Na Kote a Yali
E vakaitikotiko mai Iowa, Amerika, o koya e vola.
“Ia koi au na Turaga au na vosoti ira ga kau sa lewa, ia koi kemudou sa kilikili mo dou vosota na tamata kecega” (Vunau kei na Veiyalayalati 64:10).
“Na, sa yali na noqu kote!” A kaya o Brad. Sa gauna me sa ia na gole i vale mai valenilotu, ia sa sega ni raica o Brad na nona kote mai na kena ililili.
“O dina ni ko a liliga tu e kea?” A taroga o Na.
“Io. A tu sara ga eke.” Na kote i Brad e karakarawa ramase ka damudamu. E dredre me dua e sega ni raica.
“E rairai sa tosoi. Me datou vakasaqara wavoki mada,” a kaya o Ta.
E ratou sa dui lako yani o Ta, Na, kei Brad me ratou vakaraica na rumu yadua. E ratou a laki rai ena kato ni iyaya e yali ka sa kune tale, ena loma ni valenilotu, ena rumu ni Matawilivola ni Sigatabu nei Brad, ena rumu ni Lalai, kei na ililili taucoko ni kote. E ratou a laki rai talega e vale ni vakacegu, ia e ratou a sega ni raica kina na kote.
“E dua beka sa kauta vakacala-ka. Au vakabauta ni ra na kauta lesu mai ena macawa mai oqo ni ra raica ni sega ni nodra,” a kaya o Ta.
“Ena gauna oqo, mo dara mada ga nomu kote makawa,” a kaya o Na.
A veisau na matai Brad. A sega ni vinakata o koya na nona kote makawa. Sa mamare, siawa, ka ka lailai vua. A dau taleitaka nona kote vou karakarawa damudamu ni dau rairai kina vakatamata qaqa.
“E dua beka a raica ni totoka dina na noqu kote ka butakoca sara,” a vakasamataka o Brad. E yaco beka vakacava oqo ena lotu? Na tamata taucoko e kea e dodonu mera dau dina. Sa sega ni rawa vei Brad me drobula o koya a butakoca. Sa dua na nona ituvatuva. Ena Sigatabu mai oqo, ena vakaraica tiko de dua ena dara mai nona kote. Ena qai dreta laivi mai ka kailavaka, “Tarova, butako!” Era na qai veivutunitaka ni ra a kauta.
Me sa totolo ga mai na Sigatabu vei Brad me cakava nona ituvatuva. Ia na Sigatabu a tarava a katakata na draki me daramaki na kote, vakakina na Sigatabu a tarava.
Na Sigatabu a tarava, sa vakaraici ira na cauravou lalai ena Lalai o Brad ena lomatarotaro, me kila o cei a butakoca na nona kote. O cauravou balavu beka o ya? Se rairai goneyalewa beka. Sa vakila ni sega ni vakabauta tale e dua. Sa sega ni vinakata o Brad na yalo o ya.
Ni sa suka na lotu sa wavokita totolo yani o Brad na valenilotu, me raici ira na vuvale ni ra dara nodra kote. Ia a sega ni raica na nona kote ena dua na vanua. Sa raica talega na kato ni iyaya e yali ka kune tale … ia e sega na kote. Evei beka na kote?
Ena ilakolako i vale, a vakasamataka sara o Brad e dua na ituvatuva vou. Me sa na masu. Sa kila ni o koya ni Tamada Vakalomalagi ena kunea na veika sa yali. Ena bogi o ya a masu o Brad ka kaya, “Tamaqu Vakalomalagi, yalovinaka ni tukuna mai o cei a taura na noqu kote. Au vinakata me vakalesuimai.”
A waraka toka o Brad me vakatakilai mai ki na nona vakasama na yacana se matana o koya a butako. Ia a mani tekivu vakasamataki nona itokani o Carl. E dau dabe tikivi Carl o Brad ena Lalai. Rau dau veiwali ka veidredrevaki vata vakalevu. Ia o Carl sa sega tu ni mai lotu ena vica na macawa. Sa nanumi koya vakalevu o Brad.
Vakacava beka ke sa taura o Carl na nona kote? E rairai sa rere beka na mai lotu o Carl ena gauna oqo baleta ni nanuma ni sa sega tale ni nona itokani o Brad. Sa gadreva o Brad me mai lotu tale o Carl. Ke a taura beka o Carl na nona kote, sa nanuma o Brad, ni na sega ni kailavaki koya. Ena vosoti koya.
Sa lade sara o Brad ena loga, ka sa lomavinaka sara.
Na Sigatabu e tarava ena Lalai, a sega ni tiko kina o Carl, ia e dua na cauravou vou. A dara toka e dua na neketai damudamu karakarawa veivolavolai.
“Totoka na neketai,” a kaya o Brad, ni dabe tikivi cauravou vou. “E vakavuna mo rairai vaka e dua na tamata qaqa.”
A matadredredre na gonetagane.
A matadredredre talega o Brad. Sa sega tale ni vakasaqarai ira na daubutako. Sa vakasaqarai ira ga na itokani.