Ena Sega ni Rawa Mada Ga Ni Dua na Cagilaba Me Tarovi Keirau

iVakatakilakila

Couple standing in hurricane aftermath

Droini mai vei Suzanne Simmons

Ni oti vakalailai noqu suka mai na kaulotu, au ciqoma e dua na veisureti ki na dua na danisi. Ena danisi, au biutaleca noqu talevoni ka lomasoli e dua na cauravou me vukea na kena vaqarai. Ni keirau veitalanoa tiko, keirau kunea ni keirau suka ruarua mai na kaulotu ka tu vata ena levu na vakasama kei na vakanamata.

Na neirau veiwekani e tubucake tikoga, ka keirau veibukuti yani. A neirau tadra me keirau vauci ena Valetabu e Washington D.C. ni bera ni sogo me vakavoutaki ena Maji ni 2018. Ia ni oti na caka ni vakatulewa oya, keirau a vakatovolei. Taumada, au a biu cakacaka ka sega ni dua na sala meu maroroi ilavo kina baleta na ilakolako ki valetabu. Tarava, e dua na cagilaba e muri donu me lauti Puerto Rico ni bera vakalailai neirau tiki ni siga ni vakamau.

Ni basika na Cagilaba o Maria, e yamaraka na neimami yanuyanu totoka. Era sogo na sitoa. E boko na livaliva; wai, kakana, kei na veika gadrevi tale eso sa dredre me kunei. Keirau vakayalia na veika kece keirau tuva me vakayagataki ena neirau soqo ni vakamau. Keirau tarova na caka ni soqo ni vakamau, ka kena irairai ni keirau sa na tarova talega na neirau vakamau. Na veilakoyaki mai kei na lako yani ki Puerto Rico e sa vakalailaitaki, ka sega ni dua e kila na kena balavu. Au sa tekivu vakila na yalolailai, kau vakasinaiti ena vakatitiqa kei na veilecayaki.

Ena dua na bogi, keirau veitalanoataka kei noqu itau na neirau ituvaki. Na veilakoyaki e veilecayaki, ka keirau na sega ni cakasoqo ni vakamau se isulu ni vakamau, ia na Yalotabu e vakadeitaka ni keirau gadreva me keirau nuitaka na Turaga. Na ka bibi taudua oya na vauci e valetabu. Keirau masu vei Tamada Vakalomalagi me veivuke.

Ni tekivu vakalesui ga na vuka mai Puerto Rico, keirau tuva vou na neirau vuka ka bukuya vou na siga ni neirau vauci. E a sega tu na neimami sala ni veitaratara me vakamacawa ni oti na cagilaba, ia na talevoni ni dua na itokani e cakacaka tiko. E vakatarai keirau me veitaratara kei na valetabu. Keirau a rawa ni veisautaka na ka kece me rawa ga ni keirau vauci! Ni vo e vica na macawa mai na neirau ilakolako, ko ira na lewe ni matavuvale kei na veiwekani era soli ivava kei na isulu ka vukea me tu e levu na ka baleta neirau vakamau.

Ni ni oti na neirau curu ki valetabu, keirau laiva tu ki dakui keirau na neirau lomaleqa. Keirau veitauri liga me keirau curuma vata na neirau matakavou. Au rawa ni tukuna dina niu vakila na liga ni Turaga ni veituberi ka veivakadeitaki tiko ni kevaka keirau vakabauti Koya, ena DONU na ka kece. Nikua, keirau sa vakalougatataki ena dua na luvei keirau tagane totoka ka keitou sa vauci vakamatavuvale me tawamudu.