Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻOua Te ke Faná
ʻOku ʻikai fakahā e hingoá
Naʻá ma tangutu mo Popi ʻi heʻema kā polisí, ʻo tatali ki ha fakaʻilonga ʻo ha taha ʻoku lue hifo ʻi he halá. Naʻe kamata ʻema siofí ʻi ha houa ʻe ua kimuʻa, ʻi he hili ʻema fakatokangaʻi e kā naʻe tala ʻi he fakatokanga he letiō ʻa e kau polisí.
Naʻe pehē ʻe he fakatokangá, “ʻOku lolotonga hoko ha kaihaʻa fakamālohi. Ko e ongo tangata ʻe toko ua, fakatou ʻi ai ʻena meʻatau. Naʻe toki fakatokangaʻi kinaua ʻi ha kā lanu moli. ʻOku pehē ʻe he kau fakamoʻoní ʻoku fakatuʻutāmaki ʻa e ongo tangatá mo teu pē ke fana.”
Naʻe toki hoko ha ngaahi kaihaʻa fakamālohi ʻaki ha meʻatau ʻi he feituʻú, ka neongo e fai homau lelei tahá, ʻoku toutou hao pē ʻa e kau kaihaʻá ia. Naʻe mole mei hoku ʻatamaí ʻa e fakakaukau ko iá ʻi he taimi pē naʻá ku sio atu ai ki ha ongomeʻa ʻokú na hū mai mei ha ʻapi ʻi ha hala fakapōpōʻuli ʻo heka ki heʻena kā lanu moli. Naʻá na hangatonu mai ki he feituʻu ne ma ʻi aí.
Naʻá ku lea leva, “Kole atu ha kau polisi tokoni. Naʻe huʻu fakatokelau ʻa e ongo kaihaʻá.”
Naʻe hū hifo homa kau tokoní ʻi muʻa ʻi he kaá, ko ha ongo polisi fakatotolo ʻoku ʻikai ke na teunga, ʻi ha kā lanu kehe, ka ma muimui atu pē mo Popí. Hili e hū atu ʻemau meʻalelé ʻe tolu ki ha hala fakakavakava, naʻe taʻofi fakalavalava fakafokifā homa ongo tokoní ʻi muʻa ʻi he kā lanu molí, ka ma tau atu kimaua ʻi mui, ʻo fakangūsiaʻi ʻa e ongo kaihaʻá. Tuia e kemo kuo tuʻu ʻa e kaá pea tulolo hifo ʻo pulia ʻa e ongo kaihaʻá ia.
“Hū ki tuʻa mei he kaá pea ʻai homo nimá ki homo ʻulú!” Naʻá ku tuʻutuʻuni atu ia ʻi he hili ʻeku hū ki tuʻa mei heʻema kaá. Naʻe ʻikai ke tali mai ʻe ha taha.
Naʻá ku to e tuʻutuʻuni atu mo teuteu ke fana, “Hū ki tuʻa mei he kaá pea ʻai homo nimá ki homo ʻulú. Fai ia he taimí ni!”
Fakafokifā pē kuo mākeke hake ʻa e fakaʻulí ʻo hanga mai kiate au. Naʻá ku lava ʻo sio atu ki ha kiʻi meʻa hangē ha ukameá ʻoku tapa ʻi hono nimá.
Naʻe pehē ʻi hoku akoʻi he polisí mo ʻeku fakakaukau leleí ke u kamosi e meʻafaná ke fakahaofi ʻeku moʻuí. Kae hiliō ʻi he mafatukituki ʻo e momeniti faingataʻa ko ʻení, ʻa ʻeku ongona ha leʻo. Naʻe nonga pē ka naʻe fefeka mo mālohi: “ʻOua te ke faná!”
Naʻá ku fakaongoongo pē ki hano fanaʻi au, ka naʻá ku tatali ke ʻuluaki fana ha taha ʻi he kaá. Ka, naʻe hiki ʻe he fakaʻulí hono ongo nimá, ʻo mavahe hake ʻi hono ʻulú, ha meʻa naʻe hangē ha pekenené, pea tuku hifo hono ongo nimá ki hono fungá.
“Tuʻu maʻu!” Ko au atu ia ʻi heʻeku fakavave atu ki he kaá. “ʻOua te ke ngaue!”
Naʻe hangē ʻa e momeniti ko iá ko ha foʻi faiva he TV—kae ʻoua kuó u toki fakatokangaʻi, ko e ongo fai hia ʻi he loto kaá ko ha ongo kiʻi tamaiki fefine ilifia. Ko e meʻa naʻá ku pehē ko e pekenené, ta ko e fakamaʻu pē ia ʻo e letá.
Ne ma toki ʻilo ai ko e ongo tamaiki fefiné, naʻá na ʻoange ʻa e kaá ki hona ongo kaumeʻa tangatá. Naʻe ʻikai ke na lavelaveʻiloa pe ko e ongo tangata fēfē kinaua.
“Ne u pehē ʻe au ʻe fanaʻi koe, Kali!” Ko hono talamai ia ʻe Popi he hili iá. “Naʻá ku meimei kamata fana au. ʻOku ʻikai ke u ʻilo pe ko e hā naʻe ʻikai ke u fakahoko aí.”
Naʻe toe talamai pē ʻe he ongo polisi fakatotolo ʻi he kā ʻe tahá ʻa e meʻa tatau, neongo naʻe ʻikai ha toe taha ka ko au pē naʻe fanongo ki he leʻó. ʻOku ou ʻilo, ne ngata pē ʻi he mālohi ʻo e langí naʻá ne fakahaofi ʻa e ongo tamaiki fefine ko ʻení mei he maté pea mo ha kau polisi ʻe toko fā mei hano fakahoko ha fehālaaki fakaloloma. Naʻe ʻomi ʻe he aʻusiá ni kiate au ha ʻilo pau ʻe lava heʻetau Tamai Hēvaní pea mo kau mai ke lelei kiate kitautolu.