Mwakuri ni Mitinare: Tibwa te Bwai Are i Nanom
Bwa n te tabo are ko mena iai n te aonaaba aio, e rangi ni mwaiti te tai n tibwa te rongorongo ae raoiroi ae ana euangkerio Iesu Kristo.
N te namakiaina ae e nako a bane ni kaoaki kain te ka Tengaun ma Uoman iroun ara burabeti ae tangiraki, Beretitenti Russell M. Nelson, ni mwananga ma ngaia nakon katabuan te Rome Italy Tembora. N tain te mwananga, I a iangoa aron te Abotoro Bauro n tain mwanangana. N ana tai ni maiu, te mwanaga mai Ierutarem nako Rom e na bon nakon ae tao 40 te bong. Ngkai, n te wanikiba ae e mamate nanou iai, e kee iaan 3 te aoa.
Taan rabakau iaon te Baibara a kakoaua bwa e korei angiin ana reta Bauro mai Rom, aika a rang kakaawaki ibukin kakorakorakiia membwa n te Ekaretia ngkekei n aron naba ara tai ae ngkai.
Bauro ao tabeman membwa n te Ekaretia ni kawai, Aika Itiaki ake kain te Ekaretia rimoa, a rangi ni mwatai n aron te anga karea. A mwaiti aika a bwainikirinaki n ae moan te korakora, tabeman ni karokoa a mate.
Inanon 200 te ririki n nako, kain Ana Ekaretia Iesu Kristo ae e kaokaki, Aika Itiaki ni Boong aika Kaitira a tia naba n rinanon te bwainikirinaki n aekaia nako. Ma e ngae ngke a bwainikirinaki (ao n tabetai ibon ibukina), Ana Ekaretia Iesu Kristo ibukiia Aika Itiaki ni Boong aika Kaitira e reitinako n rikirake ao e kona n noraki ngkai ni kabuta te aonaaba.
E Korakora te Bwai ae e na Karaoaki
Ma ngaia ae, imwain ae ti katauraoi ni bukamaru, ao ni bon katekeraoira ibukin te tokanikai ae korakora, ti riai n rangi ni mataata raoi n aron rikiraken te Ekaretia ao kakaawakina.
Iai ngkai ae tao nakon itiua ao te iterana te birion aomata n te aonaaba, ni kabotauaki ma ae 16 te mirion membwa n Ana Ekaretia Iesu Kristo ibukiia Aika Itiaki ni Boong aika Kaitira—te nanai ae e bon rangi n uarereke1
Ma n te tai aei, mwaitiia Kiritian ake a kakoaua ni iteran nako te aonaaba e a kerikaki2
Ae e reke naba n Ana Ekaretia te Uea ae e kaokaki—ngkai bwaninin tarakina e reitinako n rikirake mwaitiia membwa n te Ekaretia—e rangi n rawata membwa aikaa aki karekei kakabwaia ngkai a kaina te Ekaretia.
Ae e nanonaki bwa, n te tabo are ko mena iai n te aonaaba aio, e rangi ni mwaiti te tai n tibwa te rongorongo ae raoiroi3 ae ana euangkerio Iesu Kristo ma aomata ake ko kaitibo ma ngaiia, kamatebwai ma ngaiia, ni maeka, mwakuri, ke ni bobotaki ma ngaiia.
Inanon te ririki ae e nako, I a tia ni karekea te tai ae moan te kakukurei n rang n irekereke ma waakin te mwakuri ni mitinare n te Ekaretia n tabo nako. I a tia ni iangoia n tainako ao n tataro ibukin ana kakao ae korakora te Tia Kamaiu nakoia Ana reirei—ngaira, aika Natina—“ma ngaia ae kam na nako ni kakiritianiia botanaomata ni kabaneia, ni bwabetitoia nako nanon aran te Tama, ma te Nati, ma te Tamnei ae Raoiroi.”4
I korakai ni iangoa reken te titiraki “Ti na kanga ngaira, ae membwa ao ana reirei Kristo, ni kakoroa raoi nanon te kakao ae korakora anne i nanon maiura?”
N te bong aei I kaoi ngkami bwa kam na iangoa te titirake anne i nanomi ao n ami iango.5
Te Bwaintangira ibukin te Mwakuri ni Mitinare
Taan kairiiri n te Ekaretia a tia n rangi ni katuruturua te mwakuri ibukiia “Membwa ni kabane bon mitirare!” inanon ririki aika a mwaiti.6
Membwa n Ana Ekaretia Iesu Kristo—n taai ake ngkoa ao n ara tai—a tia n rangi ni ingainga ao ni kimwareirei n tibwaan te euangkerio ma raraoia ao nake a kinaia. E onrake nanoia n te kakatonga n aia koaua iroun Iesu Kristo, ao a tangiria ma nanoia bwa a na namakina naba te kimwareirei ae aekan are a tia ni kunea n Ana euangkerio te Tia Kamaiu.
Tabeman kain te Ekaretia e taraa n ae iai irouia te tarena aei. A tangiria ni kan riki bwa taan boutoka te euangkerio. A ninikoria ao a kukurei ni beku ao ni kaira waakin te mwakuri ni mitinare irouia membwa.
Ma e ngae n anne, iai mai ibuakora aika a aki koaua raoi iai. Ngkana e taekinaki te mwakuri ni mitinare inanon bootakin te Ekaretia, iai ake a katuturikaki atuia ni karokoa e a raba iakuun te kai n tekateka, ni katurua aia taratara iaon koroboki aika tabu ke kanga n rangi ni iango bwa ana aki kaitaraia membwa ake tabeman.
Bukin teraa e reke aei? Tao ibukina ae ti namakina te kairua bwa ti riai ni karaoa ae mwaiti riki n tibwauan te euangkerio. Ke tao ti aki koaua raoi bwa ti na kanga ni karaoia. Ke tao ti na namakina ae ti maku ni karaoan te bwai ae ti aki rangi ni mwengaraoi iai.
I mataata raoi n aei.
Ma uringnga, te Uea e bon aki kakaiia aika a wanawana, n rangi ni mwaatai ni karaoan te mwakuri ni mitinare. Ma, “te uea e kainnanoa te nano ao te iango ae tatauraoi.”7
Ngkana ko a kaman kukurei ni karaoa te mwakuri ni mitinare, taiaoka reitianako, ao n tei bwa te banna ni katooto nakoia tabeman. E na kakabwaiako te Uea.
Ma, ngkana tao, ko namakiniko bwa ko a tia n aki waekoa ni karaoia ngkana e a roko tain tibwaan rongorongon te euangkerio, I kona n anga nimaua bwaai ae ko aki namakina iai te nano ni kairua are e kona ni karaoaki ni ira buakon ana kakao te Tia Kamaiu ni buoka ikotakiia Iteraera?
Nimaua Iango aika a Bebete
Te moan, kaniiko ma te Atua. Te moan tua ae moan te korakora bwa ko na tangira Atuam.8 Bon anne bukina ae e aera ngkai ti mena iaon te aba. Titirakiniko, “I bon kakoaua raoi Tamara are i Karawa?”
“I bon tangiria ao n onimaki Irouna?”
Kaniiam ma Tamara are i Karawa, Otana ae bati ao te kimwareirei e na otanako mai iroum. Aomata tabeman a na nora ae iai te bwai ae onoti ao n okoro iroum. Ao are a na titiraki ibukina.
Te kauoua, kaona nanom n tangiraia tabeman. Aio te kauoua n tua ae korakora.9 Kataia iangoia raoi bwa aomata ake i rarikim bwa bon natin te Atua. Buokiia—e ngae ngke akea ibuoakon araia aine ao mwaane ake ko na karaoa te mwakuri n ibuobuoki nakoia.
Ngaare ma ngaiia. Kukurei ma ngaiia. Taang ma ngaiia. Karineia. Katokii aorakiia, kakorakoraiia, ao boutokaiia.
Keiaki katotonga ana tangira Kirsto ao nanoangakiia tabeman—nakoia naba nake aki karaoa ae raoiroi nakoim, ake a kamamaeko ao a tangiria ni kan kammarakiko. Tangiria ao karaoa ae raoiroi nakoia ngkai natin Tamara are i Karawa.
Te kateniua, kataia n nakonako ni kawaia ana reirei te Atua. Ngkai am tangira ibukin te Atua ao ibukiia Natina e rikirake, aron naba kamatoaan nanom n iriira Iesu Kristo.
Ko reiakinii Kawaina ngkana ko kakukureiko n Ana taeka ao ni ira ao ni karaoi nanon aia reirei burabeti ao abotoro n taai aikai. Ko rikirake n onimakiniira ao n ninikoria n iriira Kawaina ngkai ko reitaki ma Tamara are i Karawa ma te nano, ae ongeaba.
Te nakonako ni kawaia ana reirei ni koaua te Atua e tangira te kataneiai—n te bong koraki, teutana imwiin teutana, “te akoi ibukin te akoi,”10 te tua i aon te tua.”11 N tabetai te kekeiaki n rikirake e rinanon te tai ae waeremwe ao te korakai.
Te bwai ae kakawaki bwa ko aki bwarannano, ko keiaki ni karaoia bwa e aonga n eti. N te taina ko na nakoraoi iai, kukurei, ao n nanona raoi te kekeiaki n nakonako ni kawain ana reirei ni koaua te Atua. Te marooro ma tabeman ibukin am aro e na riki bwa ai anuam ao akea angana. Ni koauana, te euangkerio e nang riai n riki, ao ni kakawaki bwa iteran maium n te aro are ko na namakina ae kanga ko rawa ae ko na aki tataekinna nakoia tabeman. E na bon aki waekoa ni riki—bon kanoan te kekeiaki inanon maiura. Ma e na bon riki.
Te kaaua, tibwa te bwai are i nanom. I aki nanona ae kam na tei inanon kawai ma ami bwai n taetae ao n takaruai kiibu tabeua man Ana Boki Momoon. Te bwai ae I bubuti iai bwa kam na aki toki n kakaai taai ake ko na kona n taekina rongorongon am aro n angana ao n te kawai ae tamaroa ma tabeman aomata—tao ngkoe ma ngaia ke i aonrain. I bubuti bwa ko na “riki bwa te tia kakoaua”12 ni mwakan te euangkerio n taainako—ao ngkana e riai, kabonganai taeka.13
Ibukina bwa “te euangkerio… bon mwakan te Atua … ni karekea maiun te aomata ae onimaki” ko kona ni mweengaraoi, ninikoria, ao n nanorinano ngkai ko tibwatibwa iaona.14 Te mweengaraoi, ninikoria, ao te nanorinano bon aroaro aika a kanganga rekeia iroun temanna n teuana te tai, ma a bon aki kanganga rekeia. Anua a kaota ana kakao te Tia Kamaiu bwa ko na aki karabai bonganan te euangkerio ao reirei iaan te bwaketi ma ko na kaoti otara, bwa am mwakuri aika raraoi a na neboa Tamara are i Karawa iai.15
A mwaiti kawai aika a kakaraoaki ao a bon riki man karaoan aei, man karaoan mwakuri n akoi ni katoa bong nakon kaotan bwaai ake ko rinanona iaon te YouTube, Facefook, Instagram ke Twitter ke te marooro ae bebete ma aomata ake ko kaitibo ma ngaiia. N te ririki aei ti a reiakinaki man te Nu Tetemanti inanon mweengara ao n te Reirei n Tabati. Bon te tai ae tamaroa ni kaoia raraom ao kain rarikim nakon te taromauri ao ni mweengam n reiakina taekan te Tia Kamaiu ma ngkoe. Tibwauaia ma ngaiia te Gospel Library app, a na kanga ni kunea Nakomai, Iriirai. Ngkana ko kinaiia te roro ae rikirake ao aia utu, anganiia te boki ae Ibukin Kakorakorakiia te Roronrikirake ao kaoiia bwa ana roko n n noora aroia ara roronrikirake ni kekeiaki ni maiuakin reirei akanne.
Ngkana iai ae e titirakiniko bwa e uara kanoan am motirawa, tai maku n tuangiia te bwai are ko namakinna n tain te taromauri. Tuangiia aroia ataei aika a uarereke ake a tei i moa i mataia kain te taromauri ao n anene ma nanoia ao a kanga ni kataia n riki n ai aron Iesu. Tuangiia aroia kurubu n roronrikirake ake a kabanea aia tai ni buokiia kaara n aia auti ni maeka kaara ni korei oin rongorongoia. Tuangiia aron te bitaki ae e a tibwa tia ni karaoaki n aron bairean te bootaki n te Tabati ao e kanga am utu ni kakabwaiaki mai iai. Ke kabwarabwara bwa e aera ngkai ti rangi ni katuruturua bwa aio Ana Ekaretia Iesu Kristo ao bon ngaira aomata Ni Boonga aika Kaitira aika Itiaki, n aroia kain te Ekaretia rimoa ake a aranaki naba bwa aika Itiaki.
E a bon nakoim taraan ae kakaraoaki ao ae e bon riki iroum, n tibwaia ma aomata bwa bukin tera Iesu Kristo ao Ana Ekaretia a rang kakawaki iroum. Kaoiia bwa ana roko n noria.”16 Ngkanne kaungaia bwa ana roko ao ni ibuobuoki. E rangi ni mwaiti te anga ake a kona iai aomata n ibuobuoki n ara Ekaretia.
Tai ti tataro ibukiia mitinare bwa ana kuneia aika rineaki. Tataro ni katoa bong ma nanom ni kabane bwa ana reke ake ana roko n noria, roko ni ibuobuoki, ao roko ao n tiku ni matoa. Kaiririia mitinare ake e bwanin aia tai n am waaki. Ngaiia kanga ai aroia anera, a tauraoi n ibuobuoki!
Ngkai ko tibwa te rongorongo ae kakukurei, ana euangkerio Iesu Kristo, karaoia ma te tangira ao te taotaonanano. Ngkana ti reitaki ma aomata ma ara kantaninga ae rimwi a na karina iaoia te kunnikai ae mainaina ao n titiraki kawaia nakon te tabo ni bwabetito ae e kaan, ngkanne ti karaoia n angana ae kairua.
Tabeman ake a roko ao n noria, a na bae, n aki kaina te Ekaretia; ma tabeman ana kainna tao rimwi riki. Anne bon aia rinerine. Ma tiaki nanona ae e na bitaki ara tangira ibukiia. Ao e na aki bita aron ingaingara n ara mwakuri n reitanako ni kaoakiia aomata n tatabemaniia ao utu bwa ana roko ao n noria, n roko ao ni ibuobuoki, ao n roko ao n tiku ni matoatoa n te euangkerio.
Te kanimaua, onimakina te Uea bwa e na karaoa Ana kakai. Ataia ae tiaki tabem n rairiia aomata. Anne bon ana mwakuri te Tamnei ae Raoiroi. Tabem bwa ko na tibwa te bwai are ko namakinna i nanom ao maiuakina n tainako te bwai are ko kakoaua.
Ngaia are tai bwara nano ngkana temanna e aki butimwaea rongorongon te euangkerio n te tai ae waekoa. Bon tiaki te kabwaka man am itera.
Anne bon imarenaia aomata n tatabemaniia ma Tamara are i Karawa.
Tabem bwa ko na tangira te Atua ao tangiriia kain rarikim, aika Natina.
Kakoaua, tangiria, karaoa nanona.
Ira te aro aio, ao e na karaoi kakai te Atua rinanon am mwakuri ni kakabwaiaia Natina aika a kakaawaki.
Iango aika nimaua aikai a na buokiko ni karaoi baike a karaoi ana reirei Iesu Kristo n taai ake rimoa. Ana euangkerio ao Ana Ekaretia bon ngaia ae a kakawaki ni mwakoron maeum ao bwa antai ngkoe ao tera ae ko karaoia. Ngaia are, kaoiia tabeman n roko ao n noria ao n roko ao ni ibuobuoki, ao e na karaoa Ana Kamaiu te Atua, ao a na roko n tiku.
Ma Ngkana Arona bwa e Rangi ni Kanganga?
“Ma,” ko na bae n titiraki, “teraa ae e na riki ngkana I karaoi baikai ao aomata aki raoiroi aia kaeka? Ao ngkana a aki butimwaea te Ekaretia? Ao ngkana aikoa kan iraorao ma ngai?”
Eng, e na bon bae n riki anne. N taai ake rimoa, ana reirei Iesu Kristo a aki toki ni bwainikirinaki.17 E taku te Abotoro are Betero, “Ao ai antai … ae na bwainikiriniko ngkana ti bati n tangira te raoiroi”18 Aika Itiaki n taai ake rimoa a kakatonga “ngke a atongaki ba a riai ni kamamaeaki i bukin te Ara arei.”19
Uringa, e mwamwakuri te Uea n anga aika a kamimi. Tao am kaeka n aekakin katein Kristo nakon aki butimwaean am kakao tao bon ngaia raoi ae e karika maraun te nano ae matoatoa.
Ngkai ngai ana Abotoro Iesu Kristo I kakabwaiako ma te onimakinaki n riki bwa temanna ae maiuakini kawai are ko kaotia iai bwa ko kakoauai reirein te euangkerio ma te ninikoria ao n aki toki ni kinaaki bwa kain Ana Ekaretia Iesu Kristo ibukiia Aika Itiaki ni Boong aika Kaitira, ma te nanorinano ni buoka Ana mwakuri bwa kaotan am tangira nakon Tamara are i Karawa ao Natina ni kabane.
Raraou aika kam tangiraki, ko na kukurei n ataia bwa ko bon rangi ni kakawaki ni mwakoron te mwakuri ni ikotakiia Iteraera are e a kaman taekinaki, ni katauraoan rokon Kristo n te “mwaaka ao te mimitong ae korakora; ma anera aika tabu ni kabane.”20
Tamara are i Karawa e kinako. E tangiriko te Uea. E na kakabwaiako te Atua. Te mwakuri aei e katabuaki iroun te Atua. Ko kona ni karaoa aei. Ti kona ngaira ni kabane ni karaoi.
I kakoaua n aran Iesu Kristo, amen.