Na iOtioti ni Vosa
Na iVakaraitaki Cecere ni Nona Loloma na Kalou
Mai vei Peresitedi M. Russell Ballard
Peresitedi Vakatawa ni Kuoramu ni iApositolo Le Tinikarua
Mai na dua na vosa ena koniferedi raraba ni Epereli 1988.
Sa dau vakaraitaka na Kalou na Nona loloma vei keda ena Nona vakarautaka na veidusimaki eda gadreva meda tubu kina ka rawata na keda icavacava. Sa kilai keda vinaka o Koya, na noda icavacava, kei na noda madigi tawamudu sa solia vei keda na ivakasala vakalou kei na ivakaro ena Nona ivolavakarau veivakasalataki—o ya na ivolanikalou. Ni da sa kila vinaka ka muria na ivakasala oqo, sa qai yaco na noda bula me vakainaki ka vakaibalebale. Eda vulica ni noda Dauniveibuli e lomani keda ka gadreva meda bula marau. Ena ivakaraitaki tawa-vakatauvatani rawa ni loloma vakalou oqo baleti keda, sa tala mai kina o Koya na Luvena Duabau Ga, o Jisu Karisito.
“Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.
“Ni sa sega ni tala mai na Luvena ki vuravura na Kalou me cudruvi ira na kai vuravura; me bula ga koi ira na kai vuravura ena vukuna” (Joni 3:16–17).
A sucu mai o Jisu ki na bula vakayago oqo. A bulataka e dua na bula sa uasivi sara, ia ni cakava oqo, sa tavoca kina e dua na sala meda na muria. A vakavulica vei ira na Nona tisaipeli: “Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula” (Joni 8:12).
Eda sa rawa ni kila vinaka na titobu ni loloma i Karisito vei keda ni da raica ni sa lomana me sorovaka ka vakararawataki ena vuku ni noda ivalavala ca, “na rarawa sa vakavuna vei [koya], na Kalou sara mada ga, ko koya sa kaukauwa sara, me sautaninini ena vuku ni mosi, sa titiri kina na dra mai na qara kecega ni yagona ka sa rarawa sara kina na yagona kei na yalona” (Vunau kei na Veiyalayalati 19:18).
Ena Siganimate oqo, meda sa qai vakavinavinaka cecere vua na Kalou ena vuku ni Veisorovaki kei na Tucaketale ni Luvena Daulomani, o Jisu Karisito. Sa tu Vua, ena Vukuna, mai Vua, sa rawa ki na ituvaki vakayago oqo me laki bula tudei, ka uasivi sara, ka sega na vosa me vakamacalataka rawa na noda marau.
Na isakisaki kece ni noda veika ni bula sa ivakaraitaki ni Nona kaukauwa vakalou kei na ivakaraitaki ni Nona loloma. Ia sa waraki keda tu mai na cakamana e cecere duadua vei ira kece. Ena yaco oqo, ena gauna ni Nona kaukauwa, meda tucake mai na mate kei na ibulubulu ki na dua na vuravura vou ena sega vakadua ni takali kevaka eda sa kilikili kaya, eda na qai tiko vata kei Koya kei Tamada Vakalomalagi me tawamudu sara.