe ʻafio mai ʻa e ʻOtuá kiate au—ko ha faʻē kei siʻi kuo lōmekina ʻi he ngaahi palopalema ʻo e moʻui ʻeku kiʻi tamasiʻí mo hohaʻa ki siʻono kahaʻú—pea ʻomai ha aʻusia naʻá ne fakamanatu mai ʻokú Ne ʻafioʻi kitautolu.