“?Olsem wanem mi save invaetem Spirit i kam insaed long hom blong mi taem ol pipol oli stap faet o stap raorao?”

Taem mi gat wan raorao, mi faenem se blong talem se yu sore, mo blong talem se yu yu rong, iven sapos yu ting o save se yu yu raet, i help blong tekem pis i kambak long rum. Afta, yu kamaot, o yu nomo talem wan samting, yu jenisim topik, o yu faenem wan samting blong agri long hem. I no tekem longtaem blong Spirit i kambak.

Mi faenem se blong soem klin lav i go long famli blong mi, i invaetem Spirit blong stap insaed long hom blong mifala. Profet i tokbaot se lav i strong paoa ia we i save mekem jenis i hapen, mo i pomad ia we i mekem sol i kam oraet bakegen. Wan spirit blong lav i tekem sefti mo pis i kam insaed long hom.

Sapos famli blong yu i no memba blong Jos, talem long olgeta we yu harem nogud taem oli stap raorao mo askem olgeta blong traem kam antap. Sapos hemia i no wok, prea mo traem bakegen. Sapos oli ol memba, mekem olgeta oli tingbaot se oli ol pikinini blong God mo oli no sapos blong raorao.

Taem ol famli we oli stap raon oli stap raorao, hem i had blong filim Spirit i stap, be i no minim se bae yu no filim sapos yu klin inaf. Talem wan prea long hat blong yu blong gat sam moa paoa blong Spirit blong Lod, mo lisin gud moa long ol toktok we Hem i stap sendem i kam. Papa long Heven i save helpem yu blong filim pis mo save olsem wanem i bes wei blong tekem pis ia i kambak insaed long hom blong yu.

Toktok wetem famli blong yu blong stretem problem long wan wei we evriwan i win, o serem wan skripja, o singsing long wan hym. Yumi save askem tu long Papa long Heven blong help blong stretem problem ia. Long wei ia, evriwan bae i stap kwaet, mo bae i save stretem problem we i no nid blong singsingaot, o faet long han. Yes, i tru we Tabu Spirit bae i fulumap yu wetem evri pis mo bae i givim evriwan wan filing blong no wantem faet bakegen.