“O koya oqo!”

iVakatakilakila

man working on car

Droini mai vei John Kachik

Au yaco bera ki vale ena dua na bogi ni vula ibatabata ni oti noqu vakayaco veitarotarogi vaka bisopi. Au wawale dina. Na cakacaka e vuni oca vakalevu me oti e vica na macawa, kei na itavi ni vuvale kei na Lotu au vakila me bitaki au me sivia na noqu iyalayala.

Ena yakavi oya, a dodonu meu vakavinakataka na noqu motoka meu rawa ni laki cakacaka ena mataka ka tarava. Niu daramaka noqu ovarola, au veisau mai na itavi vaka bisopi ki na makeniki. Au davo ena fuloa ni qaraji batabata e ruku ni motoka ka tekivu cakacaka. Na cava meu batabata, wawale, ka mavoa noqu iquruquru niu sa cakacaka oti vakaukauwa ena siga oya? Au sa vakayalia na noqu vosota ka tekivu kudru, kerekere masu vua na Tamada Vakalomalagi.

“E rawa beka ni O ni vukei au vakalailai?” Au kaya. “Au sa tovolea tiko na noqu vinaka taucoko meu tama vinaka, vakawati, ka bisopi ka bulataka na ivunau. Ena sega beka ni veiqaravi vinaka cake keu vakacegu vakalailai? Yalovinaka vukei au meu vakaotia oqo ka me rawa niu laki moce.”

Vakasauri, e tolu na vosa makaresese e lako mai noqu vakasama: “O koya oqo!”

“Na Cava?” Au a sauma.

E a lako tale mai na vosa: “O koya oqo!”

Na kilaka sa qai vakatawa mai na noqu vakasama kei na lomaqu ni sa lako mai vakatolu na vosa: “O koya oqo!” Na veivosa oqo e kauta na itukutuku ki yaloqu. “Oqo” sa bula vakayago, kau sa sotava tiko e dua na gauna ni tubu ka nakiti me vukei au meu yaco me vaka e vinakata na Tamada Vakalomalagi. E sa tukuna na Yalotabu vei au, “Ko namaka beka ni ilakolako e vuravura oqo ena sega na kena ogaoga?” Niu tucake mai na fuloa simede batabata oya, au sa sega ni vaka e liu.

Vakatau mai na noda ivukivuki vei ira, o ira na gauna dredre e rawa ni raici me isolisoli mai na Tamada mai Lomalagi sa dauloloma. E vakarautaka vei keda na madigi meda sota kei na dredre ka meda vulica rawa meda vuki Vua. Ni da cakava, eda vakalougatataki ena vuli kei na tubu vakayalo.

Na tolu na vosa ka lako mai noqu vakasama ena bogi batabata ena fuloa simede ni qaraji batabata oya e sa vakalougatataki au me sivia e 35 na yabaki. Au dau tovolea vakaukauwa meu raica ni sega na dredre e maumau. Au raica na dredre ni madigi ni vulica na veika kau na sega beka ni vulica ena dua tale na sala.