Ana Mwakuri n Ibuobuoki Beretitenti Nelson e Reitinako

Tamnei

Beretitenti ao Titita Nelson a rabwatiia ataei

Bon imwiin te maungatabu ni kabuta n Okitobwa 2018, Beretitenti Russell M. Nelson e mwananga nako Peru, Bolivia, Paraguay, Uruguay, ao Chile, ike e kaitibo iai ma kain te aro ao mitinare ao e karaoi bootaki n taromauri, n raonaki ma taromauri ibukiia kairake i Chile are a iria 1,500 ao ni manga kanakoaki n te kanakobwana n te aba. E taetae nakoia membwa i Tibein, katabua te Concepción Chile Tembora, ao e kaitibo ma taan kairiiri n te tauteka n te tabo.

Ngaa ma nga aine ake a kaeka iaon bwaai n reitaki nakon ana kakao Beretitenti Nelson bwa a na ribooti iaon bwaai ake a rinanona ma aua kakaewenako ake e anga n tain te maungatabu ni kabuta n Okitobwa 2018: (1) aki mamatam man kabonganaan bwaai n reitiaki ao kaitara ibukin 10 te bong, (2) wareka ana Boki Moomon imwain banen 2018, (3) kateimatoa te roroko n te tembora, ao (4) irii waaki ni kabane n te Bootaki n Aine. “I kan karabwai ngkami ni kabane ibukin butimwaean au kakao,” e taku Beretitenti Nelson, ni kaota te kantaninga are “kakao ni kabane aikai a tia ni kaani riki ngkami nakon te Tia Kamaiu.”

Beretitenti Nelson e kaira te taromauri n taunimwane ibukin natina te aine, Wendy Nelson Maxfield, are e motirawa imwiin korakaina ae ninikoria n aorakina te kaentia. “Ranin matara n nanokawaki e na bitaki nakon rannimata ni kukurei ngkai ti karekea te kantaninga ae akea tokina,” e taku. E taekina natina te aine n tain te maungatabu ae onoti ibukiia membwa n te Chico California Titieiki, ake a kairaki inanona uoua iunite man Paradise ake a uararake n te ai. “Kam ataia bwa aomata ni kabane iai aia kanganga,” e taku. “Ngkana ko tangiria n namakina te kukurei, mwaninga taekam ao buoka temanna.”

I Arizona, USA, Beretitenti Nelson e kaoia te koraki ae riaon 65,000 membwa bwa a na ikotaki n te tabo n takakaro bwa a “na buoka ikoikotakiia Iteraera ni kauoua iteran te rabuna.” Beretitenti Nelson e koroboki naba n te kaoram ibukiia iruwa are e boretiaki n te Arizona Republic nutibebwa ni kaungaia aomata “bwa a na taratara [te Uea] ao kabotoa maium iaona.” E iri intawiu n tabo ni kanakobwana n terewition n titeiki; butimwaea kawarana irouia te botanaomata, reirei, ao taan kairiiri n aro, ao e karaoi titiraki ma kaekaaia ibukiia kairake ake a tuai iein.

Imwiin katabuana n Tianuare 14, 2018, Beretitenti Nelson e a tia ni kawari 5 kaontenante, 16 reeti n aomata ao taabo, ao 24 kaawa aika bubura, ni mwananga tabeua 55,000 te maire (88,515 km).