Haʻu, ʻo Muimui ʻIate Au
Ko hai ʻokú ne maʻu e fakahā maʻá e Siasí?
Tokāteline mo e Ngaahi Fuakava 27–28
15–21 Māʻasi
ʻI ʻAokosi 1830, naʻe pehē ʻe Hailame Peisi, ko ha taha ʻo e Kau Fakamoʻoni ʻe Toko Valu ʻo e Tohi ʻa Molomoná, kuó ne maʻu ha fakahā ʻe ua kau ki he tuʻuʻanga mo e fokotuʻutuʻu ʻo Saione ki he kahaʻú ʻaki hano fakaʻaongaʻi ha foʻi maka kikite lanu ʻuliʻuli. Naʻe fepaki ʻa e ngaahi fakahā ko ʻení mo e ngaahi fakahā ne foaki kimuʻa kia Siosefa Sāmitá, kae meʻapangó naʻe tui ha kāingalotu tokolahi ki ai.
Fakahā Maʻá e Siasí
ʻI he taimi naʻe lotua ai ʻe Siosefa ʻa e ngaahi fakahā ʻa Hailamé, naʻe akoʻi ʻe he ʻEikí, “ʻE ʻikai ke fili ha taha ke ne maʻu ʻa e ngaahi fekau mo e ngaahi fakahā ʻi he siasi ko ʻení, tuku kehe pē ʻa ʻeku tamaioʻeiki [ko e palōfitá]” (Tokāteline mo e Ngaahi Fuakava 28:2). Naʻá Ne folofola, “ʻoku ʻikai ke tupu meiate au ʻa e ngaahi meʻa kuo tohi [ʻe Hailame] mei he maká na … ʻoku kakaaʻi ia ʻe Sētane” (Tokāteline mo e Ngaahi Fuakava 28:11).
Naʻe faifai pea fakaʻikaiʻi ʻe Hailame ʻa ʻene ngaahi fakahaá, pea naʻe fakahaaʻi ʻe he kāingalotú kotoa ʻi he loto-taha ko e palōfitá pē taha ʻokú ne maʻu fakahā maʻá e Siasi ʻo Kalaisí.
Ko e hā ʻoku mahuʻinga ai ke ʻiloʻi ko e palōfita moʻui pē ʻe taha ʻoku lava ke ne maʻu fakahā maʻá e Siasí fakakātoá? ʻOku hoko fēfē ʻeni ke ne maluʻi kitautolu mei he kākaá?
Sio ki he Palōfitá mo e Kau ʻAposetoló
ʻOku fakatokanga mai ʻa Palesiteni M. Lāsolo Pālati, Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá:
“Fakamaʻu ho fofongá ki he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. He ʻikai te mau takihalaʻi kimoutolu. He ʻikai te mau lava. …
“… Kapau ʻe tala atu ʻe ha taha kuó ne maʻu ha fakahā ʻoku teʻeki ke maʻu ʻe he Kau Palesitenisī ʻUluakí mo e Toko Hongofulu Mā Uá, ʻoua naʻá ke tui kiate ia.”1