Saen Strong long Tsek Ripablik

Sharon Goodrich i putum tugeta, Magasin blong Jos

Mifala ol Praemeri pikinini long Tsek Ripablik. Hemia wei we mifala i stap saen strong long kantri blong mifala.

Wan taem, mi lusum fevret hanglav blong mi. Mi harem nogud tumas. Mama blong mi mo mi i prea, be mitufala i no faenem. Mi traem blong gat fet. Wan wik afta, !smol brata i faenem hanglav blong mi long rod! God i stap ansarem ol prea blong yumi. Mi lavem Hem mo mi save se Hem i stap laef.

Andre W., 9 yia

Long skul, mi gat ol fren we oli no memba blong Jos, be oli respektem ol standet blong mi. Wan taem, mi talem se bae mifala i mas prea, !mo oli bin agri! Mi bin glad tumas.

Ivana A., 11 yia

Ol fren blong mi mo mi, mifala i stap kamdaon long step. Taem mifala i kasem eleveta, mi harem wan defren filing, mekem mi askem ol fren blong mi blong no yusum. Oli disaed blong oli go. Mi wokbaot i go daon long ol step. Taem mi kasem daon, ol frenblong mi oli no bin stap. !Eleveta i fas i stap! Wan longfala taem i pas bifo oli aot. Mi bin hapi se i no bin gat wan nogud samting we i bin hapen. Mi bin filim gud se mi bin folem Tabu Spirit.

Amalie N., 10 yia

Long sanbij, skae i stap blong kam tudak. !Win i blo mo i mekem ol bigfala wef! I gat tanda, laetning, mo aes ren. Evriwan i ron i lukaotem ples blong haed. Strong win ia i no kilim mifala. Taem mifala i go hom, mifala i luk trifala renbo. Mifala i save se God i bin helpem mifala, mo i bin protektem mifala.

Jakub B., 10 yia

Long skul, mi gat wan fren we i no gat wan i wantem mekem fren wetem hem. Ol nara pikinini oli stat blong talem ol nogud samting long hem, we i stap mekem hem i filim se hem i nogud. Mi talem long tija blong mi, mo mi invaetem fren blong mi blong kam plei wetem mi. !I mekem fren blong mi i hapi tumas!

Ludmila V., 8 yia

Mi bin kros wetem mama blong mi from se mi no wantem swim mo go long bed. Long nekis dei, mi harem nogud from nogud joes blong mi. Mama i talem se mitufala i save prea mo askem Papa long Heven blong fogivim mitufala. Mitufala i nildaon mo prea. Mi filim gud moa. Mi bin lanem se yumi save sakem sin, mo from Jisas Kraes, yumi save kasem fogivnes.

Samuel H., 5 yia

Mi talem testemoni blong mi long jos. !I nidim strong paoa long tingting! Stat long tetaem ia, mi bin filim Spirit.

Eliska K., 11 yia

Taem animol blong mi, wan kinipig, i bin sik, mi bin prea from hem. Mi talem tangkyu long Papa long Heven blong stap helpem yumi.

Aneta P., 10 yia