Na Bula Oqo sa Dua na iGu Balavu
Era bula tiko nikua na Yalododonu Edaidai ena vanua a bula voli kina o Paula ena gauna ni Veiyalayalati Vou. Era a bula voli ena nona vosa.
“Au sa vulica rawa ni kosipeli sa tautauvata ga ena veivanua kecega. Na bula mai vanua tani, au sa vulica kina meu raica matua na dina ni kosipeli ka vakila na Yalo ka sega ni kuitaki ena itovo vakavanua.” —Bryana W., 15
“Au a vola na vosa nanuma ena noqu iloilo meu nanuma kina na veika kece sa yaco ena yabaki oqo: MST, keba ni Goneyalewa, semineri. E vukei au meu nanuma tiko na vanua au a lako mai kina.” —Marie H., 17
“Au kila ni gauna au gole kina ki na semineri au dau kune marau niu kila niu sa cakava tiko na ka au gadreva meu cakava, kau kila ni na vinaka na veika kecega.” —Lizzie T., 17
A cavuta o Loukia C., 15, ena imatai ni gauna na nona ivakadinadina ena keba ni Goneyalewa ka a qai papitaiso e muri.
“Au dau taleitaka vakalevu ena MST na qito, danisi, kei na soqoni vakailawalawa, na lotu ena mataka kei na railesu. A vukei au meu veivukei vakalevu ka vosota ka marautaka vakalevu na ivolanikalou.” —Haig T., 14
“Ena MST, sa tekivu me keimami sa dua na ilawalawa ka sa vaqaqacotaki keimami. A vukea me tuvai ka vakauqeti na parokaramu ni itabagone e Greece ni keimami sa mai veikilai vakai keimami vakavinaka sara.” —Alexis H., 18
“Na lagasere ena olo ena MST a dua na yaloqaqa au se qai bau cakava vakadua ka a dua na gauna veivakurabuitaki vei au. Ena gauna oqo, au sa vulica rawa na kena bibi oi keda ena vuravura totoka oqo.” —Irini S., 17
“Au a vulica ena keba ni Goneyalewa ni bula sa vaka na igu balavu. A vukea meu vakatubura na noqu vakabauta, ka kila ni sa dodonu meda lako tikoga ena salatu dodonu, me vaka eda cici tiko vakabalavu. Na veika o ya a vukea me tubu na noqu ivakadinadina ka vakabauta ka lako tikoga ena salatu dodonu.” —Winifred K., 14
“Au a via raica sara ga se vakacava tu beka meda voliti tu mai vei ira na itabagone eda vakabauta vata. Au a vakila ni keimami sa semati tu ena dua na sala talei, ka levu cake mai na neimami veikilai yaca tu ga.” —Pavlos K., 15
“Au marau ni a soli na madigi meu sotava eso tale na itabagone era sotava talega na veika au sotava tu ena veisiga.” —Joshua K., 17
“Sa tautauvata ga na yalo e sotavi ena MST kei na keba ni Goneyalewa se cava ga na vanua o gole kina e vuravura. Au taleitaka na keba lailai ni Goneyalewa baleta ni rawarawa na veisemati vakai keimami.” —Olivia H., 15
“Au sega ni lewe ni Lotu, ia au dau lako mai ena veimacawa keu rawata. Au qoroya na ka era tutaka tiko na goneyalewa.” —Irene C., 14
Ena vica na vula sa oti, era a soqoni e dua na kalasi ni semineri e Mars Hill, volekati Athens, e Greece, na vanua a vunau vakaukauwa sara kina o Paula na iApositolo (raica na Cakacaka 17:22–34). Era a veivosakitaka na gonevuli na veivakauqeti ni semineri ki na nodra bula, oka kina na ivakavuvuli nei Paula.
“Na bula voli mai Greece e vakayacora na Veiyalayalati Vou me ka bula tale mai,” a kaya o Alexis H., yabaki 18. “E dau taleitaka o tamaqu me laki raica na vei vanua makawa a vunau voli kina o Paula ka dau wasea na ivolanikalou eso se tukuna vei keitou na vanua a yaco kina.”
Me vaka ga a sotava o Paula na ibolebole ena nona gauna, era sa gumatua tiko na itabagone e Greece ki na bula raraba, politiki, kei na veika vakailavo. Na koniferedi ni itabagone kei na keba ni Goneyalewa e dau dredre me caka mai Greece, ka vakakina na vuli ena semineri. Ena loma ni veika oqo kei na ibolebole, era sa bulataka tikoga na itabagone e Greece na veivakayaloqaqataki nei Paula mera “tu dei e na yalovata, ka gumatua sara e na lomavata me tubu na vakabauta ni itukutuku-vinaka” (Filipai 1:27).
Na ibalebale ni bula voli mai Greece vei ira na lewenilotu itabagone oqo o ya mera marautaka na draki, baravi, kakana, kei na danisi. Era marautaka talega vakaidina na veimaliwai vata vakai ira. Ni ra laki sota vata ena semineri kei na itaviqaravi ni tabana, era sa yaco mera kaukauwa cake ena vakabauta kei na veitokani.
Semineri ena Delana o Mars
Na ilawalawa ni semineri e mata ni valenilotu e Athens.
E lolomataka na itaba o Leeann Heder
Ena gauna sa tekivu kina na semineri e Greece ena vica na yabaki sa oti, era a lima ga na gonevuli. Era dau vuli ena tolu na mataka ena dua na macawa, ka so era sema mai ena veivosaki ena vidio. Era a semineri talega ena veiyakavi ni Vukelulu, ka tarava e dua na itaviqaravi. Era sa veivolekati sara ka ra sa rarama vei ira na nodra itokani, era a raica na nodra ivakaraitaki. Ni ra taro na nodra itokani, era dau kauti ira na itabagone ki na semineri kei na itaviqaravi ni Muavata.
E a kaya e dua na cauravou, o Pavlos K., 15, “Na gole ki semineri sa sala vinaka me tekivu kina na siga ka vukei au meu tu kaukauwa. E biuta ki na noqu vakasama meu ivakaraitaki vinaka vei ira na tamata. E vukea me tekivu na siga ena noqu vakananumi Jisu Karisito.”
Ni ra sa tubu qaqaco ka duavata tiko na itabagone, sa yaco mai na kalougata kei na madigi. Me vakataka, ena 2017 ni ra a kalougata mera tiko ena Me iSakisaki ni iTabagone (MST), e dua na koniferedi levu ni itabagone ni iwasewase. Era a soqoni vata talega yani na goneyalewa ena nodra isevu ni keba ni Goneyalewa e Greece. Sa yaco kina mera veimaliwai sara vakavoleka vakailawalawa, ka rau a lewena kina na Lotu e rua na goneyalewa.
Koniferedi ni Veimatanitu ni MST
Ena koniferedi ni MST, ni cavuti yadua tiko na matanivosa “Kerea,” mai na Jemesa 1:5.
Na koniferedi ka a vakayacori mai Jamani, a kauti ira mai na itabagone Yalododonu Edaidai mai Iurope taucoko. Era tadu mai na itabagone mai Greece kei Cyprus ena drau na maile vakayawa, ka yaco na koniferedi mera vaqaqacotaki kina. Vei Maximos A., 14, “na ka vakasakiti duadua ena MST o ya na neimami wasea na neimami ivakadinadina. Era a vakila taucoko na Yalo, kau a vakauqeti meu tara cake noqu ivakadinadina.
“Taumada a lewe va ga na itabagone mera gole,” a tomana o Loukia C., 15, “ia e muri, keimami sa lewe 15 na lako—e iwiliwili levu vei Greece—oka kina e tolu na itokani sega ni lewenilotu.”
“Sa dua na ka totoka meda duavata ena dua tale na vanua me wasei kina na kosipeli vata ga ka o sega ni duatani. Keimami a duavata taucoko tiko, ka keimami sa vakila vata tiko na Yalo. A vukei au na veika oqo.”
“E sega ni lewenilotu o tamaqu ka sega ni vinakata meu gole ki na MST se papitaiso,” a kaya o Jesiana, 16. “Ia era sa qai lolovaki au na lewe ni tabana, ka laki vosa vei tamaqu o buqu. Ni sa oti o ya a qai kaya niu rawa ni gole!”
Ena MST, a sotava eso na ka vou, me vakataka na, “vakaitavi ena gauna ni lesoni kei na itaviqaravi kei na noqu cavuta na noqu ivakadinadina a vukea meu kila vinaka na kena vakilai dina na Yalo Tabu. Au se bera vakadua meu vakila vakaoqo e liu na Yalo, kau sa marau vakalevu ka matalau. Au a cavuta na noqu ivakadinadina ena imatai ni gauna.”
Me ikuri ni kana magiti vakayalo, e a dua na gauna ni vakacagicagi vei ira ka marau vata ena koniferedi. A gole mai Cyprus o Haig T., 14, ki na koniferedi. “Au a vulica meu dau veimaliwai raraba, meu vakaitokani dina, ka bula marau, ena gauna mada ga ni dredre.”
Keba ni Goneyalewa
O ira na goneyalewa e Marathon, e Greece.
A yaco talega na veika oqo ena keba ni Goneyalewa. Era a laki sota e tinikarua na goneyalewa kei nodra iliuliu volekata na buca ni valu makawa e Marathon. A tolu na siga na nodra tiko vata, ka ra vulica mera vakararavi vakai ira mera qaqaco kina ka vakayaloqaqataki.
“Niu a se yabaki 12,” a kaya o Loukia, “Au a gole ki lotu ena imatai ni gauna kau a marau vakalevu, ia au a qai kila ni au duadua ga au yabaki 12. Ia ni oti e rua na yabaki, sa levu sara na neimami goneyalewa ka yaco ena imatai ni gauna me caka na keba ni Goneyalewa.” Ni ra sa mai sota, a kaya, “Au sa qai kila na ibalebale meda dua na Yalododonu Edaidai. Ni da sa bula voli ena kosipeli, sa na wavokiti keda e dua na rarama.”
Na keba ni Goneyalewa, ena 2017—na kena isevu e Greece.
Vei Bryana W., 15, na MST kei na keba ni Goneyalewa a vukei koya me dolava na yalona ka veivosaki kei ira na tamata. “Na noqu matavuvale e dau toki vakalevu, ka dau dredre na noqu cokonaki au kei ira na tamata baleta niu dau mamadua,” a kaya. “Ena vuku niu sa mai volekati ira na noqu ilawalawa ni MST, au sa vakaitokani vinaka sara. Ena soqoni ni ivakadinadina, keimami a wasea na lomai keimami, kau kila kina ni sa tautauvata na yaloi keimami.”
E nanuma tiko o Marie H., 17, na itoko ni keba, “Na bula sa dua na igu balavu, sega ni veitau leleka.” Era a veivosakitaka na goneyalewa kei ira na iliuliu na bibi ni gu tikoga ka vakacavara na veitau, a kaya. “A vakavotui kina vei au niu sa rawa ni gu yani, vakadeitaki au, ka raica matua tiko na iotioti ni laini. Sa qai rawa meu rawata na veika sa gadreva na Tamaqu Vakalomalagi meu cakava.”
“E kauta mai na saravi ni cadra ni matanisiga e dua na yalo vakacegu ka totoka.” —Lizzie T.
Dua vei ira na usutu ni keba o ya na lotu ni kida mai na siga e baravi ena iotioti ni nodra mataka e kea. A kaya o Lizzie T., 17, “Keimami a kauta na neimami ivolanikalou, keimami a lotu, ka sarava na kida mai ni siga. Keimami a vakila taucoko na loloma ni Kalou. E a dua na itinitini totoka ni neimami gauna vata vakai keimami.”
Tadrava Yani na Mataka ena Yaloqaqa
“Au a vulica mai na MST kei na keba ni Goneyalewa e vuqa na veika ni kosipeli kei na kena rawa ni vukei au ena noqu bula,” a kaya o Irini S., 17. “A laki levu sara na noqu itokani e kea ka vulica na kena bibi meu dau tukuna na noqu nanuma kei na lomaqu. Au a vakila na titobu ni Yalo Tabu kei na loloma ni noda iVakabula, o Jisu Karisito.”
Na tiko voliti ira na itabagone Yalododonu Edaidai, a kaya o koya, sa vaqaqacotaka meu yalonuidei. “Ni se bera na MST au a sega ni raica rawa na veika vinaka ka totoka a cakava na Kalou vei keda kei na ituvatuva se cakava tikoga oqo vei keda.”
“Meda kakua ni rawai mai vei ira na tamata se dua na ka e tu voliti keda era saga mera dreti keda tani mai na bula voli ena kosipeli,” a kaya o Manasseh A., 17. “Na kosipeli sa tautauvata ga ena veivanua ka sa dodonu meda lako tikoga ena salatu dodonu.”
Se da tiko mai Greece se dua tale na vanua e vuravura, na wasei tiko ni salatu o ya ena yaco kina meda yalo duabau tiko.