Unimwaane John A. McCune
Mataniwi ni Kabuta n te Itingaun
Ni moan nakoana n ana mwakuri ni bitineti, iai ana maroro Unimwaane John A. McCune ma ana bwaoti inanon are e a waekoa ni kakoauaaki bwa e aki bati n tau ana atatai te mwaane iaon rongorongon ana Ekaretia Iesu Kristo ibukiia Aika Itiaki ni Boong aika Kaitira. E titirakinaki Unimwaane McCune iroun ana bwaoti bwa bukin tera ngkai Aika Itiaki aki taenti ke aki kang kuuki.
“N te aro ae koaua I kakang kuuki,” Unimwaane McCune e tuanga ana bwaoti ma te moangare, e bubua birotona. “I taku n au iango bwa ko kairuruaira ma tabeman.”
Ngkai a maroro, Unimwaane McCune e kamataata te iango ae kairua ibukin te Ekaretia. Te maroro anne e kairiiri nakon maroro ake tabeua ibukin ana euangkerio Iesu Kristo ao ni kamatoaaki ibukin Unimwaane ni kakawakin te tatauraoi n taainako n tibwauaan te euangkerio.
“Ngaira ana reirei te Tia Kamaiu Iesu Kristo, n te tabo are ti mena iai, n taabo nako, te tai ane e reke,” e taku Unimwaane McCune. “Iai iroura mwakuri ao nakoa, ma a mena ikanne ibukin boutokakiia ara utu ao ni katikuira n aro ake ti na tibwaua iai te euangkerio. Anne moan katabeara ngkai ana reirei Iesu Kristo.”
John Allen McCune e bungiaki i Santa Cruz, California, USA, n Tuun 20, 1963, nako Clifford ao Joan Schulthies McCune. E ikawairake i Nyssa, Oregon, USA.
Imwiin ana mwakuri ni mtinare ae bwanin taina i Fukuoka, Japan, Unimwaane McCune e mare ma Debbra Ellen Kingsbury n te Salt Lake Tembora n 1984. Bon kaaro aika aman natiia ao a maeka i Midway, Utah, USA.
Unimwaane McCune e karekea ana baetiura tiaeanti n taekan te mwane mai Brigham Young University ao imwiina te mwaatita tikurii n tararuaan te bitineti ibukin taekan te mwane man te University i California, Los Angeles (UCLA). E mwakuri bwa te tiinia ni kuoman ni beretitenti ao te tarekita ni manatia ibukiia Aetuwaitia ibukin te Kabitare n te Karinmwane man 1997 nakon 2012. Imwiina e beku bwa te beretitenti ibukin Utah Provo Mition imwaain ae e riki bwa te tia angabwai ibukin bwaintangira ma Mweeraoi Aomata irouia Aika Itiaki.
E beku Unimwaane McCune bwa te Itingaun n Aono n te tai are e weteaki iai n nakoana ae boou. E a tia naba ni beku bwa te beretitenti n te titeiki, bitiobi, kauntira n te bitiobiriki ao n te beretitentii n te mwaanga, ao te beretitenti n te kooram n unimwaane.