Haʻu, ʻo Muimui ʻIate Au
Ko e hā e ʻuhinga ʻo e “felototahaʻakí” ʻi he Siasí?
Tokāteline mo e Ngaahi Fuakava 23–26
8–14 Māʻasi
Kuo fekauʻi ʻe he ʻEikí ʻoku totonu ke “fai ʻa e meʻa kotoa pē ʻi he siasí ʻi he felototahaʻaki” (Tokāteline mo e Ngaahi Fuakava 26:2). ʻOku fakaʻatā ʻe he felototahaʻakí ʻa e kāingalotu ʻo e Siasí ke nau “poupouʻi ʻa kinautolu kuo ui ke ngāue ʻi he Siasí, kae ʻumaʻā foki mo e ngaahi tuʻutuʻuni faka-Siasi kehe ʻa ia ʻoku fie maʻu ke nau poupouʻí, pea ʻoku faʻa fakahā ia ʻaki ʻa e hiki hake honau nima toʻomataʻú ki ʻolungá” (Fakahinohino ki he Ngaahi Folofolá, “Felototahaʻakí,” scriptures.ChurchofJesusChrist.org).
ʻOku tau “fili fakahāloto” nai he taimi ʻoku tau hikinimaʻi ai ʻa e kāingalotú?
“Kuo teʻeki ai uiuiʻi ha palōfita pe ha toe taki ʻi he Siasí ni, ʻe ia pē. Kuo teʻeki ai ha palōfita ʻe fili ʻi ha fakahāloto ki ai. Naʻe fakamahinoʻi ia ʻe he ʻEikí ʻi Heʻene pehē, ‘Naʻe ʻikai te mou fili au, ka kuó u fili ʻa kimoutolu, ʻo tuʻutuʻuni ʻa kimoutolu’ [Sione 15:16]. ʻOku ʻikai ke ta ‘fili fakahāloto’ e kau taki ʻo e Siasí, ʻi ha faʻahinga tuʻunga. Neongo ia, ʻoku tau maʻu e faingamālie ke hikinimaʻi ʻo poupouʻi kinautolu.”—Palesiteni Russell M. Nelson, “Ko Hono Poupouʻi ʻo e Kau Palōfitá,” Liahona, Nōv. 2014, 74–75.
Ko e meʻa tatau pē ʻi he ngaahi uiuiʻi kotoa pē. Ko e hikinimaʻí ko ha faingamālie ia ke fakahaaʻi mo ʻoatu ʻetau poupoú pea ke tali e finangalo ʻo e ʻOtuá.
Ko ha meʻa angamaheni nai ʻa hono hiki hotau nimá ke poupouʻi e kāingalotú?
“ʻI heʻetau hikinimá, ʻoku tau fakahoko ai ha ngaahi palōmesi molumalu. ʻOku tau palōmesi te tau lotua ʻa e kau tamaioʻeiki ʻa e ʻEikí pea te Ne tataki mo fakaivia kinautolu [vakai, Tokāteline mo e Ngaahi Fuakava 93:51]. ʻOku tau fakapapauʻi ai te tau fekumi mo ongoʻi e ueʻi fakalaumālie mei he ʻOtuá ʻi heʻenau faleʻí pea mo e taimi pē te nau ngāue ai ʻi honau fatongiá.” —Palesiteni Henry B. Eyring, “Naʻe Ui ʻe he ʻOtuá pea Poupouʻi ʻe he Kakaí,” Liahona, Sune 2012, 4.
ʻOku totonu ke hokohoko atu hono poupouʻi ʻo e kāingalotú ʻi honau ngaahi fatongiá ʻi he taimi pē ʻoku nau fua moʻui taau ai ʻa e fatongiá.
ʻE fēfē kapau ʻoku ʻikai ke u lava ʻo poupouʻi ha taha?
ʻI ha ngaahi tuʻunga hāhāmolofia, ʻe lava ke ʻiloʻi ʻe ha taha ha ʻuhinga lelei ʻoku ʻikai totonu ke fua fatongia ai ha mēmipa. ʻI he ngaahi tuʻunga peheé, ʻe lava ke fakataha fakafoʻituitui ʻa e mēmipa ʻoku taʻelotó mo e pīsopé pe palesiteni siteikí ke aleaʻi ʻa e meʻa ʻokú ne tokanga ki aí.