Lav i go long Vanuatu

Long Febwari 2016, Brian King mo waef blong hem mo smol famli blong tufala, i bin travel i go long Vanuatu blong akseptem posisen blong Kodineta blong Seminari mo Institiut blong Jos blong Jisas Kraes blong Ol Lata-dei Sent.

Brian i bin mekem misin blong hem long saed blong Jos long Vanuatu, mo Brian i bin save se bae hem i mas stretem laef blong hem long kalja, kaekae, mo weta blong ples ia, be lav blong hem from kantri ia mo ol pipol blong kantri ia, i pulum hem i gobak—be naoia, wetem wan waef mo ol pikinini.

“Mi bin wantem gobak from se mi lavem Vanuatu mo olgeta sent blong hem,” Brian i talem. “Mi lavem seminari mo institiut program, mo mi bin save se bambae mi save givhan longwe.”

Taem hem i bin stap long Vanuatu, King i mekem plante samting. Antap long wok blong sapotem ol seminari mo ol institiut program long Port Vila, hem i bin travel i go long ol nara aelan, i trenem ol tija, i bildimap ol rilesensip mo i mekem ol studen mo papa mo mama oli wantem mekem gud samting.

Long taem blong hem long Vanuatu, ol program we hem i lukaotem oli kam antap bigwan mo plante gud samting i hapen long ol aelan blong Santo, Ambae, Tanna mo Malekula, nomata se ol risos mo komunikesen i wan bigfala jalenj.

Brian mo famli blong hem i lego Vanuatu long 18 Epril, be lav blong hem from wok ia i tajem bigwan ol studen, famli, fren mo ol memba.

Abaot taem blong hem long Vanuatu, Brian i talem: “Oli ol bes yia blong laef blong mifala; mifala i lavem blong stap long Vanuatu.

Ol memba mo ol fren oli bin kam tugeta bifo famli i aot blong givim ona long olgeta wetem wan kaekae blong kam tugeta. Ol memba oli bin serem ol tangkyu mo ol presen wetem King famli long tetaem ia.