Kasem Taem Yumi Mit Bakegen
Sastening Sapot blong Yumi
I kam long wan toktok blong Oktoba 2005 jeneral konfrens.
Blong kasem help long saed blong spirit, i dipen bigwan long hamas tingting mo laef blong yumi i go stret wetem wanem ol profet, sia mo reveleta oli talem.
Mi wantem tokbaot ol tabu ofis blong olgeta prishud lida ia we God i bin “singaotem mo jusum” (luk long D&C 55:1) blong lidim Jos long taem tedei. …
… Ol Brata Lida blong mi [long Kworom blong Olgeta Twelef Aposol], olgeta evriwan, oli ol gud man, ol man blong ona, mo ol man blong tras. Mi save hat blong olgeta. Oli ol wokman blong Lod. Oli wantem wan samting nomo, we hem i blong wok long ol bigfala koling blong olgeta mo bildimap kingdom blong God long wol ia. Ol Brata Lida blong yumi, we oli stap givim seves long tedei mo taem naoia, God i testem olgeta, i traem olgeta, mo oli ol man we oli tru. Hat blong olgeta i klin evriwan, eksperiens blong olgeta i bigwan, maen blong olgeta i kasem samting kwik, mo waes blong olgeta long saed blong spirit i dip, mekem se taem yu stap wetem olgeta, yu harem gud tumas.
… Taem oli bin singaotem mi, oli bin givim advaes long mi se samting we i moa impoten we mi mas mekem, hem i blong, oltaem, stap long sem laen wetem Ol Brata Lida. … Hemia i bin saon olsem wan samting we mi bin wantem mekem wetem ful hat blong mi.
… mi mekem tingting blong mi se blong kasem help long saed blong spirit, i dipen bigwan long hamas mi stap long sem laef wetem Presiden blong Jos, Fas Presidensi, mo Kworom blong Olgeta Twelef Aposol—olgeta evriwan ia we yumi sastenem olsem ol profet, ol sia, mo ol reveleta. Mi no save olsem wanem nao bae yumi ting se yumi save stap fulwan long sem laen wetem Spirit blong Lod sapos yumi no save stap long sem laen wetem Presiden blong Jos mo ol nara profet, sia mo reveleta. …
Kaonsel blong mi i go long ol memba blong Jos, hem i blong sapotem Presiden blong Jos, Fas Presidensi, Kworom blong Olgeta Twelef Aposol, mo ol nara Jeneral Atoriti, wetem evri hat mo sol blong yumi. Sapos yumi mekem, bambae yumi stap long wan sef haba. …
Yumi nidim tu blong sapotem mo sastenem ol lokol lida blong yumi, from se, olgeta tu, God i bin “singaotem mo jusum” olgeta. Evri memba blong Jos ia i save kasem kaonsel we i kam long wan bisop o wan branj presiden, wan stek o misin presiden, mo Presiden blong Jos mo olgeta hem i stap wok wetem olgeta. I no gat wan long ol brata ia we i bin askem koling ia. I no gat wan i stret evriwan. Be yet, oli ol wokman blong Lod, we Hem i singaotem olgeta tru long olgeta we oli gat raet blong kasem insperesen ia. Olgeta we oli singaotem, sastenem, mo setem olgeta apata, oli gat raet blong kasem sastening sapot blong yumi.