Te Korakora n te Kamatoa ae Onimaki

N angin te tai I ongoraa n aia kakaitau taan kairiiri n te nakoanibonga ibukin te kamatoa are a kakorakoraki iai mai irouia naake a beku ibukiia. Ma te namakin inanon bwanaaia, ko ataa aia kakaitabu bwa e nano ao e koaua. Au botoniango n te bong aei bon uotan ana kakaitau te Uea ibukin kamatoaakiia Ana toro inanon Ana Ekaretia. Ao bon kauangaakimi naba bwa kam na kamwakuria ao n rikirake inanon te korakora anne ni boutokaia tabeman ma am onimaki.

Imwaain bungiakim, ko kaota te korakora anne. Iangoia bwa teraa ae ti ataia n te aonaaba n tamnei imwaain te maiu ae mamate. Tamara are i Karawa e kaota ana babaire ibukiia Natina. Ti bon mena ikekei. Rutibeero, tarira n tamnei imwaain te maiu aei, e kaitaraa te babaire are ti na karekea te inaomata n rinerine. Iehova, Natin Tamara are i Karawa ae Tangiraki, e boutokaa te babaire. E kaira te kakaitara Rutibeero. Reitinakon ana boutoka Iehova ibukin tokanikaina n ana babaire te Atua, ao E anganano n riki bwa ara Tia Kamaiu.

Te koaua bwa ngkai ko mena n te maiu ae mamate e a anganira te kakoaua bwa ko boutokaa te Tama ao te Tia Kamaiu. E aanaki n te onimaki inanon Iesu Kristo ni kamatoaa te babaire ni kakukurei ma taben Iesu Kristo iai ngke e karako am atatai ni kaangaanga ake ko na kaitara ma ngaai n te maiu ae mamate.

Am onimaki ni kamatoaia ana toro te Atua e a tia n riki bwa oin reken kukureim n te maiu aei. Ngkana ko butimwaea aia kakaewenako mitinare n tataro ni kan ataia bwa ana Boki Moomon bon ana taeka te Atua, ko karekea te onimaki ni kamatoaa ana toro te Uea. Ngkana ko butimwaea te kakao ni bwabetitoaki, ko kamatoaa ana toro te Atua ae nanorinano.

Ngkana ko kariaia temanna ni katokai baina iaon atuum ao ni kangai “E reke iroum te Tamnei ae Raoiroi,” ko kamatoaa ngkai ngaia kaain te nakoanibonga ae te Merekitereka.

Man te tai anne, ko a tia, ni kakaonimaki ni beku, ko kamatoaia aomata nako ake a anganiko te nakoanibonga ao ake a tia ni katabuko nakon te nakoa n te nakoanibonga.

Ni moan am taneiai n te nakoanibonga, te kamatoa n tatabeua bon te bwai ae bebete n onimakinan ana toro te Atua. Ngkai, angiina mai buakomi a rikirake nakon te tabo are e a kainnanoa riki te kamatoa ae bati.

Ko rineia ngkana tao ko na kamatoaia aomata ni kabane ake a weteaki iroun te Uea—n nakoa are a weteaki iai iroun te Uea. Te rinerine anne e riki n taian maungatabu ni kabutaa te aonaaba. E a tia n riki n te maungatabu aei. Inanon bootaki n aron aei, araia mwaane ao aine—ana toro te Atua—a warekaki ao ko kaoaki bwa ko na katea baim ni kamatoaia. Ko kona n aki kariaia n am rinerine ni kamatoa, ke ko kona n anga am kamatoa n onimaki n am berita. Ni katean baim ni kamatoa, ko karaoa te berita. Ko karaoa te berita ma te Atua, bwa aikai ana toro, bwa ko na kamatoaia.

Aikai bon aomata aika a aki tau, n ai arom naba. Kawakinan am berita e kainnanoa te onimaki ae aki bibitaki bwa te Uea e bon weteiia. Kawakinan berita akanne e na karekea te kukurei ae akea tokina. N aki kawakin e na uota te rawawata nakoim ao naake ko tangiriia—ao ni kabuaa naba are e riaon riki am konabwai are ko iangoia.

Ko a bae n tia n titirakinaki, ke ko na bon titirakinaki, ngkana tao ko kamatoaa am bitiobi, beretitenti n te titeiki, Mataniwi ni Kabuta, ao Aobitia ni Kabuta n te Ekaretia. Ko na bae n tuangaki ni kamatoaia aobitia ao taan kairiiri n te maungatabu. N tabetai ko na titirakinaki n tain te intawiu iroun te bitiobi ke te beretitenti n te titeiki.

Au reirei bwa ko na bon titirakiniko i bon iroum titiraki akanne imwaain taai aikai, ma te iangoraoi ao te nano n tataro. Ngkai ko karaoia, ko na bae n iangoa am iango, am taeka, ao am mwakuri ake mai imwaaina. Kataia uringnga ao iangoa te kaeka ae ko na anga ngkana e intawiuniko te Uea, n ataia bwa n tetaina ao E na bon karaoia. Ko kona ni katauraoiko ni bon titirakiniko titiraki n aron aikai:

1. I iangoa ke n taekina mamaaran te aomata irouia aomata ake I berita bwa N na kamatoaia?

2. I a tia ni kakaea te kakoaua ae te Uea e bon kairiia?

3. I a tia n iriira aia kairiiri inanon te iango ni karaurau ao n te kakaonimaki?

4. I a tia n taekina ni kakoaua ae I nooria bwa bon ngaiia ana toro te Uea?

5. I tataro ibukiia ni katoa bong n araia ma namakinan te tangira?

Titiraki akanne, angiina mai ibuakora, a na kairiira nakon te aki mweengaraoi ao e kainnanoa te rairannano. Ti tuangaki iroun te Uea bwa ti na aki motikitaeka n te aro ae e kairua, ma ni maiuakinana ti kunea bwa e kaangaanga totokoana. E kuri n ae n angiin bwaai ni kabane ake ti karaoi ni mwakuri ma aomata e karaoira bwa ti na ukerii aroia. Ao e kuri n ae n iteran maiura ni kabane, ti kabootaui arora ma tabeman. Ti kona ni karaoia n iai bukina aika a mwaiti, tabeua a bon tau, ma n angiin te tai e kairiira nakon kaotan ae ti na aki kariaia.

E anga te kauring Beretitenti George Q. Canon ae I kabwarabwara nakoimi n aron ae I taekina i bon irou. I kakoaua bwa e taekina te koaua: “Te Atua e rineia Ana toro. E anaia bwa inaomatana ni kabuakakaia ngkana a riai ni kabuakakaaki. E aki anganiira te inaomata n tatabemaniira n tiribureiia ke ni kabuakakaiia. Akea te mwaane, n aki tabe bwa korakorara ana onimaki, n aki tabe bwa tera nakoana ma kariaiakana are e karekea n te nakoanibonga e konaa ni kabuakaka are e a tia ni kabiria te Uea ao n tiriburea ana kariaia te Atua iaon te aba ni karika Aki kukureina. E na nako te Tamnei ae Raoiroi mairoun te mwaane anne, ao a na akea uaan te Tamnei ae Raoiroi irouna. Aio ae e na riki, ko aki noora kakawakina bwa ti na riai n taratara raoi?”¹

N taraakina irou bwa kaain te Ekaretia ni kabuta te aonaaba a kakaonimaki i bon imarenaia ao nakoia naake a tararuaaki irouia. E ngae n anne, iai, te nakoraoi ae ti konaa ao n riai ni karaoi. Ti konaa ni karaoa ae tamaroa riki inanon korakorara ni kamatoaira i bon imarenara. E na anaa te onimaki ao te mwakuri. Aikai aua iango ae I karaoi bwa ti na mwakuriia n te maungatabu aei.

1. Ti konaa ni kinai mwakuri aika a onoti ake a taekinna taan taetae ao moanna mangkai ao karaoi mwakuri akanne. Ngkana ti karaoia, korakorara ni kamatoia e na rikirake.

2. Ti konaa n tataro ibukiia ngkai a taetae bwa te Tamnei ae Raoiroi e na karin marooro aikai inanoia aomata ake ti tangiriia ao n riingaki inanoia. Ngke ti ataia imwiina bwa a kaekaaki ara tataro, e na rikirake korakorara ni kamatoaia taan kairiiri akanne.

3. Ti konaa n tataro bwa taan taetae aika a onoti a na kakabwaiaki ao ni kanakoraoaki aroia ngkai a anga aia marooro. Ngke ti nooria bwa a kanakoraoaki aroia, ti na rikirake inanon te onimaki ni kamatoaia, ao e bon teimatoa.

4. Ti konaa n ongoraa n aia marooro taan taetae are a roko bwa kaekaan ara tataro aika a onoti ibukin buokara. Ngkana e roko te kaeka, ao a bon roko, ti na rikirake inanon ara onimaki ni kamatoaia ana toro te Atua ni kabane.

N reitia ma kanakoraoan ao kamatoaakiia naake a beku n te Ekaretia, ti na ataia bwa iai riki te tabo are ti konaa n rikirake inanon te korakora anne. Ikanne, e konaa ni uoti kakabwaia aika a korakora nakoira. Bon inanon te mweenga ao n te utu.

I taetae nakon te tia taua te nakoanibonga ae e maeka ni mweengana ma tamana. N na taekina nakoimi are I a tia n rinanona bwa tera ae nanonaki ibukin te karo are e namakina am kamatoa n onimaki. E taraa n onimakiniko. Ma e rinanon riki kaangaanga nakon ae ko ataia. N tabetai e aki konaa ni karekea angan katokan te kaangaanga are imwaaina.

Am karinerine e na buokiia teutana. Am tangira ibukina e na buokia riki. Ma te bwai ae te kabane n ibuobuoki bon taeka aika a koaua n aron aikai: “Tamau, I tataro ibukim, ao I namakinna bwa e na buokiko te Uea. A na bon nakoraoi bwaai ni kabane. I ataia e na bon nakoraoi.”

Taeka n aron akanne iai naba korakoraia n ae ti te arona, te karo nakon natina te mwaane. Ngkana iai te kairua ae kakaiaki ae e karaoia te nati te mwaane, tao n te aro n tamnei, e na bae n namakinna bwa e kabwaka. Ngkai tamana, inanon te tai anne, ko bae ni miimi ngkana, imwiin am tataro ni kan ataia bwa tera ae ko na karaoia, e kaunga nanom te Tamnei ae Raoiroi ni kangai: “Natiu, I boutokaiko n aki tabe ma tera. E tangiriko te Uea. Ma Ana ibuobuoki, ko konaa n okiria. I ataia bwa ko konaa ao ko na bon konaa. I tangiriko.”

N te kooram n te nakoanibonga ao n te utu, karikirakean te onimaki ni kamatoaira i bon imarenara bon te kawai are ti katea iai Tion are e tangiria te Uea bwa ti na karaoia. Ma Ana ibuobuoki ti konaa, ao ti na bon konaa. E anaaki n te rabakau n tangira te Uea ma nanora, marurungira, ara iango ao korakorara ni kabane, ao n itangitangiri ngkai ti bon tangiriira i bon iroura.

Ngkana ti rikirake inanon ana tangira Kristo ae itiaki, a kamarauaki nanora. Te tangira anne e na kananorinanoira ao rairinanora. Ara onimaki iroun ara Uea ao i bon imarenara e na rikirake. Ao ngkanne ti na rikirake n riki n teuana, n aron are e a tia ni berita te Uea bwa ti konaa.²

I kakoaua bwa te Atua te Tama e atai ngkami ao e tangiri ngkami. Iesu bon te Kristo ae maiu. Aio Ana Ekaretia. Ti taua Ana nakoanibonga. E na karinei ara mwakkuri n rikirake inanon korakorara ni kamwakuria ao ni kamatoaira i bon imarenara. I kakoaua n aran Iesu Kristo ae tabu, amen.