Dina Kamikamica

iVakatakilakila

Sweet Honesty

“Au gadrevi iko mo raici tacimu tiko,” a kaya o Na. “Keirau na gole tiko kei tamamu me keirau laki vukea e dua e tauvimate tiko.”

Au rai cake yani niu qusia tiko na vuloa ka deguvacu. E peresitedi tiko ni iSoqosoqo ni Veivukei o Na, ka dau laki sikovi ira na marama ena neimami tabanalevu.

“Vinaka, Arlyn,” a kaya o Na, ka reguca na yadrequ. “Se moce tiko o John. Ka sa tubu tiko na valawa uli ni madrai ena kaude. Yalovinaka kua ni tara.”

Au rai yani e katuba ka rau sa vodo o koya kei Ta ena qiqi ena gaunisala kuvu. Au dokai au sara ni nuitaki au o Na.

Niu sa samaka yani na valenikuro, au raica sara na valawa uli ni madrai. Au sa waraka dredre me mai bulia o Na ena bogi. Keitou dau kana madrai buta katakata vata kei na jamu caka e vale. Ia sa sega tu na keitou jamu ena tolu na vula sa oti.

Jamu! Niu vakasamataka sa qai walokai ga na ketequ meu kana ka kamica. Au raica sara na tavaya ni suka, e cake sara ena vatavata. Au kila ni maroroya tiko o Na me caka jamu tale kina.

Na levu ga ni noqu vakasamataka na suka, na levu cake ni noqu via kana. Oti oya, au sa dreta sara e dua na idabedabe ki na kaude ka dodoliga cake. Au sa tara rawa sara vakalailai na tavaya ni suka. Au a dreta voleka sara mai ena tutu ni vatavata. …

A qai vasiri na tavaya ka lutu mai na vatavata! Au a tovolea meu ciqoma, ia a lutu ka katuvu e loma ni valawa uli ni madrai. A tasova na suka ena madrai kei na kaude vakakina ena vuloa.

“Oilei!” Au a kaila. A vakayadrati taciqu kina. Sa tekivu me tagi o koya. Au sa via tagi talega. Na cava ena kaya o Na ena vuku ni ca oqo?

Niu sa vakadulai John rawa, au sa saga noqu vinaka meu samaka laivi na suka. Au a ciluma tani na tavaya mai na valawa uli ka savata. Au a savata lavi na suka mai na kaude kei na vuloa. Ia sa sega niu cakava rawa me kau tani na suka mai na valawa uli.

Au sa vakasamataka meu biuta lesu na tavaya ena vatavata. Ena rairai sega ni kila o Na ni sa lala tu. Ia au kila ni sega ni dodonu o ya. Au sa qai biuta toka na tavaya ena teveli ka waraki Na kei Ta me rau lesu mai vale.

Ni rau sa yaco mai vale, sa raica sara o Na na tavaya ni suka.

Au a cegu levu sara. “Au a vinakata meu tovolea ga na suka. Ia au a vakalutuma na tavaya mai na vatavata. Au a saga meu vakasavasavataka, ia a sega ni rawa meu kauta laivi mai na valawa uli ni madrai. Sa voqa mai tuba na vosa oqo niu rai sobu tiko ena vuloa.

A sega ni vosa o Na ena vica na miniti.

“Vosoti au sara,” au a kaya vakamalua.

A matalomani au o Na. “Io, au vakabauta ni na kamica cake na madrai ena bogi nikua,” a kaya. Au a rai cake. A matadredredre sara vei au. “Vinaka vakalevu na tukuna vei keirau na ka a yaco.”

Ni keitou sa kania tiko na madrai vakasuka ena bogi o ya, keitou sa veivosakitaka kei Na kei Ta na veika baleta na dina.

“Eda dau caka cala sara vakalevu ena bula oqo,” a kaya o Ta. “Ia ena gauna eda dina kina ka saga meda veivutuni, ena marau kina na Tamada Vakalomalagi kei Jisu Karisito. Eda na kune kalougata tiko vakalevu ni da dina—ena gauna mada ga e dredre sara kina ena imatai ni gauna.”

Au a se rarawa tikoga niu a vakatasovataka na suka. Au kila ni na sega sara ni levu na keitou jamu ena yabaki oqo ena vuku ni noqu cala o ya. Ia au a marau niu sa tukuna na ka dina. O ya e dua na yalo kamica e sega ni solia rawa na levu taucoko ni suka.