Ongoʻi e ʻOfa ʻa e ʻOtuá ʻi he Fakatomalá

ʻĪmisi

talavou ʻoku tangutu ʻo malimali

ʻI hoku taʻu 15, naʻe ʻikai ke u fakahoko e ngaahi fili lelei tahá. Naʻá ku feohi mo ha kakai hala, pea naʻe faʻa ʻākilotoa au ʻe ha ngaahi ʻahiʻahi lahi—ʻa ia ne u kau ai ʻi ha niʻihi. ʻI he kamataʻangá naʻe ʻikai ke mahuʻinga ʻeku ngaahi filí, ka naʻe faifai pē peá u ʻi ha feituʻu fakapoʻuli ʻaupito. Naʻá ku fufuuʻi ha konga lahi ʻo e meʻa naʻá ku fakahokó mei hoku fāmilí, pea naʻá ku ongoʻi tuenoa ʻaupito. Naʻe ʻikai ke u fakapapauʻi e feituʻu ke u tafoki ki aí. Naʻá ku tui moʻoni naʻe ʻikai ʻofa ʻa e ʻOtuá ʻiate au.

ʻI ha ʻaho faingataʻa ʻe taha, ne fakafokifā pē ʻeku fakakaukau ʻoku totonu ke u kamata lau e Tohi ʻa Molomoná. Naʻá ku ʻosi lau ia kimuʻa, ka naʻe ʻikai ke u maʻu ha holi moʻoni ke ako mei hono ngaahi pōpoakí. Naʻá ku ongoʻi māfana ʻi hoku lotó ʻi he peesi kotoa pē ʻi heʻeku maʻu ha ngaahi moʻoni mei he Fakamoʻuí ʻokú Ne talamai te u lava ʻo liliu ʻi Heʻene tokoní. Naʻá ku ongoʻi ʻo hangē ne u fie maʻu ke “hiva ʻaki ʻa e hiva ʻo ʻene ʻofa huhuʻí” (ʻAlamā 5:26).

Hili ʻeku ako ʻa e Tohi ʻa Molomoná mo hono ngaahi pōpoaki ʻoku fakatefito ʻia Kalaisí, naʻá ku lava ʻo maʻu ʻa e loto-toʻa naʻe fie maʻu ke u fakamatala fekauʻaki mo ʻeku ngaahi filí ki heʻeku faʻeé. ʻI heʻema foki mai mei he tauʻanga pasí ʻi ha ʻaho ʻe taha, naʻá ku talanoa ki ai ʻo fakamatala ange ha niʻihi ʻo e ngaahi fili kovi naʻá ku fakahokó. Naʻá ku ʻamanaki ʻe ʻita, ka naʻe ʻikai. Naʻe ʻikai pē ke ne fakamāuʻi au. Ka, naʻá ne fakahaaʻi ʻene ʻofa lahi ʻiate aú, pea ʻi heʻene ʻofá, naʻá ku ongoʻi foki ai e ʻofa ʻa e ʻOtuá ʻi heʻeku moʻuí.

ʻI he hokohoko atu ʻeku lotu mo lau e folofolá, naʻá ku toe maʻu ha loto-toʻa ke talanoa mo ʻeku pīsopé pea kamata ʻa e founga ʻo e fakatomalá. ʻI heʻeku kole ange pe ʻe lava ke ma talanoa mo iá, naʻá ne fakaafeʻi au ki hono ʻōfisí, pea kamata ʻaki ha lotu. Hili ʻema talanoá, naʻe kamata ke u tangi ʻi ha founga ne teʻeki ke u tangi pehē kimuʻa. Naʻá ku vahevahe ʻeku ngaahi fehalaākí kotoa mo ia, pea naʻe lava ke u ongoʻi moʻoni ʻa e ʻofa ʻa e Tamai Hēvaní mo Sīsū Kalaisí ʻi hono toʻo atu ʻa e ongoʻi mā mo e kavenga mamafa naʻá ku fuesia ʻi hoku umá.

Naʻe ʻikai ko ha toe meʻa noa pē ʻeku pīsopé ka ko e manavaʻofa pē, ʻo tupu ai ʻeku toe ongoʻi e ʻofa ʻa e Tamai Hēvaní mo Sīsū Kalaisí. Naʻá ne akoʻi au ko e founga ʻo e fakatomalá ko e founga ia ke fakamāʻoniʻoniʻi ai kitautolú, pea tānaki atu ki aí, kuo fakamolemoleʻi ʻetau ngaahi fehalaākí. ʻI he momeniti ko iá, naʻá ku fakatokangaʻi ko e fakatomalá ko e moʻoni ko ha meʻaʻofa ia ʻo e ʻofa mei heʻetau Tamai Hēvaní mo e Fakamoʻuí. ʻOku ou fakakaukau maʻu pē ki he lahi ʻo ʻEna ʻofa ʻiate aú koeʻuhí ko e potufolofola ʻi he Tokāteline mo e Ngaahi Fuakava 19 ʻa ia ʻoku pehē ai ʻe he Fakamoʻuí, “He vakai, ko au, ko e ʻOtuá, kuó u kātakiʻi ʻa e ngaahi meʻá ni maʻá e kakai kotoa pē, koeʻuhí ke ʻoua naʻa nau mamahi ʻo kapau te nau fakatomala” (veesi 16).

ʻOku ou houngaʻia koeʻuhí ko Sīsū Kalaisi mo ʻEne Fakaleleí, ʻoku tau maʻu ai ʻa e faingamālie ke fakalakalaka pea hoko ʻo lelei ange. Kuó u aʻusia ʻa e moʻoni ko ia ʻe lava ke liliu hotau lotó ʻi he taimi ʻoku tau maʻu ai ha taumuʻa fakamaatoato mo ʻiloʻi ʻoku ʻofa ʻa e Tamai Hēvaní mo Sīsū Kalaisi ʻiate kitautolú.

Ko e fakatomalá ko e moʻoni ko ha meʻaʻofa ia ʻo e ʻofa mei heʻetau Tamai Hēvaní mo e Fakamoʻuí. Ko e ngaahi tāpuaki kuó u maʻu mei he aʻusia ko ʻení pea mo ha meʻa lahi kehe ʻoku lahi ange ia ʻi he meʻa naʻá ku fakakaukau ki aí, pea “naʻe fonu hoku laumālié ʻi he fuʻu fiefia naʻe tatau hono lahí mo hoku mamahí!” (ʻAlamā 36:20). ʻI heʻeku aʻusia e mālohi faifakamoʻui ʻo e Fakamoʻuí ʻi heʻeku moʻuí, kuó ne fakamanatu mai ʻa e lahi ʻo e ʻofa ʻoku tau maʻú pea kuo hoko maʻu pē ia.