Dijitol Nomo
4 Lesen we i kam long Taem we Josef Smit i Tekem Buk blong Momon i Kam
Taem hem i gat 24 yia nomo, Josef Smit i bin fesem ol jalenj taem hem i bin stap wok blong mekem ol komanmen blong God oli kamtru. Be hem i bin winim, wetem help blong God, mo yumi tu, yumi save winim.
Olsem ol yang adalt, bae oli save askem yufala blong mekem sam samting we i no posibol blong hapen sapos i no gat help we i kam long God. Semmak, Josef Smit, taem hem i gat 24 yia, i bin fesem ol jalenj mo hem i filim se hem i no naf taem hem i bin stap traem blong mekem wan impoten komanmen i kamtru—we i blong pablisim translesen blong Buk blong Momon. Be wetem help blong God, hem i bin komplitim evri samting we oli bin askem long hem, mo eksampol blong hem i soem, long fulap wei, se yumi save mekem i posibol, olgeta samting ia we i no posibol taem God i stap long saed blong yumi.
-
Yumi no nid blong kam wan top man o woman blong mekem se God i mekem ol merikel tru long yumi. Taem Josef i bin stap rere blong pablisim Buk blong Momon, hem i bin wan yang adalt we hem i no gat fulap mane, o i no gat tumas edukesen—mo hem i no iven gat save ia blong save transletem mo pablisim wan impoten histri olsem. Be yet, hem i gohed wetem fet, mo wetem presen mo paoa blong God blong finisim wok ia we God i bin askem hem blong mekem. Sapos yumi trastem Papa long Heven, Hem i save givim paoa long yumi blong mekem wok blong Hem.
-
Taem God i givim wan wok long yumi, bambae Hem i putum wan rod i stap blong yumi finisim wok. Long Josef, i wok blong printim 5,000 kopi blong wan buk we i gat 590 pej, mo i luk se i no posibol. Be, taem we i kam blong pablisim buk ia, Lod i givim insperesen long Martin Haris blong i garanti long gudfala fam blong hem, mo givim 3,000 dola (we tedei hem i samples 76,000 dola o samples 8 milian vatu) blong helpem Josef blong mekem misin blong hem i kamtru. Olsem we Nifae i tijim: “[Lod] bae i mekem rere wan rod blong olgeta, blong oli save mekem samting ia we hem i talem long olgeta” (1 Nifae 3:7). Papa long Heven i putum ol risos we i nid long han blong Josef blong hem i finisim projek ia. Mo bambae Hem i mekem sem samting wetem yumi.
-
God i givim ol seken janis. Josef Smit i bin mekem ol mistek we i mekem se oli lusum 116 pej blong Buk blong Momon. From ol 116 pej we oli bin lus, Josef i bin lusum tu, paoa ia blong transletem histri ia blong sam taem. Be from se hem i bin jusum blong sakem sin, nao long en, God i bin fogivim hem mo i bin givim wan seken janis long hem blong hem i finisim misin blong hem. Lod i talem: “Be tingbaot, God i gat fulap sore; from hemia, sakem sin from wanem we yu bin mekem we i agensem komanmen we mi bin givim long yu, mo God i jusum yu yet, mo God i singaotem yu bakegen long wok ia” (luk long D&C 3:10). Ol laef blong yumi, bae oli fulap long ol mistek long laef ia, be taem yumi stap sakem sin mo putum hat blong yumi long raet ples, oltaem bambae Lod i givim yumi wan nara janis.
-
Taem yumi stap lukluk i go long glad we Hem i promesem, i save helpem yumi blong gotru long ol jalenj. Nomata evri jalenj we Josef i mas fesem, hem i bin kasem plante blesing mo i bin save long tru glad ia truaot long wok blong hem blong tekem Buk blong Momon i kam. Afta we oli pablisim Buk blong Momon, oli oganaesem Jos, mo papa mo mama blong Josef, tufala i bin baptaes. Long dei ia, Josef i go long bus hemwan, mo i stat blong krae from hem i glad tumas. Sapos yumi gohed tru long ol tes blong yumi wetem hed blong yumi we yumi holem strong i stap antap, mo wetem ful tras long God, bambae yumi tu, i save faenem glad mo pis ia.