Fakaʻilekitulōnika Pē
ʻOku Toe Mahuʻingamālie Ange Kiate Au e Toetuʻú Mei ha Ako ki he Ngaahi Tukufakaholo Faka-Kalisitiané
Hili hono to‘o ha kalasi ʻi he ngaahi tui fakalotu ʻo e māmaní ʻi he kolisí, ne u ʻilo‘i te u lava ʻo ʻai ke toe mahuʻingamālie ange e toetuʻú ʻi heʻeku hoko ko e Kāingalotú.
Lolotonga ha fahaʻitaʻu fakaako ʻi he kolisí, ʻi heʻeku tangutu ʻi ha kiʻi fale fakatahaʻanga ʻo ako kau ki he ngaahi tui fakalotú ʻi he māmaní, ne u ʻiloʻi maʻu pē ha meʻa ʻoku fekauʻaki mo ʻeku fononga fakataautaha ko ha ākonga ʻa Sīsū Kalaisí, pe ko ha ouau, ko ha tefitoʻi moʻoni fakahinohino, pe ko ha veesi folofola toputapu.
Ko e lēsoni mahuʻinga taha ne u maʻu mei he kalasí ko hono ʻiloʻi ko ia ʻoku tataki fakalaumālie ʻe he ʻOtuá ʻEne fānaú ʻi he feituʻu kotoa pē. ‘Oku ou saiʻia he me‘a naʻe lea‘aki ’e ‘Eletā Tieta F. ʻUkitofa ʻo e Kōlomu ‘o e kau ʻAposetolo ‘e Toko Hongofulu Mā Uá:
“ ʻOku tau fakalangilangi‘i mo fakaʻapa‘apa ki he ngaahi laumālie ʻo e tui fakalotu kotoa pē, neongo pe ko e fē ʻa e feituʻu mo e kuonga ne nau moʻui aí, ka naʻa nau ʻofa ʻi he ‘Otuá, neongo naʻe teʻeki ke nau maʻu ‘a e kakato ʻo e ongoongoleleí. … ʻOku tau tali kinautolu ko e ngaahi tokoua mo e tuofāfine, ʻa e kakai kotoa pē, ko e fānau ʻa ʻetau Tamai Hēvaní. …
“‘Oku ne fanongo mai ki he lotu ʻa e kau loto-fakatōkilaló mo fakamaatoato ‘o e puleʻangá, leá, mo e kakaí. ʻOkú Ne foaki ‘a e māmá kiate kinautolu ʻoku fekumi mo faka‘apaʻapa kiate Iá mo loto fiemālie ke talangofua ki He‘ene ngaahi fekaú.”1
ʻI he ofi ke hoko ʻa e faʻahitaʻu Toetuʻú, ko ha ngaahi meʻa ʻeni ʻoku fakahoko ʻi he māmaní ʻoku ongo fakalaumālie ia kiate au. Neongo ʻoku ʻikai ke tau fakahoko kotoa ko e kāingalotu ʻo e Siasí ʻa e ngaahi tukufakaholo ko ʻení, ka ʻi heʻetau fakakaukau ki he anga hono fakamanatua ʻe he kau Kalisitiane kehé ʻa e Fakamoʻuí ʻe lava ke tokoni kiate kitautolu ke ʻai ʻetau ngaahi fakamanatua ʻo e Toetuʻú ke toe mahuʻingamālie ange.
Lēniti
Ko e Lēnití ko ha tukufakaholo ia ʻoku fakafiefiaʻi ʻe ha kau Kalisitiane ʻe niʻihi ʻi he funga ʻo e māmaní. Ko ha vahaʻataimi ia ʻo e loto fakatōkilalo fakalaumālie mo e tupulaki ʻo kamata he uike ʻe ono kimuʻa he Toetuʻú, ʻa ia ʻoku teuteuʻi ai ʻe he kakai tuí ʻa kinautolu ki he ʻaho mālōloó ʻaki haʻanau feilaulau fakataautaha. ʻOku kau heni ʻa e ngaahi ʻaho makehe ʻo e ʻaukaí mo e foakí. Lolotonga e Lēnití, ʻoku poupouʻi foki ʻa e kakai tuí ke nau fakaʻehiʻehi mei ha faʻahinga me‘a fakatuʻasino—hangē ko e me‘akai ʻoku sai‘ia taha ai, vaʻinga, polokalama TV, pe me‘a ʻoku nau manako aí—pea fakatāpui ʻa e taimi naʻe mei fakamoleki ki he meʻa ko iá ki he ako fakalaumālié mo e lotú.
ʻOku ou saiʻia he fakakaukau ko ia ʻe lava ke hoko e Toetuʻú ko ha aʻusia te ne fakatupu ha liliu ʻi hoku vā mo e Fakamoʻuí. ʻOku ʻikai ke tau fakahoko e Lēnití ʻi heʻetau hoko ko e Kāingalotú, ka ʻi heʻeku ako ki aí ʻoku ou loto ke foaki lahi ange hoku taimí ke u manatuʻi mo teuteu fakalaumālie ki he Toetuʻú, ʻo tatau ai pē pe ko e ʻaukaí, ako lahi ange ki he moʻui ʻa e Fakamoʻuí ʻi he folofolá, pe ko hono fai ʻo e ngāue hisitōlia fakafāmilí pe ko e fakahokohoko fakamotuʻaleá ke tokoni ke u manatuʻi ai e mahuʻinga ʻo e feilaulau ʻa e Fakamoʻuí kiate aú mo ʻeku fanga kuí kotoa.
Fua‘imoa ʻo e Toetu‘ú
Ne u tupu hake ʻi ha ʻapi naʻe hoko ai e fuaʻimoa moho fakalanulanú ko ha tukufakaholo ʻofeina. ‘I ha ngaahi fonua ʻe niʻihi ʻi ‘Iulope (hangē ko ʻIukuleini mo Lifuenia),ʻoku faingataʻa ʻaupito e foungá ni. ʻOku ‘ikai ke ngata pē ʻi hono haka ʻo e fuaʻimoá ʻo vali fakalanulanú, ka ʻoku toe fakaavaava fuopotopoto e ngaahi foʻi fuaʻimoá, tā ki ai mo ha ngaahi sīpinga fakaʻofoʻofa, pea toki vali leva. Ko hono ikuʻangá ko ha fuaʻimoa kuo ʻosi fakaavaava fuopotopoto ke ne fakafofongaʻi ʻa e ngeʻesi fonualotó mo e ʻamanaki lelei fakaʻofoʻofa ʻoku maʻu mei he Toetuʻú.
ʻOku faingofua ʻaupito ke ngalo ʻiate kitautolu ʻa e ʻuhinga maʻongoʻonga ʻo e ngaahi tukufakaholo ʻoku tau maʻú, ka ʻoku mahuʻinga ke tuku ha kiʻi taimi ke fakalaulauloto ai ki honau ʻuhingá mo e anga ʻenau tokoniʻi kitautolú. ʻI ha toe taimi te u vali fakalanulanu ai ha ngaahi fuaʻimoá, te u loto ke tuku ha taimi lahi ange ke fokotuʻu ha fakatātā fakaʻofoʻofa ʻo ʻeku ngaahi fakakaukaú.
Ko e ʻOhomohe ʻa e ʻEikí
ʻOku maʻu ʻe ha kau Kalisitiane tokolahi ʻa e ʻOhomohe ʻa e ʻEikí, pe ko e sākalamēnití. Ko e lahi ange ʻeku ʻilo ki he fakataipe ʻo e sākalamēnití mo hono mahuʻinga ki he ngaahi tui fakalotu lahi, tautautefito ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko e lahi ange ia ʻeku ʻiloʻi ʻoku ʻikai ke u faʻa fakamahuʻingaʻi e meʻafoaki fakauike ko iá.
ʻOku tuku taha e tokanga ʻa ha kau Kalisitiane tokolahi ki he teuteu fakaʻatamai mo fakalaumālie ʻo e sākalamēnití ki muʻa pea nau toki maʻú. Ne u ofo ʻi he mālohi ʻoku maʻu ʻe he sākalamēnití maʻá e kakai tui ko ʻení mei he anga ʻo ʻenau teuteú. Naʻe hanga ʻe heʻenau sīpingá ʻo ʻai ke u toe fakakaukau ki he anga ʻeku teuteu ki he sākalamēnití. ʻOku ou fakakaukau ʻeni ki ha ngaahi founga lahi ʻe lava ke u teuteu fakalaumālie ai ki he sākalamēnití he uike kotoa pē, pea ʻai e ouaú ke mahuʻingamālie ki heʻeku moʻuí ke u tokanga taha ki he meʻa ʻokú ne fakataipe moʻoní.
Ako mei he Niʻihi Kehé
ʻOku fakafiefiaʻi ʻe he kakai ʻi he funga ʻo e māmaní ʻi ha ngaahi founga kehekehe, kae toe mahuʻinga foki. ʻOku taʻofi e tā ʻa e ngaahi fafangu ʻo e falelotú ʻi Sipeini ʻi ha ngaahi ʻaho kimuʻa ʻi he Toetuʻú ko e fakaʻapaʻapa ki he mamahi mo e pekia ʻa e Fakamoʻuí, hili ia pea nau hoko atu leva ki he Toetuʻú. Ko e fakafeʻiloaki ʻoku fai ʻe he fāmilí, ngaahi kaungāmeʻá, mo e solá ʻi Lūsiá ʻoku peheni, Kuó Ne toetu‘u” pea ko e talí leva, “ʻIo ʻoku moʻoni, kuó Ne toetu‘u.”
ʻOku fakamanatua ʻe he Toetuʻú ʻa e meʻa fakafiefia taha he hisitōlia ʻo e māmaní, ko ha meʻa ʻoku ou maʻu maʻu pē mei ai ʻa e ʻamanaki lelei. Kuo fakamanatu mai kiate au ʻe he ngaahi sīpinga ʻo e kakai tuí mo e ngaahi anga fakafonua ʻi he māmaní kotoa ke u toe ʻai ke mahuʻingamālie ange ʻa ʻeku fakamanatua e toetuʻú ʻaki ha teuteu ʻoku faʻa fakakaukauʻi mo tuku ha taimi lahi ange ke ofi ange ai ki he ʻOtuá. Ka ko e me‘a mahuʻinga tahá, kuo nau fakamanatu mai kiate au ‘a e ʻuhingaʻoku tau fakamanatua ai ‘a e ʻaho mālōlō ko ‘ení mo e founga te ne lava ʻo ‘omi kitautolu ke tau ofi ange ai kia Kalaisí.