Dijitol Nomo
Nogud Brekap blong Mi I Kam Bigfala Blesing blong Mi
Samtaem, yumi andastanem ol toktok blong Spirit, mo samtaem, yumi no andastanem. Long eni wei, yumi mas tekem aksen wetem fet.
Mi brekap, o finis wetem fas boefren blong mi, long wan klia sama naet.
Eli long dei ia, Kata (oli jenisim nem) mo mi, i bin raorao—we i wan nomol samting long rilesensip blong mitufala we i bin stap blong tri yia, i go i kam. Mitufala i raorao from evri samting—i stat long wanem blong kakae i go kasem ol fiuja plan. Long stat, mi sakem ol samting ia long saed, mo talem long miwan se “wanem i defren i mekem mitufala i joen wan.” Be ol smolsmol toktok ia oli go kasem we mitufala i no stap agri nomo oltaem.
Long sama naet ia, mitufala i karem teleskop i go long draeples blong lukluk ol planet. Be mitufala i faenem se bigfala munlaet ia we i stap long fored blong tudak ia, i blokem ae blong mitufala. Tingting i fasfas bakegen mo mitufala i stat blong raorao—bakegen.
Mi wokbaot i go blong tingting i kam daon. Mi tingting: “hemia i no mi. Oli bin save mi, se mi wan blong mekem pis long medel blong ol brata mo sista blong mi, mo mi toktok kaen mo kwaet long ol nara fren. So, ?from wanem mi stap singsingaot long boe ia we mi talem se mi lavem hem?
Mi lukluk i go long skae ia we i tudak, mo prea blong save olsem wanem blong mekem rilesensip blong mi wetem Kata i kam gud moa. Wantaem nomo, bigfala pis i tekem ples blong kros blong mi, mo mi filim se samting we i moa gud blong mi mekem, i blong mitufala i finis fren.
Hiling i bin tekem taem. I bin gat ol taem we mi gat temtesen blong sakemaot toktok ia blong Spirit blong finis wetem Kata, from se mi misim rilesensip blong mitufala. Mo samtaem, mi kros smol long God, mi bin stap biliv se Hem i sarem doa long mi mo i no openem wan narawan. Iven olsem, mi hang long kaonsel blong Elda Jeffrey R. Holland blong Kworom blong Olgeta Twelef Aposol … holem strong wanem we yu save finis, mo stanap strong kasem taem yu kasem moa save” (“Lord I Believe,” Liahona, Mei 2013, 93–94).
Mi no bin kasem “moa save” ia blong plante manis, mo mi stat blong askem miwan se bae mi kasem o nogat. Afta we mi bin mekem wan prea wetem hat blong mi abaot brekap ia, Spirit i toktok long hat blong mi, i talem long mi se ol toktok blong Papa long Heven oli long gud blong ol pikinini blong Hem. Ol ditel blong fasin blong Hem blong tingting, oli no semmak olsem fet blong mi long Hem.
Mi save se Papa long Heven i gat wan plan blong mi, mo hemia i bin givim hop long mi from fiuja blong mi, mo hemia i bin helpem mi blong stat go long deit bakegen. Wan moning, mi ridim Doktrin mo Ol Kavenan 88:40, we Lod i stap tijim se “laet i folem laet.” Wantaem, mi luksave se prinsipol ia, mi save yusum tu long deiting. Mi save se bae mi moa hapi wetem wan we i serem ol semfala valiu mo laet olsem mi.
Afta long hemia, mi mitim Austin. Mitufala i go gud wantaem, stat long ol tako we mitufala i laekem i go kasem wanwan misin blong mitufala. Kwaet mo kaen spirit blong hem, mi filim se mi save gud mo i go stret wetem mi, mo long en, mi maredem hem. Wanem mitufala i gat, i no wan bigfala rilesensip olsem we yu save luk long ol popula lav muvi. Hem i swit mo stap gud oltaem—i wan samting we mi biliv se i save stap blong oltaem.
Plante long yumi i wantem wan eksplenesen taem yumi kasem ol strong toktok we i kam long Spirit. Aot long eksperiens blong mi, mi bin lanem se fet long Lod i save helpem yumi blong gohed blong stap obei, nomata yumi no save from wanem. Taem yumi stap trastem wan God we i save evri samting, yumi save filim pis long ol desisen blong yumi blong tekem aksen folem ol toktok ia, kasem taem yumi kasem “moa save” ia we Hem i bin promesem long olgeta we oli fetful.