Kau Tangata Leʻo ʻi he Tauá

Naʻe tuʻu takai ʻa e kau tangata leʻó ʻi ha ʻā pe ʻi ha taua kae lava ke nau asiasi mo fakatokanga kei mamaʻo ʻo ka ʻi ai ha fakatuʻutāmaki. Naʻe fakangāueʻi kinautolu ke nau maluʻi ʻa e ngaahi koló pea pehē foki ki he ngaahi ngoue vainé, ngoué, pe toafa mohukú.

Naʻe faʻa langa ʻa e ngaahi taua ʻi he ngaahi ʻā ʻo e koló ʻi he ngaahi matapā hūʻangá pe ʻi he ngaahi tulikí (vakai, 2 Fakamatala Meʻa Hokohoko 26:9). ʻOku hoko ʻa e ongo matapaá mo e ngaahi tau he tulikí ko ha tuʻunga māʻolunga ke fakatokangaʻi mei ai ʻa e ʻasi mai ʻa e filí mo tekeʻi e ʻoho mai ʻa e filí (vakai, 2 Fakamatala Meʻa Hokohoko 26:15).

Naʻe faʻa langa e ngaahi taua ʻo e kolotaú ʻo tuʻu ʻatā ʻi ha potu māʻolunga pe ngaahi feituʻu mahuʻinga kehe. Naʻa nau faʻa lahi feʻunga ke hoko ko ha hūfangaʻanga fakaʻosi ki he kakai kotoa ʻo e koló ʻi he taimi ʻoku ʻohofi ai kinautolú (vakai, Kau Fakamaau 9:46–52).

Naʻe faʻa langa ʻa e ngaahi taua ʻi he ʻū ngoue vainé, ngoueʻangá, pe toafa mohukú ʻo siʻisiʻi pē ke tokoni ʻi hono maluʻi ʻo e ngoué mo e ngaahi tākanga monumanú mei he kau kaihaʻá mo e fanga monumanú (vakai, 2 Fakamatala Meʻa Hokohoko 26:10; ʻĪsaia 5:2; 27:3). Naʻe faʻa hoko ʻa e konga ki laló ko ha loki ke tuku ai e ngaahi meʻangāué.

ʻAi ke ope atu hoʻo vakaí. Ko e taimi ne ui ai mo fakamafaiʻi ʻe he ʻOtuá ha kau tamaioʻeiki, ʻoku fakamavaheʻi ʻa e kau palōfitá mei māmani, pea nau ofi ange kiate Ia, mo fakaʻatā ke nau mamata ki he ngaahi meʻá ʻi ha vakai fakalangi ange.

ʻO mamata ki he ngaahi meʻa ʻoku ʻikai lava ʻa e toengá ʻo mamata ki ai. “ʻOku lava ʻe he tangata kikité ʻo ʻilo ki he ngaahi meʻa ʻi he kuo hilí, kae ʻunmaʻā foki ʻa e ngaahi meʻa ʻe hokó, pea ʻe fakahā mai ʻiate kinautolu ʻa e ngaahi meʻa kotoa pē, pe ʻe fakahā mai ʻiate kinautolu ʻa e ngaahi meʻa liló, pea eʻa ʻi he māmá ʻa e ngaahi meʻa fufuú, pea ko e ngaahi meʻa ʻoku teʻeki ʻiloʻí, ʻe fakahā ʻiate kinautolu, pea ʻe fakahā foki ʻiate kinautolu ʻa e ngaahi meʻa ʻa ia ʻe ʻikai lava ke ʻiloʻi ʻi ha toe founga kehé” (Mōsaia 8:17).

ʻOku nau tuiaki. ʻOku ʻi ai ha fatongia toputapu ʻo e kau palōfitá ke fakatokanga mai fekauʻaki mo e ngaahi fakatuʻutāmaki ʻoku tuʻunuku maí, pea te nau hokohoko atu ke fai ia neongo e fakakaukau ʻa e kakaí pe māfihunga ʻo e sosaietí.

Fakatokanga mai ʻi ha ngaahi meʻa ʻoku kei mamaʻo. “ʻOku fakahalaki ʻe he palōfitá ʻa e angahalá mo tomuʻa fakahā hono ngaahi nunuʻá. Ko e tokotaha ia ʻokú ne malanga ʻaki ʻa e māʻoniʻoní. ʻI he taimi ʻe niʻihi, ʻoku ala ueʻi fakalaumālie ai ʻa e kau palōfitá ke nau kikiteʻi ʻa e kahaʻú maʻá e lelei ʻa e faʻahinga ʻo e tangatá” (Fakahinohino ki he Ngaahi Folofolá, “Palōfitá,” lds.org/scriptures/gs).

Foaki ha fakaū mo e maluʻanga. ʻI heʻetau fakafanongo ki he ngaahi fakatokanga ʻa e kau palōfitá, te tau lava ai ke maʻu ha malu pea hao mei he ngaahi meʻa fakamamahi ʻoku tau tofanga aí, fakafoʻituitui pe fakalūkufua, kapau ʻoku ʻikai ke tau talangofua.