N na Kanga n Oota?

Tariu ao mwaaneu, ti kukurei ni manga ikotaki ikai n te maungatabu aei n Ana Ekaretia Iesu Kristo ibukiia Aika Itiaki ni Boong aika Kaitira iaan ana kairiiri ara burabeti, Beretitenti Russell M. Nelson. I kakoaua nakoimi bwa e na reke ara tai n ongora bwanaan te Tia Kamaiu rinanon aia reirei naake a tataro, a anene, ao n taetae ibukin kainnanora n ara bong n te maungatabu aei.

N aron ae koreaki n ana boki Makuri, Biribo are te Mitinare e taekina te euangkerio nakon te Itiobia are te unaki are e kawakin ana bwai te ueanaine mai Itiobia.¹ Inanon okina n taromauri mai Ierutarem, e wareware n ana boki Itaia. Ni kairaki iroun te Tamnei, e roko Biribo ni kaaniia ao n ongo ngke e wareka te burabeti ae Itaia, ao e taku, Ko ota bwa tera ane ko warekia?

“Ao e taku [te iunaki], N na iranna n, ataia ao akea ae na reireiai? …

“Ao Biribo e kaurea wina, n taekina Iesu nako ina, ni moa ni kaotia ni mwakoron naba te Baibara anne.”²

Te titiraki are e tabekia te mwaane ae te I-Tiobia bon te kauring ibukin te kaetieti mai karawa ni bane ni ukora te reirei ao n reiakina ana euangkerio Iesu Kristo i bon imarenara.³ N te koaua, n te marooro n te kamatebwai ao n reireia te euangkerio, n tabetai titebo ngaira ma te I-Tiobia—ti kainnanoa ana ibuobuoki te tia reirei ae kakaonimaki ma ni kairaki, ao n tabetai titebo ngaira ma Biribo—ti riai n reireiniia ao ni kakorakoraiia tabeman n aia tai n rairaki.

Oin ara kantaninga ngkai ti ukora te reirei ao n reireia ana euangkerio Iesu Kristo e riai ibukin karikirakean ara onimaki iroun te Atua ao n Ana baaire ni kakukurei mai ieta ao iroun Iesu Kristo ao Ana karea ni kamaiu ao ni karekea te rairaki ae reitinako. Karikirakean te onimaki n aron aei ao te rairaki a na buokiira ni karaoi ao ni kawakin berita aika tabu ma te Atua, n aron kakorakoraakin nanora n iriira Iesu ao karekean te bitaki ae koaua n te aro n tamnei inanora—n taekana teuana, ni bitiira nakon te aomata ae boou, n aron are e reireia te Abotoro ae Bauro n ana reta nakoia I-Korinto.⁴ Te bitaki aei e na anganiira te maiu ae kakukurei riki, ae nakoraoi ma te marurung ao ni buokiira ni kateimatoa te nonori ae akea tokina. Tiaki naba aio ae riki nakon te iunaki ae te I-Tiobia imwiin ataakin te Tia Kamaiu irouna ao n rairaki nakon Ana euangkerio? E taku boki aika tabu bwa “e wakina kawaina ni kimwareirei.”⁵

Te tua ni kamatebwaia ao n reireia te euangkerio i bon imarenara e aki boou, e a kaman kaokiokaki ma ni moan rongorongon te botanaomata.⁶ N te tai teuana ae onoti, ngke a mena Mote ma ana aomata i abaia tibuni Moaba ake a aoraoi imwaain rokoia n te aba ni berita, e kairaki iroun te Uea bwa e na reireiniia ana aomata ni kaineti ma mwiokoaia n reiakin berita ma tuua ake a tia ni karekei mairoun te Uea ao n reireiniia kanoaia,⁷ bon angiina mai buakoia a tuai n rinanon Taari ae Uraura ke te kaotioti ake a kanakoaki iaon te Maunga ae Tinai.

Mote e kauringiia ana aomata:

“Ngkai, O Iteraera, kam na ongo tua ma moti, aika I reireingkami, ba kam na tou mwiia, ba kam aonga ni maiu, ma n rin n abana te aba are E anganingkami Iehova ae Atuaia ami bakatibu. …

“… Ko na reirei baikai nakoia natim ma natiia natim.”⁸

E kainna Mote, ni kangai, “Ko na kakawakin ana taeka nako, ma ana tua, aika I tuangko n te bong aei, ba ko aonga ni kabaia ma natim i mwim, ao ba ko aonga ni kamaiti am bong i aon te aba, ae E anganiko Iehova ae Atuam ba abam, n aki toki.”⁹

A teimatoa ana burabeti te Atua n anganaki te kaetieti bwa ti riai n karikirakea ara utu n ribanaia ao n ana kauring te Uea”¹⁰ ao “n te oota ao te koaua.”¹¹ E taku Beretitenti, “Ni bongin aroaro aika a aki riai ae kabuta ao tangiran tamnei aika a buakaka, iai mwiokoaia kaaro ae tabu n reireiniia natiia kakawakin te Atua [ao Iesu Kristo] inanon maiuia.”¹²

Tariu ao mwaaneu, ana kauring ara burabeti bon reitan te kauring ibukin mwiokoara n tatabemaniira n ukora te reirei ao n reireiniia ara utu bwa iai Tamara are i Karawa are e tangiirira are e a tia ni karaoa ana babaire ni kakukurei ibukiia Natina; bwa Iesu Kristo, ae Natina, bon te Tia Kabooa te aonaaba, ao e roko te kamaiuaki man onimakinan Arana.¹³ A riai n riki mweengara bwa taabo ni katantan n te tamnei, ni kateaki i aon te bwa are ara Tia Kabomwi, Iesu Kristo, are e na buokiira n tatabemaniira ao n ara utu ni karekei namakin n tamnei ni kamatoaaki inanora, are a na buokiira n teimatoa inanon ara onimaki.¹⁴

Ko na bae n uringiia uoman ana reirei Ioane te Tia Bwabetito a ira Iesu Kristo imwiin ongoraaia n ana kakoaua Ioane ae Iesu bon ana Tibutetei te Atua, te Mesia. Mwaane aika a raraoi aikai a butimwaea ana kakao Iesu n “mai ao noria”¹⁵ ao ni maeka irarikina n te bong anne. A karekea aia kakoaua bwa Iesu bon te Mesia, Natin te Atua are e na uota buren te aonaaba.

N te aro naba anne, ngkana ti butimwaea ana kakao te Tia Kamaiu n “mai ao noria,” ti riai n maeka Irouna, ni kairekerekeira ma koroboki aika tabu, ni kakukureira iai, n reiakin ana reirei, ao ni maiu n aron Maiuna. Tii ngkanne ti a moanna n ataia ao ni kinaa bwanaana, n ataia bwa ngkai ti nakoina ao ni kakoaua, ti na aki baki ke n taka.¹⁶ Ti na kona ni kinaa te koaua n taai nako, n aron ae riki nakoia uoman reirei ake a maeka irarikin Iesu n te bong anne.

Tariu ao mwaaneu, tiaki te bae e karina n riki. N anga ngaira ni butimwaai anainano aika a rietata n te n te aro n atua e aki bebete karaoana; tiaki te bwai ae e kai karaoaki, e kainnanoa ae ko na butiia te Atua ao n reiakinna bwa ko na kanga ni uota ana euangkerio Iesu Kristo ae nuukan maiura. Ngkana ti karaoia, I berita bwa uaan te Tamnei ae Raoiroi e na uota te koaua nako nanora ao n ara iango ao ni kakoaua ibukina,¹⁷ n reirei bwaai ni kabane.¹⁸

Ana titiraki te I-Tiobia, “N na iranna n [ataia] ao akea ae na reireiai?” iai nanona ae onoti inanon te rongorongo ibukin mwiokoara n tatabemaniira n ukora n reiakina ana euangkerio Iesu Kristo ao ni kamwakuria inanon maiura. N ana itera te I-Tiobia, n aron te katooto, e karaoa nanon te koaua are e reiakinna mairoun Biribo. E nang bwabetitoaki. E ataia bwa Iesu Kristo bon Natin te Atua.¹⁹

Tariu ao mwaaneu, ara mwakuri a riai ni booraoi ma are ti reiakin ao n taekinna. Ti riai ni kaota ara kakoaua man are ti maiuakinna. Te tia reirei ae nakoraoi bon te katooto ae tamaroa. N reireia te bwai are ti maiuakinna raoi e kona ni karaoa te bitaki inanoia naake ti reireiniia. Tariu ao mwaaneu, taiaoka iangoa aei: Ngkana iai nanora irouia naake ti reireiniia, ngkana tao man ara utu ke te aomata temanna, ni kukurei ni kawakin booki aika tabu ao aia reirei abotoro ao burabeti aika a maiu inanon ara bong, a kan nooria bwa iai kukurein nanora irouia. N te aro naba anne, ngkana ti tangiria bwa a na ataia ara utu ae Beretitenti Russell M. Nelson bon te burabeti, te tia mamata, ao te tia kaotioti n ara bong, a tangiria bwa a na noorira n tabeki baira ieta ni kamatoa ao n ataia bwa ti iriira ana anga reirei. N aron te taeka n Amerika ae kinaaki ae kangai, “E kakawaki te bae e karaoia te aomata nakon are e taekinna.”

Tao tabeman mai buakomi aika kam mena inanon te aro aei bon titirakiningkami, “I a bane n tia ni karaoi bwaai aikai ao n tia n ira te katooto aei n temanna n onoti ao n te utu, ma tabeman raoraou ao aomata ake I tangiriia a kararoaia mairoun te Uea. Tera ae I riai ni karaoia?” Ibukimi ngkami ake kam a rinanon te nanokawaki, te karawawataki, tao te uringaaba, te korakai n nano, taiaoka ataia bwa a aki bua ibukina bwa te Uea e ataa te tabo are a mena iai ao e tararuaiia. Uringnga, boni ngaiia Natina ae Ana bwai ni mwakuri!

E bon kaangaanga ae e na ataaki bukina ni kabane bwa bukin tera aomata a aikoa maiu ni kaeti ma te euangkerio. Te tamaroa are ti kona ni karaoia n aro aikai ti na tangiriira ao ni mwaneiia, n tataro ibukin mweeraoia, ao ni bubuti ana buoka te Uea n ataia bwa tera ae ko na karaoia ao n taekinna. Ni kukurei ni koaua ma ngaiia inanon aia tokanikai; ko na riki bwa raoraoia ao tarai tamaroaia. Ti riai n aki kabwarainanora mairouia ma ti na kawakina ara reitaki ma ngaiia. Tai kaitaraiia ke ni motiki taekaia. Tii tangiriia! Te taetae ni kaikonaki ibukin te nati are e bakatae e reireiniira bwa ataei ngkana a ataa raoi aia kaangaanga, a tangiria ni kan oki nakon mweengaia. Ngkana e riki anne nakoia ake ko tangiriia, kaona nanomi ma te nanoanga, naako kawariia, baraaki iaon roroaia, kaboria ma ngaiia, n aron are e karaoia ana karo te nati are e bakatae.²¹

N te kabane, kateimatoa maiuakinan te maiu ae tau, ko na riki bwa te katooto n te bwai are ko kakoaua, ao ni kaaniko ma ara Tia Kamaiu, Iesu Kristo. E ataia ao e oota n rawawatara ae korakora ao marakira, ao E na kakabwaiai ami konabwai ao ami anganano nakoia natimi ngkana tiaki n te maiu aei, n te maiu are imwiina. Uringnga, tariu ao mwaaneu, n taainako bwa te kaantaninga bon mwakoron te babaire ae kakawaki n te euangekerio.

Rinanon ririki aika a mwaiti ni beku n te Ekaretia, I a tia n nooriia membwa aika a kakaonimaki ake a teimatoa ni maiuakin reirei aikai inanon maiuia. Aei e koaua n aron te tina ae e aki iein are I aranna bwa “Mary.” Ae kananokawaki, Mary e rinanon te raure ae kauruaki nano. N te anne inanon maiuna, e ataia Mary bwa ana babaire aika kabanea ni kaangaanga ni kaineti ma ana utu a riki bwa maiuia n te aro n tamnei. Te tataro, kamatebwaian boki aika tabu, te aki mamatam, te nanako n taromauri ao te nanako n te tembora a teimatoa ni kakawaki irouna?

Mary e kakaonimaki n taainako, ao n te tai ae kaangaanga anne inanon maiuna, e baireia bwa e na teimatoa ni kakaonimaki n te bwai are e ataia bwa e koaua. E karekea te korakora n “Te Utu: Te Katanoata nakon te Aonaaba,” are, mai buakon mwaitin reirei aika a nakoraoi, ae reiakinaki bwa iai tabeia kaaro ae tabu ni kaikawaia natiia n te tangira ao te kororaoi n reireiniia bwa a na kawakin ana tua te Atua n taainako.²¹ E reitinako n kakae nako ibukin ana kaeka te Uea ao n tibwauai ma natina aika aman ni katoa tain aia bootaki n utu. A marooroakina te euangkerio n te tai ae mwaiti ao n tibwauai baike a rinanona ma aia koaua i bon imarenaia.

N aki tabe ma te rawawata are a rinanona, natina a karikirakea tangiran ana euangkerio Kristo ao nanoia ni kan beku ao n tibwauaia ma tabeman. Teniman mai buakoia a karaoa aia mwakuri ni mitinare ae bwanin taina ma te kakaonimaki, ao are te bina e beku ngkai i Amerika Maiaki. Natina te aine ae te karimoa, ae I rangi ni kinaa, e a tia n iein ae e matoatoa ana onimaki, e tibwauaia, “I aki namakinna ae tii tinara ni kaikawaira bwa e memena te Uea n taainako inanon mweengara. Ao ngkai e kaota ana koaua tinau nakoira Ibukina, ti moanna n rairaki nakoina ma oin ara titiraki. I kakaitau bwa e kaota nakoira aron kakawakin te euangkerio ma maiuakinana inanon maiura.”

Tariu ao mwaaneu, te tina ae tamaroa aei e kona ni karaoa mweengana bwa te tabo n reirei n te aro n tamnei. Ae ti te arona ma ana titiraki te I-Tiobia nakon Biribo, Mary e titirakinna i bon irouna n te tai ae mwaiti, “A na kanga natiu n reiakinna ngkai bon tii te tina ae riai ni kairiia?”

Raou aika a tangiraki inanon te euangkerio, I kakoaua nakoimi bwa ngkana ti aki manikangare, ma nanora, ae matoa ao ae koaua n ukora n reiakina ana euangkerio Iesu Kristo ao n reirei imarenara ma te kaantaninga ae koaua ao iaan ana kairi te Tamnei, anga reirei aikai a na kona ni bitii naano ao ni kaungaa te nano ni maiu ni kaineti ma ana koaua te Atua.

I kakoaua bwa Iesu Kristo bon te Tia Kamaiua te aonaaba. Boni Ngaia te Tia Kabooa maiura, ao E maiu. I ataia E kaira Ana Ekaretia rinanoia Ana burabeti, taan mamata, ao taan kaotioti. I kakoaua naba nakoimi bwa e maiu te Atua, bwa E tangiriira. E tangiria bwa ti na Oki nakon mweengana—ngaira ni kabane. E ongo ara tataro. I kaota au koaua Ibukin koaua aikai n aran Iesu Kristo, amen.