Stap Leftemap Laef long Marsol Aelan

Ol tul blong mekem eksesaes bae i help blong faet agensem sik suga.

Eli long yia ia, i bin gat wan samting i bin tekem ples long Kanvasbak Gudlaef Senta long Majuro, Marsol Aelan blong selebretem wan taem we LDS Charities i givim sam fitnes tul.

Kanvasbak Misin i bin stat long Gudlaef Senta long Majuro wetem help blong Ministri blong Helt long 2005, hemia blong faet agensem ol plante kes blong sik suga mo ol non-komunikebol sik. Long wan aelan nese we 75% blong ol adalt ova long 50 yia oli gat sik suga, Gudlaef Senta i bin stap wok wetem ol lokol oganaesesen, mo wanwan man mo woman blong kasem ol populesen raon long long Marsol Aelan.

LDS Charities i bin kam patna wetem ol oganaesesen olsem Kanvasbak Misin raon long Pasifik; oganaesesen ia i andastanem stret nid ia blong ol komuniti we oli stap helpem olgeta, mo afta oli help blong developem ol ansa we i stret long ol lokol pipol.

Donesen blong LDS Charities, i tekem ol niufala tredmil wetem hedfon (i wan lektrik masin we man i save ron antap long hem), ol step masin, ol gudfala tul blong leftemap hevi aean, mo ol bigfala balong blong mekem eksesaes blong mekem ol stamba masol oli kam strong moa.

Elda Craig Preston mo waef blong hem, Nancy, we tufala i fultaem misinari, oli ripresentem LDS Charities long handova selebresen.

Ples blong mekem eksesaes i fri long evriwan, mo olgeta sikman blong hospital nao i yusum plante blong mekem tritmen blong bodi i wok gud; ol wokman blong hospital tu oli yusum, wetem ol polis ofisa blong Majuro, mo ol narawan we oli wantem kipim bodi blong olgeta i fit.