Unimwaane Rubén V. Alliaud
Mataniwi ni Kabuta n te Itingaun
Rubén Alliaud bon 14 ana ririki ngke e kiitana mweengana i Argentina bwa e na kabanea ana ririki ma ai tamana n te United States. Ana karo, Rubén Reynaldo Alliaud, e a kaman mate mai imwaina, ao Rubén e a karikirakea “te tamnei ni kakaitara.”
Tinana e rang n raraoma irouna, María, e kanakoa nako Houston, Texas, bwa e na maeka ma mwanena, Manuel Bustos, ao ana utu. E bubuti teuana aroia ana utu mwanen neiei: “Bon tai tibwa ana koaua ami Ekaretia nakon natiu.”
Tamnein te euangkerio, ni kaitaraana, e katika nanon te kairake ae rinanon te kangaanga. E mataku n aron te Ekaretia ni katiteuanaia ana utu Bustos rinanon te tataro ao te mwakuri n ibuobuoki, ao e aki kona n taona nanona n nooran mwaitin Ana Boki Moomon iaon te kai inanon ana ruu.
Ni kan atatai, e katika teuana te boki ao e kunea ana berita Moronaai are e kona iai n ataia rinanon te tataro bwa ana Boki Moomon e bon koaua.
“Te berita anne e riinga nanou,” e taekinna te Itingaun ae tibwa weteaki. “I tangiria ni kan wareka te boki.”
E kawakinna inanona ana berita Moronaai, e karekea te akea ae matoa, a e tuanga ai tamana are e rang tounako irouna bwa e tangiria ni kan bwabetitoaki. Ai tamana Manuel e waekoa ni kaoka Rubén nako Argentina bwa e na karekea ana kariaia tinana. E waekoa ni bwabetitoaki. Mai ikanne, te euangkerio are e kaokaki e tiku inanon maiun Unimwaane Alliaud.
Rubén Vicente Alliaud e bungiaki n Tianuare 8, 1966, i Buenos Aires. E mareaki ma Fabiana Bennett Lamas n te Buenos Aires Argentina Tembora n Ritembwa 17, 1992. A karekeia natiia aika onoman.
Unimwaane Alliaud e karekea ana tikurii n te tua man te Uniwetiri mai Belgrano, i Buenos Aires, ao e a tia ni karekei kabwaiana n rabakauna iaon te tua, onoti iaon te tua ni kaburebure. Man 1998 e a tia ni mwakuri bwa te manatia n ikatoatoa ibukin Alliaud & Asociados.
E a tia n riki bwa te Itingaun n te Aono, beretitenti n te Argentina Córdoba Mition, beretitenti n te titeiki, kauntira ae rietata, bitiobi, beretitenti n te kooram n unimwaane, ao te mitinare n te Uruguay Montevideo Mition. N ana tai ni beku, e riki bwa te tia reirei n te Intitiute, moan kauntira n te beretitentii n aia Tienta ni Kataneiai Mitinare i Argentina Center, ao tarekita n te bwaburiki abeati.