Bob kei Lori Thurston

iVakatakilakila

senior missionary couple

iVakatakilakila

senior missionary hugging Cambodian woman

iVakatakilakila

senior couple visiting members

iVakatakilakila

senior missionary with Cambodian woman

Ena imatai ni nodrau kaulotu vata, erau vulica o Bob kei Lori Thurston ni veiqaravi vakaibalebale e rawa ni yaco veitalia mada ni tu na veitarovi ni vosa kei na duidui ni itovo vakavanua baleta ni da luvena kece na Kalou.

Les Nilsson, dauveitaba

iVakatakilakila

Sister Thurston hugging grieving girl

Bob:

Ni bera ni keirau vakamau kei Lori, keirau veitalanoataka na veiqaravi vakaulotu ni keirau sa vakacegu. Keirau a veiqaravi ruarua vakaulotu e liu. E a veiqaravi mai Kobe, e Japani o Lori, kau a veiqaravi mai Brisbane, e Ositerelia. Ni keirau qai yaco me vakavakarau me vakacegu, keirau tukuna vei ira na luvei keirau ni keirau via veiqaravi ena levu na buturara ni kaulotu.

Keirau kalougata ni rawa ni vakacegu gone. Ni keirau rogoca ni eso na veiwatini qase era sega ni rawa ni veiqaravi ena so na vanua me vaka na veivanua ena ikatolu ni wase kei vuravura baleta na leqataki ni bula kei na kauwai tale eso, keirau vakananuma, “Keirau se bera mada ga ni 60. Keirau se bulabula tu, vakayagataki keirau!”

Au a vakacegu ni oti ga e rua na siga mai na noqu ika 56 ni siganisucu. Keirau a ciqoma na neirau kaci ki kaulotu niu se cakacaka tiko. Ni keirau dolava na neirau kaci ka kunea ni keirau kacivi me veiqaravi ena Tabana ni Kaulotu e Cambodia Phnom Penh, keirau veitagicaki. Keirau marau dina!

Lori:

O Cambodia a sega sara ni tu ena neirau vakararai. Au nanuma me keirau lako ki Aferika se dua tale. Keirau tekivu tarogi keirau, “Io, na iboletalei cava e waraki kedaru tu mai?” Keirau a sega beka ni digi Cambodia, ia sa dua na isolisoli levu! Sa dua dina na veivakalougatataki! Na Turaga e sa vuku cake vei keirau. E talai keirau ki na vanua keirau gadreva me tu kina.

Keirau veiqaravi ena dua na kaulotu cakacaka ni loloma. Keirau cakacaka ena lalawa ni Loloma ni YDE, vakalewe fomu, ka kerea na lalawa vovou. Keirau dau dikeva talega na lalawa sa caka me vaka na tobu wai ka qivai ena rua na yabaki sa sivi. Keirau sa yaco me veiqaravi ena so tale na sala.

Keirau dau tiko ena koniferedi ni iteki kei na tikina me veivuke ena vakatavulici ni veiliutaki kei na kaulotu, keirau dikeva na nodra vale na daukaulotu ka sikovi ira na lewenilotu e nodra vale. Keirau cakava na veika kece me vukea na kena cici vinaka na kaulotu.

E sega na siga e tautauvata ena neirau kaulotu. Eso na siga keirau tu mai veikau, ka yaco i duru na wai se soso. Eso tale na siga keirau tiko ena valenivolavola ni kaulotu. Ni veitokani vata kei na daukaulotu ni Veika Raraba, keirau sikova na Tabacakacaka ni Lotu-ni-vanua kei na Lotu. Mai Cambodia, na vosa “lotu-ni-vanua” e sega soti ni ka ca. Na lotu kilai na lotu Buda—ko ira tale eso era lotu-ni-vanua. Keitou veisiko ki na Tabacakacaka me vukea na ivakamatau ni Lotu i Jisu Karisito ni Yalododonu Edaidai e isoqosoqo vinaka ka rawa ni vakabauti.

Keitou vakatubura na veiwekani vinaka kei ira, ka ra qiri totolo mai me vukei. Era dau qiri mai me tukuna, “E a yaco vei keimami e dua na waluvu, ka keimami gadreva na kakana ni 200 na matavuvale ka ra sa tiko tani.” Era kila ni ra rawa ni nuitaka na Lotu me kauta na veika ki na vanua e gadrevi kina vakatotolo ka kuria na ka e sega ni tiko vei ira.

Na cava keirau sotava e Cambodia? Tukuna ga mai, keirau sa na rairai sotava! Keirau sa dabe ena fuloa lolovira taudua—e vakalevu me qele ga se bitu—ena vale lolovira taudua. Keirau sa lako talega ki na nodra vale vakatui na vakaitutu vakamatanitu. Ko Bob a veiqaravi mada ga ena mataveiliutaki ni tabana ena dua na gauna.

Bob:

Na peresitedi ni kaulotu a kacivi au ka kaya, “Ei, au vinakata mo ikarua ni daunivakasala ni tabana.” Ena dua veimama na yabaki ki muri, au a tiko ena rumu ni veivauci ena Valetabu e Ogo Kogo kei na peresitedi ni tabana keirau a veiqaravi vata. E a gole tiko ena valetabu ena imatai ni gauna! O koya kei na nona matavuvale eratou a maroroi ilavo ka tovolea vakavitu me lako ki valetabu, ia e dau dua na leqa tubukoso, se e dua e tauvimate. Eso na ka e dau yaco mai. Ni oti e vitu na yabaki, eratou sa maroroya rawa e 40 na dola.

E vakatolu ena neirau kaulotu, keirau a rawa ni vukei ira na Yalododonu Edaidai e Cambodia mera gole ki valetabu. Keirau kauti ira e le levu na peresitedi ni tabana ka ra dau veivakatarogi tiko me baleta na ivolatara ni valetabu ka sega mada ni lako vakai ira ki valetabu. E dina ga e Cambodia, e dua na veiwatini qase e rawa ni vukei ira na matavuvale oqo ena nodra ilakolako ki valetabu. Era gadreva me tiko kei ira e dua baleta ni ra sega ni kila na vuka ena waqavuka. E levu vei ira e se bera mada ga ni ra vodo ena basi! Ia oqo era sa vuka ki Kong Kong ka gole sara ki na valetabu. E dredre sara vei ira mera cakava vakai ira na ka oya. Keirau vakavinavinaka kina Temple Patron Assistance Fund ka rawa ni vukei ira.

Lori:

Na lewe ni Lotu e Cambodia e rawa ni ka e veibolei. Me vaka e dua na matanitu, Cambodia e sega kina na vakasama ni Siga ni vakacecegu. Ko ira kece e lako mai ki lotu era soli bula me ra tiko.

Oya talega, ni e Cambodia e ono na pasede e Musilimi ka rua ga na pasede na lotu Vakarisito—kena vo era lotu Buda. Na veisau mai na bula ni lotu Buda ki na bula ni lotu Vakarisito e dredre dina. Eso na tamata era vakacegui mai nodra cakacaka, ka levu na gauna era biliraki mai vei ira na tu veivoliti ira.

Na soli ikatini e ka levu sara. O ira na bete vaka Buda era dau lako mai ena veimataka me kere raisi se ilavo, ka sa matau oqori vei ira na tamata. Ia mo taura na nomu veisaumi ka taura e dua na tikina me ikatini e ka levu sara.

E vuqa e sa sota kei na ka rarawa dina e nodra bula. Me baleti ira na Khmer Rouge, e dua na veiliutaki vakakominisi ka lewa tu mai Cambodia ena mua ni ’70, ko ira na 40 vakacaca e tu na nodra italanoa rerevaki yadudua. Au a sega ni sotava e dua ka sega ni tarai mai kina. Ko ira yadudua e tu na nodra lewe ni matavuvale ka ra a labati. E dina ni ra a sotava na ka lelevu, au sega ni vakabauta nodra tawa soreva, kei na nodra yalorawarawa me tovolea. Ia mai na taudaku ni nodra tawasoreva, e levu e tu vei ira na tawa vakabauti ira. E levu era vakila ni ra ka wale ka sega ni yaga.

Au kurabui niu raica ni vukei ira vakacava na kosipeli i Jisu Karisito mera serau mai. Ni ra sa kunea ni sega walega ni ra ka talei ia era luve talega ni Kalou, era dau kaya, “Ko veiwali beka? Oqo au sa na qai rawa ni cau.”

Na Lotu ena rawa dina ni seraka e Cambodia. Eso na tamata daumaka era muataki ki na Lotu. O ira na Yalododonu e kea era painia, ia ko ira era maroroya dina na kosipeli era vakalougatataki ena sala e vuqa baleta ni ra yaco mera kila na iVakabula. “Eka kurabuitaki dina.

E levu na neimami lewenilotu ka tabanalevu qaqa ena dua na vanua ka vakatokai na “Ulunivanua ni Benu,” ka dua na ibenubenu dola era tiko kina na tamata. O ira na lewenilotu e kea era dautomitomi ka dausosoqoni. Era dau vakailavo mai na vakayagataki tale ni palasitika kei na aluminiamu ka ra kauta mai na ibenubenu. Era vakaitikotiko ena veivale somidi lalai keirau sa lesuva vakavuqa.

Bob:

E dua na siga keirau rogoca ni kacabote tu na sereivakatagi, ka keirau raica ni sa biriki tiko a dua na valelaca. E Cambodia, oya e kena ibalebale ni dua e vakarau vakamau se e dua e sa mate.

Lori:

Keirau kila kina ni tinadra e lima se ono na gone e se qai mate walega. E sega ni dua na watina me tukuni. Ko ira tou na gone e ratou yadra ga mai ka kila ni sa mate na tinadratou.

E dua na luvena yalewa e mamakeukeu tiko ga. Mai na dua na vakavakadewa, a tukuna, “Oi au na ulumatua. Eratou tu oqo na taciqu kece. Au sega ni kila na cava meu na cakava.”

Au roqoti koya cake e ligaqu. Meu tarovi au vakacava? Na goneyalewa oqo e se qai vakayalia walega na tinana. Au vosa vua ena vosa vakavalagi ka kaya, “Au kila ni ko sega ni kilai au, ia au yalataka ni ko na raici tinamu tale. Ko na vinaka tiko. Ko ni sega ni biu duadua tu.

E levu sara na ka sotavi vakaoqo e solia vei keirau e dua na isema talei kei ira na tamata e Cambodia.

Keirau vakila ni vakasukai mai na loloma oya. Ko ira na tamata e Cambodia era vakaraitaka na lomavinaka levu vei keirau. Keirau lomani ira baleta ni ra luveni Kalou. Era sa ganeda ka tacida.

Kei ira eso na tamata, au nanuma niu vakasamataka, “Au sega ni waraka rawa meu raici kemuni ena bula ka tarava, ena qai rawa dina niu tukuna vei kemuni na ka kece au vakila vei kemuni kei na noqu loloma vei kemuni, kei na ka au qoroya vei kemuni, ka ni sega niu tukuna rawa vei kemuni oqo.”

Na neirau kaulotu e vakalougatataki keirau ena vuqa na sala. Eso na tamata era kaya, “Au sega ni kila ke rawa niu veiqaravi vakaulotu. Au sega ni rawa ni biuti ira tu na makubuqu.” E sa lima tu na makubui keirau lalai ni keirau biubiu, yabaki lima, va, tolu, rua, dua. E rua na makubui keirau yalewa erau sucu ni keirau tu tani mai. Au na maroroya e rua na noqu ivakatakilakila ni yaca ni daukaulotu meu solia vei rau na noqu goneyalewa lalai me rau kila ni a sega ni tiko ko Bu baleta ni ko Bu a cakava tiko na ka e gadreva na Turaga me kitaka.

Bob:

E vuqa tu na sala me qaravi kina na Turaga vaka daukaulotu. Eda tugana ki lomada na ka a tukuna o Elder Jeffery R. Holland baleta na veiqaravi vaka daukaulotu qase cake. E kaya, “Au yalataka ni o ni na cakava vei ira [nomuni vuvale] ena veiqaravi vua na Turaga ka na, ki na vuravura tawa yalani, ko ni sega ni rawa ni kitaka ke ko ni tiko ga mai vale me ovici ira tiko. Na isolisoli cecere cava beka e rawa ni ra solia vei ira na nodra kawa na tubunigone mai na nodra tukuna vei ira ena nodra sa cakava, ka vakakina ena nodra vosa, “E datou dau kaulotu na matavuvale oqo!’ [“Meda Vala Tiko,” Liaona, Nove. 2011, 46.]”