Jan E. Newman
Kauoman ni Kauntira n te Reirei n Taabati n te Beretitentii ni Kabuta
Ngke te kairake ni mitinare ae beku i Strasbourg, France, Jan E. Newman e rinanon te taneiai n tamnei ae onoti are e kakorakora ana koaua ao e namakina ana tangira Tamana are i Karawa. Te taneiai aei e roko ngke e wareka ana taeka te burabeti are Aramwa n ana Boki Moomon iaon unikan koraan te euangkerio inanora (taraa Aramwa 32:28; 33:22–23).
“I warekia bwa ngkana ko karekea nnen te kora n unikia inanom, e na rikirake, ao n tokina ko na namakina bwa a tabe n rikirake,”e taku te Tari Newman. “I uringa warekan anne ao te Tamnei e kakoaua nakoiu n te aro ae korakora bwa e bon koaua. I namakin anne bwa e rikirake inanou. I bon aki kona ni mwaninga anne inanon bongin maiu.”
Aio ao taneiai ake tabeua a buoka kamatoan ana koaua te Tari Newman n te euangkerio ao ni katauraoia ibukin te mwakuri inanon maiuna bwa te kainnaba, karo, ao ana reirei Iesu Kristo.
Jan Eric Newman e bungiaki n Eberi 16, 1960, i Jerome, Idaho, USA, nakoia George Raymond ao Dora Walker Newman. E ikawairake i Overton, Nevada, USA. Tamana e rairaki nakon te Ekaretia, ao tinana ea bon maan inanon iraua te roro n riki bwa aika Itiaki ni Boong aika Kaitira.
E karikirakea ana koaua ngke e kairake ao e beku bwa te mitinare ae bwanin ana tai i France ao Belgium. Imwiin ana mition, te Tari Newman e karekea ana baetura tikurii n te taetae ni Buranti man te Brigham Young University. E rang kukurei n ana tikurii n te aro are e kan riki bwa te tia reirei n taetae ni Buranti n onean mwiin karekan nakoana n te tabo ni karaobwai iaon tiaobitiuea. E riki bwa te tia kabobwai ao e reitinako ni karekei iango aika a boou iaon te karaobwai are e raka iaon 30 te ririki, ni kunei tabeua tiaobitiuea aika a nakoraoi ibukin kambwana. N te tai aei, e riki bwa raon SageCreek Partners, te kambwana ni karaobwai i Alpine, Utah.
Te Tari Newman e mare ma Lucia Price n te Oakland California Tembora n Aokati 18, 1984. A riki bwa kaaro irouia natiia aika onoman ao a maeka i Elk Ridge, Utah.
Te Tari Newman e a tia n riki bwa te beretitenti n te titeiki, bitiobi, beretitenti irouia Kairake n Ataeinimwaane, Te tia Kairiiri n te tikauti, ao te tia mwakuri n te tembora. Man 2006 nakon 2009, e beku bwa te beretitenti n te Nebraska Omaha Mition.