N Tauraoi ni Karekei Bwaai Nako aika Kainnanoaki

Unimwaane Carig C. Christensen e raonai tabeua te tai n teuana te maungatabu are ibukiia taan kairiiri n te nakoanibonga, ao e kabonganai uoua titiraki aika bebete ni kamataata te reirei are e kabotoaki n te mwenga man boutokaaki n te Ekaretia. E taekinna bwa irarikin are ti oki rikaaki nakon mweengara man te Taromauri n te Tabati ao n titiraki,“Tera ae ko reiakinna iaon te Tia Kamaiu ao Ana euangkerio n te bong aio n te Taromauri?” ti riai n titiraki n bootakin te Ekaretia, “Tera ae ko reiakinna iaon te Tia Kamaiu ao Ana euangkerio n te wiiki aio ni mwengam?” Kawakinan raoi te Bong are te Tabati, te karikiram ae boou, ao bairean tain te taromauri are e bitaki a bane ni buokiira n reiakina te euangkerio ni mweengara ao n te taromauri naba.

Membwa nako n Ana Ekaretia Iesu Kristo Ibukiia Aika Itiaki ni Boong aika Kaitira iai tabeia ae onoti n reiakina man maiuakina ana reirei te Uea ao ni karekei man te Kariaia ae eti otenanti ni kamaiu ao te karietataaki. Ti riai n aki kantaningaa te Ekaretia ngkai te bootaki ngaia bwa e na reireiniira man tuangiira bwaai ni kabane ake ti kainnanoi bwa ti na atai ma ni karaoi n riki bwa taan iriiria aika kakaonimaki ao n teimatoa n ninikoria ni karokoa te toki.² Ma, tabera ae onoti bon te reirei bwa tera ae ti riai n reiakinna, maiuakinan te maiu are ti bon ataia bwa ti riai ni maiuakinna, ao te riki bwa aomata are e kantaningaia te Matita ibukira. Ao mwengara bon te tabo ae rangi n tamaroa ibukin te reirei, maiuakinana, ao rikira.

Ngke e ataei, Iotebwa Timiti e reiakina taekan te Atua n ana utu. Ana mwakuri ni ukora ana kaantaninga te Atua ibukina e kaira Iotebwa nakon kakaean te koaua irouia aaro ni kiritian aika kakaokoro, botumwaaka n kamwatebwaii koroboki aika tabu, ao te tataro ma te nano nakon te Atua. Ngke e oki Iotebwa Timiti te ataei nakon mwengana man te Buakonikai ae Tabu bon imwin raoi kaotin te Tama ao te Nati, e taetae moa nakon tinana. Ngke e “raraa te tabo n ai, [tinana] e titiraki bwa tera te kangaanga. E kaeka[Iotebwa], ‘Tai raraoma, a bane n nakoraoi—I bon nakoraoi.’ [E] taku ngkanne nakon [tinana, ]‘I a tia n reikinna i bon ibukiu.’”³ Te bwai ae rinanona aio Iotebwa e kaota te baeten ae korakora iaon te kamatebwai are ti riai ngaira n tatabemaniira ni katotoonga. Ngaira naba ti kainnanoia bwa ti na kamatebwai i bon iroura.

Te moan oi ibukin ana babaire Tamara are i Karawa bwa a na riki Natina n ai Arona. Ibukin anne, E anganira taai aika kakaawaki n rikirake man tamaroa riki. Ara motinnano n reirei man maiu ni kaineti nakon te koaua e rikirake kakawakina n te aonaaba ae e mena n te“mangaongao”⁴ ao n rikirake iai te mangaongao ma te buakaka. Ti aki kona ni kantaningaia bwa man kaen ara taromauri n te Ekaretia ao n iran burokuraem ao ti a karekei naba ni kabane kakorakoraan tamneira ao te kamanoaki are e na anganira te kona n “okiia nako n te bong ae buakaka .”⁵

“Kaaro iai tibwangaia ae tabu n tararuaia natiia n te tangira ao te raoiroi.”⁶ Taan kairiiri n te Ekaretia, taan reirei, ao mwakuri aika kairaki iroun te Tamnei e buoka aia waaki aomata n tatabeman ao utu ni kakorakorai tamneia. Ao e ngae ngke ti bane ni kainnanoa te ibuobuoki n roko i moa iaon kawain te berita, tabera ae moan te korakora ibukin karikirakean te tamnei te korakora ao te reitinako n tamneira e mena i aora ni kabane.

Uringa bwa e kanga Nibwaai, are natin te burabeti ae Riaai, n tangiria n nora, n ongo, man ataia i bon irouna man mwaakan te Tamnei ae Raoiroi bwaai ake e noori tamana n te mii ibukin te kai ni kamaiu. Nibwaai e bon kainnanoia ao e kakabwaiaaki n ana tai n rikirake man aia katooto ao aia reirei ana “karo aika raoiroi.”⁷ Ma, n ai aron Iotebwa Timiti, E tangiria n reiakinna man ataia i bon irouna.

Ngkana baike kam atai ao ake I atai iaon taekan Iesu Kristo ao Ana euangkerio ae kaokaki e reke man te bwai are a taekinna aomata nakoira, ngkanne aan ara onimaki i Rouna ao Ana mwakuri ni Boong aika kaitira ae mimitong e kateaki iaon te tano.⁸ Ti aki kona n onimakina ke n tangoa ootan ao rabakun te euangkerio mai irouia tabemwaang—n ikotaki ma naake ti tangiria man onimakiniia.

Ae kakaawaki, E reirei te burabeti Iotebwa Timiti bwa membwa nako n te Ekaretia a riai ni karekea oin maataataia n “ana babaire ao ana kaantaninga te Atua n rokora nakon te aonaaba aio.”⁹

“E ngae ngke ti kona ni wareka ao n oota ni koroboki nako ake a tia ni koreaki man ana bong Atam, n ana reitaki te aomata nakon te Atua ao anera n te rabwata n taai aika a na roko, e na bon uarereke ara atatai iaona. Warekan rongorongoia tabeman, ke te kaotioti are e roko i Rouia e bon aki kona n anganira te atatai ae abwabwaki iaon arora ao ara reitaki raoi nakon te Atua. Te ataibwai iaon bwaai aikai e ti kona n reke man te bwai ae ti rinanona rinanon ana otenanti nako te Atua ake a kaotaki ibukin te kaantaninga anne.”¹⁰

Bwa e aonga ni koro nanon te kaantaninga ae korakora aio ibukin te tamnei ibukiia aomata n tatabemaniia ao utu bon teuana mai buakon bukina ngkai burokuraem ao mwakuri n Ana Ekaretia Iesu Kristo Ibukiia Aika Itiaki ni Boong aika Kaitira a moanna riki ni boboto n te mwenga ao man boutokaaki n te Ekaretia n te tai ae onoti aei ni koron te bong.

Kariaia bwa N na kakimototoi tabeua mwiin reiakinan te euangkerio n rikirake n boboto n te mwenga man boutokaaki n te Ekaretia.

Te tabo ni kataneiai ibukia mitinare ae te moan e bon mena ni mwengara, te kauoua n tabo ni kataneiai ibukia mitinare a mena i Provo, i Manila, i Kaawan Mexico, ao n taabo riki ake tabeua. Ara kiraati ibukin te Reirei n Tabati ae rangi ni bwarabwara e riai ni bon ara kamatebwai i bon iroura ao n te utu n ara tabo ni maeka; kiraati aika kakaawaki n te Reirei n Tabati ae te kauoua a karaoaki n ara tabo n taromauri.

Tienta ibukin te Tabo n riki a mena ni mwengara. Te boutoka ae raka ibukin te mwakuri ni kakae n ara tabo n riki e tauraoi naba n ara tabo n taromauri.

Te kiraati ae kakaawaki n te katauraoi nakon te tembora e karaoaki ni mwengara; kiraati n te katauraoi nakon te tembora aika kakaawaki ma tiaki tenaan moan a kona naba ni karaoaki tabetai n ara tabo n taromauri.

Karikan mwengara bwa taabo aika mano man tabu ike ti kona iai n “tei n taabo aika tabu”¹¹ e kakaawaki ni boong aika kaitira. Ao ngkai e kakaawaki reiakinan te euangkerio ae boboto n te mwenga man boutakaaki n te Ekaretia ibukin korakoran tamneira ao kamanoara ni boong aikai, e na bon nang kakaawaki riki n taai aika a na roko.

Taiaoka taraia bwa e kanga reirein te “boboto n te mwenga man boutokaaki n te Ekaretia” n kananonaki nakon ara katauraoi ae onoti ao taura ni karekei otenanti aika tabu ma berita aika tabu n ana auti te Uea.

Eng, te katauraoi nakon te tembora e rianako korakorana ni mwengara nako. Ma e mwaiti kaain te Ekaretia a nanououa bwa tera ae riai ao ae aki n taekinaki ni kaineti ma baike a karaoaki n te tembora i tinanikun te tembora.

Beretitenti Ezra Taft Benson e kabwarabwaraa bwa bukin tera iai te nanououa aio.

“Te tembora bon te tabo ae tabu, ao otenanti ake i nanon te tembora a tabu naba aroia. Ibukin tabuna ao n tabetai ti aki kan marooroakina te bwai teuana ni kaineti ma te tembora nakoia natira ma tibura.

“Te bwai ae riki, e bati ae aki karekea te nano ae koaua n nakon te tembora, ke ngkana a karoko ikekei, a karaoia n akea aia atatai ni katauraoiia nakon katabeaki ma berita aika tabu ake a na karaoi.

“I kakoaua bwa te mataata ke te atatai ae eti e na bati ana ibuobuoki ni katauraoiia ara roronrikirake nakon te tembora … [ao] e na karikirakea i nanoia te nano ni ukori ana kakabwaia te nakoanibonga n aron are e ukoria Aberaam.”¹²

Uoua kairi aika bebete a kona ni buokiira ni karekea te mataata ae eti are e kabwarabwaraaki iroun Beretitenti Benson.

Kairi #1. Bukina bwa ti tangira te Uea, n tainako ti riai n taetae ibukin Ana auti ae tabu ma te karinerine. Ti riai n aki kaoti ke ni kabwarabwarai banna aika onoti ake a irekereke ma berita aika tabu ake ti karekei n waakin bootaki n te tembora aika tabu. Ti riai naba n aki marooroakina te rongorongo ae tabu are ti berita n ae onoti n te tembora bwa ti na aki kaotia nakoia tabeman.

Kairi #2. Te tembora bon ana auti te Uea. Bwaai ni kabane i nanon te tembora a kairiira nakon ara Tia Kamaiu, Iesu Kristo. Ti kona ni marooroakini oin te kataninga ao te reirei ma reirei aika tabangakai ake a irekereke ma otenanti ao berita aika tabu n te tembora.

E reirei Beretitenti Howard W. Hunter: “Ti na tibwauaia ma natira namakin man te tamnei ake iai iroura i nanon te tembora. Ao ti na reireiniia n ae bati riki ao ma te mwengaraoi bwaai nako ake ti kona n taekin n oin raoi ana auti te Uea.”¹³

N rooro nako man te Burabeti Iotebwa Timiti nakon Beretitenti Russell M. Nelson, te reirei iaon oin taian otenanti n te tembora ao berita aika tabu a tia n taekinaki ni kamatataaki irouia taan kairiiri n te Ekaretia.¹⁴ Te okai ae korakora ni bwaai ni ibuobuoki a tauraoi ni koroboki, ni bwanaa, tamnei, ao tabeua riki teia ni buokiira n reiakina taekan otenanti ni katauraoi, entaumente, mare, ao tabeua riki otenanti ni kabaebae.¹⁵ Te rongorongo naba e tauraoi iaon iriiran te Tia Kamaiu man karaoan ao kawakinan berita aika tabu ni kawakina tuan te ongotaeka, tuan te karea, tuan te euangkerio, tuan te itiaki, ao tuan te anganano .¹⁶ Ni kabane membwa n te Ekaretia a riai n atai bwaai aika tamaroa aikai ake a tauraoi iaon temples.ChurchofJesusChrist.org.

Tamnei

temples.churchofjesuschrist.org

Beretitenti Russell M. Neson e kabwarabwaraa te baeranti ae moan te kakaawaki imarenan tabun taian botaki n te tembora ao te rongorongo ae kakaawaki iaon tembora ake a boretiaki iroun te Ekaretia bwa a eti, a tau, ao a tauraoi nakoia aomata.nako. E kabwarabwara: “I kaungaa bwa membwa … a warekii koroboki ake n te Rikitinare n te Baibwara aika a irekereke ma te tembora n aron ‘Kabira,’ ‘Berita ae Tabu,’ ‘Karea,’ ao ‘Tembora.’ E kona temanna ni kan wareware Te Otinako mwakoro 26–29, ao Warekaia Iteraera, mwakoro 8. Te O Tetemanti, ai uana naba ma ana boki Mote ao Aberaam ni Bwaeao ae Bati Boona, e kaoti mwakuri n te tembora ake iai ma ngkoa ao aron otenanti aika akea tokiia.”¹⁷

Tamnei

Te witeo ni Kunnikain te Tembora ae Tabu

Ngaia are, iangoia bwa e titiraki natim te mwaane ke te aine, “E taku temanna n te reirei bwa iai te onea ae kamiimi ae bwainaki n te tembora. E koaua anne?” Te witeo ae kimototo e tauraoi iaon temples.churchofjesuschrist.org ae atuunaki “Sacred Temple Clothing.” Te witeo ae rianako aio e kabwarabwarabwa aroia mwaane ao aine ma ngkekei ni butimwaea te katangitang ae tabu, aekakin nako tataro, onea n taromauri aika a kanikinaeaki, katean kain tenaan kanikina, ao mwakuri aika tabu ni kaota aia namakin ae onoti ni kakaonimaki nakon te Atua. Ngaia are, te Ekaretia e boutokaa te katauraoi ae boto n te mwenga ibukin ana kakabwaia te tembora aika mimitong rinanon te kaetieti ae bebete ao bwai ni ibuobuoki aika tamaroa n aron te witeo aio. E bati te rongorongo ae bongana ae tauraoi nako imi.¹⁸

Ngkana ti kabanea ara kona ni mwananga n te nimamannei n Tamnein te Uea,¹⁹ ti na bon kakabwaiaaki n oota ma ni karekea te baeranti ae riai bwa tera ae tau ke ae aki ni marooroakinaki n otenanti ao berita aika tabu n te tembora.

I taku bwa e koaua ae tabeman mai iroumi a aki koaua ngkana e bon kona kamatebwaian te euangkerio n kabotoaki n te mwenga mani boutokaaki n te Ekaretia. Tao ti ngkoe te membwa n te Ekaretia ni mwengam, ke e aki boutokaiko kainnabam, ke e a tia ni motirawa kainnabam, ke ko maeka ti ngkoe bwa ngkoe kaain te aro ae ko tuai iein ke ko raure, ao tao iai am titiraki bwa a na kanga reirei aikai ni kaineti nako im. Tao ngkamii buumwaane ao buuaine aika a itaramata man titiraki, “Ti kona ni karaoa aei?”

Eng, kam kona ni karaoia! I berita bwa kakabwaia aika a kakorakora a na reitinako n roko man kaoti ni maiumi. A na uki mataroa. E na oota te oota. E na rikirake am konabwai n reitinako ma te botumwaaka ao te tataonakinnano.

I kakoaua ma te kukurei bwa a na roko kakabwaia ngkai ti kabanea ara kona ni kakoroa nanon tabera ae onoti n reiakina man tangira ana euangkerio Iesu Kristo are kaokaki. Ti bon kona n “tauraoi ni karekei bwaai nako aika kainnanoaki.”²⁰ I berita man kakoaua n aran te Uea Iesu Kristo ae tabu, amen.