O Bulataka Tiko Beka ena Lomalomarua na Kosipeli?

Mai vei Chakell Wardleigh

Mekasini ni Lotu

Na noda ivakarau ni raica na noda itavi ena Lotu eda na duatani kina.

“Meu vakayacora beka?”

Sa bau votu beka mai vei iko ena dua na gauna e liu? Sa dau votu mai noqu vakasama ena vuqa na gauna. Kau sa vulica ni mataqali vakasama sega soti ni vaka e bibi vaqo sa ivakaraitaki bibi ni noqu ivakarau ni rai. E dina, e rawa vei keda kece me da qaravi ira na tani, e rawa ni da ciqoma ka tutaka noda veikacivi ena Lotu, ka rawa ni da lakova na noda soqoni ni Lotu. Kevaka mada ga e caka ena dela ni lomalomarua, e rawa ni vakayaco ka ena noda bula na veika oqo. Ia ena yalana beka nona rawa ni vakayagataki iko na Kalou? Ia ena yalana beka nona rawa ni veisautaki iko na Kalou? Vei au, au vakabauta ni rawa.

Na vakasama oqo e vakavuna noqu vakananumi rau o Leimani kei Lemueli, ka rau a biuti Jerusalemi, erau a lesuva tale na peleti, erau a veivuke ena ta waqa, erau a talairawarawa—ia erau a cakava tu ena dela ni vuturi kei na lomalomarua. Erau a sega ni vakatara me veisautaki rau ki na vinaka na veika erau a sotava. Ia, erau dau vosakudrukudru ka ca nodrau ivakarau ni vakasama ena veituvaki kecega erau sotava. Ni oti noqu kila oqori, au sega sara ga ni vinakata meu dua na Leimani se dua na Lemueli.

Taura e dua na gauna mo vakasamataka kina vakavinaka na vuna o cakava kina e dua na ka. O dau sasaga beka yani vei ira na tani ni o vakanamata tiko ki na kena veivakalougatataki e waraki iko tu? Se o dau sasaga yani vei ira na tani baleta ni o vinakata dina mo wasea vei ira na rarama kei na loloma? Se o cakava tiko beka na veika kece e gadrevi ena nomu veikacivi baleta oqori na ka e namaki vei iko? Se o cakava baleta ni o vinakata mo qarava na Turaga kei ira era wavoliti iko?

Oqo na ka au dau tovolea meu tarogi au kina ena veigauna. Au sa cakava tiko beka na veika kece au rawata meu bula vaka e dua na tisaipeli i Karisito ena kena inaki dina? Se sega tiko beka ni yaloqu dina sara? Au vakabauta ni sa tukuna vakavinaka sara o Bisopi Gérald Caussé, na Bisopi Vakatulewa: “Eda bulabula tiko beka vakosipeli, se da osooso tikoga ena Lotu?” (“Raica na Tamata,” Liaona, Me 2018, 112).

Bulabula kei na Osooso

Vei au, niu “osooso” tikoga ena Lotu, sa dau siri lo ki noqu vakasama na sega ni kauwai. Na sega ni kauwai oqo e rawa ni vu mai na vakawelewele se noda vakatara beka me vakasugusugu eso na cakacaka sega soti ni bibi ena noda ituvatuva ena veika e bibi cake. Na sega ni kauwai oqo e dau siri lo niu dabe tiko ena soqoni ni sakaramede ka sega ni vakarorogo tiko, ena noqu cabora tiko noqu masu ena bogi ka tekivu me gole noqu vakasama ki na veika tale eso, noqu cereka vakatotolo ga noqu ivolanikalou ka sega ni vakananuma titobu, se ena noqu sasaga yani vua e dua me rawa ga na isaunitaro ka sega ena yalo ni veitokani dina.

Ena so na gauna au dau rarawa sara ga niu sega ni raica e dua na toso ena noqu bula—niu raica vakatani na veika e yaco qai “osooso” ena kosipeli—ka na dau tiko voli ga na ivakarau ni yalo oqo me yacova niu sa kila na vu ni leqa. Ena so na gauna meu na dabe, semalesu, ka tarogi au, “Au sa solia tiko beka ena veikacivi oqo se na tamata oqo se na masu oqo se na ivolanikalou oqo na noqu vakarorogo kei na yaloqu taucoko ena gauna oqo?”

Ena gauna e lutuki au kina eso na mataqali veivakatakilai vakaoqo, oqori na gauna sa yaco dina kina ena noqu bula na veisau. Niu masu vakaidina meu raici ira tale eso ena ivakarau e raici ira kina na Tamada Vakalomalagi, niu masuta na madigi ni veiqaravi, niu masuta na veidusimaki ena noqu veikacivi, ena bula vakacakacaka, kei na noqu bula e veisiga, ka bibi duadua, niu cakava na veika e uqeti au kina o Koya, ni vakavotukanataki na noqu gagadre e loma meu vinaka cake mai na veika au cakava—oya na gauna au sa bulabula kina ena kosipeli. Oya na gauna au vakila dina kina na veisau ena noqu ivakarau ni rai, e utoqu, kei na yaloqu. Oya na gauna au raica kina ni cevai na cakacaka mana. Oya na gauna au vakila kina na marau dina ena noqu bula. Oya na gauna au tovolea dina tiko kina meu veisau meu vinaka cake.

Cakacaka kei na Veika e Vakilai

Au kila ni rawa vei keda kece me da railesuva e vica na gauna ni noda bula ena gauna a vakaturaga kina noda ivalavala, ia na noda vakanananu mai dakuna e sega soti. Ena so na gauna e dau osooso na bula, ena so na gauna eda sega ni dau marau sara ena keda ituvaki, ka so na gauna e dau sega ni vaka na lomada na veika e yaco. E sega ni taucko sara noda bula, ia kevaka eda kerei Tamada Vakalomalagi me vukei keda me da solia na yaloda taucoko ki na veika dau dredre se kana gauna e dau kerei vei keda me da cakava, eda rawa ni vulica me da cakava ena ivakarau e Vakarisito vakalevu cake.

Au rawa ni vakasamataka eso na gauna au dau vakadonuya tu kina ena yalo vuturi meu qarava eso na cakacaka ni veiqaravi, ia qai vakamalumalumutaki na yaloqu ni oti oya. Se ena gauna au kacivi kina ka qai vosakudrukudru ni sa rui levu noqu gauna e kania, ia au qai tagi na gauna a sa vakacegui baleta niu a vulica meu taleitaka.

E rawa ni da wasea na rarama, qarava vinaka noda itavi, ka ciqoma vakavinaka na isau ni noda masu kevaka e tu donu na yaloda. Kevaka eda taura na gauna me da dikeva na ivakarau ni rai kei na inaki ni veika eda cakava ka cakava na veika kece eda rawata “ena yalodina, [kei na] lomamudou taucoko” (Moronai 10:4), ena rawa me da vakadinadinataka vakavinaka cake na veituberi ni Tamada Vakalomalagi, kunea na reki cecere, ka da na vakayacora na veisau levu cake ena noda bula kei na nodra bula na tani.