Wan Blesing long Hanraeting blong Mama blong Mi
Douglas Hedger
Nevada, YSA
Ol pikja oli kam long Dilleen Marsh
Wan naet, mi bin stap tingting hevi long wanem mesej blong givim long wan wod konfrens we i stap kam. Mi bin stadi long ol skripja truaot long wik, mo nomata we mi bin kasem instraksen mo sam tingting, be yet, mi no gat klia daereksen long wanem Lod i bin wantem mi, olsem stek presiden, blong serem wetem ol memba blong wod.
Mi prea wetem hat blong mi, mi askem blong Spirit i lidim mi, blong i lidim ol tingting blong mi. Afta mi openem ol skripja mo mi stat blong rid bakegen. Maen blong mi, kwiktaem i go kasem ol gol blong wod we bisop mo mi i bin jes stap toktok raon long olgeta. Wan long ol gol ia, i blong yusum Prijim Gospel blong Mi blong serem gospel wetem ol fren mo ol neiba.
Mi bin filim blong yusum Prijim Gospel blong Mi insaed long stadi blong miwan long naet ia. Mi karem wan kopi, mo mi openem long eni pej nomo. Long pej ia, mi bin faenem tufala skripja refrens we oli raetem long han—1 Nifae 8:8–11 mo 1 Nifae 11:21–22. Mi luklukgud, nao mi luksave tufala refrens ia, we hanraeting ia, i hanraeting blong mama blong mi. Swit mama blong mi i bin ded sam yia i pas, tu manis afta long namba 80 yia blong hem. Hem i bin wan eksampol blong strong paoa long tingting mo fasin blong no stap selfis, we oltaem i luk gud saed blong ol pipol. Mo hem i lavem ol skripja.
Mi bin openem ol skripja long ol ves ia blong luk wanem nao i pusum hem blong raetemdaon ol refrens ia. Taem mi stap ridim, maen blong mi i open kwiktaem long mesej we bae mi mas givim. Hem i wan simpol mesej we ol memba blong Jos we oli bin testem ol gudfala frut ia blong gospel, samtaem oli fogetem se i gat plante moa we oli stap lukaotem semfala frut ia. Yumi nid blong go long olgeta, mo talem long olgeta weaples blong faenem frut ia.
Mi tingting i gobak long swit mama blong mi taem mi lukluk long nara haf blong buk ia, Prijim Gospel blong Mi. I no bin gat wan nem, i no gat wan nara not, o eni samting moa we i soem se buk ia i blong hem. Mi sidaon, mi sapraes taem mi tingting long jen blong ol toktok blong Spirit we i lidim mi kasem taem ia. Spirit i konfemem long mi se Hem i bin lidim ol tingting blong mi, i olsem we mi bin stap prea from. Mama blong mi i no bin save nating, se plante yia afta we hem i raetem tufala refrens ia, se bae Lod i yusum blong i ansarem boe blong hem we i bin prea wetem tingting we i stap daon.