Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻe Fakahoko ʻe Heʻema Kiʻi Meʻaʻofa Siʻisiʻí ha Liliu Lahi
Ne ma ako ʻe lava ke faitāpuekina ʻe he fanga kiʻi ngāue tokoni īkí ʻa e moʻuí ʻi ha ngaahi founga mālohi fau.
ʻI he Kilisimasi ʻo ha taʻu ʻe taha, naʻe ngaohi ai ʻe hoku uaifi ko Sūliá ha lole sokoleti naʻá ma kofukofu ʻo faʻo ʻi ha fanga kiʻi puha kuo teuteuʻi. Ne ma ʻaʻahi leva ki ha niʻihi ʻi he kolo lea faka-Sipeini ne ma ngāue fakaetauhi ki aí mo foaki ange ʻema meʻaʻofá, mo fakahoko ange ʻema talamonū Kilisimasi fiefiá.
ʻI heʻema aʻu atu ki he fale ʻo Misa Senisesí, ko ha mēmipa anga fakakaumeʻa mo toulekeleka homau kiʻi koló, ne ma tukituki mo tatali. Naʻe ʻikai ha taha ʻe ʻi ʻapi, ko ia ne ma tuku leva e kiʻi puha lolé ʻi heʻene puha meilí.
Hili ha ngaahi uike siʻi mei ai, lolotonga e houalotu sākalamēnití, naʻe lea ʻa Misa Senisesi fekauʻaki mo ʻene uluí pea mo e ngaahi mana lahi kuó ne aʻusia ʻi he kotoa ʻo ʻene moʻuí. Naʻá ne fakamoʻoni ki hono tali ʻe he mālohi fakaofo ʻo e Tohi ʻa Molomoná e ngaahi fehuʻi loloto taha ʻo e moʻuí. Naʻá ne hiki hake leva e ngaahi folofola naʻá ne maʻu he ngaahi taʻu lahi kuo hilí mei he ongo faifekau ne na akoʻi iá. Naʻe tetetete hono leʻó ʻi heʻene ʻofa mo e fakamoʻoni ki he ʻEikí.
Naʻe fakahoko leva ʻe Misa Senisesi ha meʻa naʻe ʻikai ke ma ʻamanaki ki ai. Naʻá ne hili hake ʻi he tuʻunga malangá ʻema kiʻi puha kuo teuteuʻí. Naʻá ne pehē ko e taimi naʻá ne maʻu ai ʻa e puhá, naʻe ʻikai fakakaukau te ne kai e fanga kiʻi lolé koeʻuhí he ʻokú ne suka. Ka, naʻá ne tuku ʻa e puhá ʻi heʻene funga toloá pea ngalo ia ai.
Hili ha ngaahi ʻaho siʻi mei ai, ʻi heʻene tokoto ʻi he mohengá, naʻá ne pehē naʻá ne ongoʻi ʻoku holo fakafokifā hono suká. Naʻá ne mātuʻaki tailiili ʻi he kamata ke tetetete hono sinó. Naʻá ne fakatokangaʻi naʻá ne fehangahangai mo ha tuʻunga fakatuʻutāmaki, ʻi heʻene ʻiloʻi ʻe fie maʻu ke tā ki ha meʻalele ʻa e falemahakí. Naʻá ne fakatokangaʻi atu leva e kiʻi puhá. Naʻá ne toʻo mai ia, fakaava pea kai fakavavevave ʻa e sokoletí. Naʻá ne ongoʻi fiemālie ʻi he foki hono suká ki he tuʻunga angamahení.
Naʻe toʻo hake ʻe Misa Senisesi e ngeʻesi puhá peá ne fakamoʻoni ʻe lava ʻe he fanga kiʻi ngāue tokoni īkí ʻo fakahoko ha liliu lahi. Naʻá ne fakamoʻoniʻi ko e faʻahinga aʻusia peheé ʻoku ʻikai tupukoso pē pea ʻoku kau e toʻukupu ʻo e Tamai Hēvaní ʻi he ngaahi meʻa fakaikiki ʻo ʻetau moʻuí.
Naʻá ku ongoʻi loto fakatōkilalo mo hoku uaifí ʻi heʻema ʻiloʻi naʻe hanga ʻe heʻema kiʻi ngāue tokoní ʻo tākiekina lahi ia pea naʻe aʻu pē ʻo fakahaofi ai ʻene moʻuí. ʻI heʻetau fai ha fanga kiʻi ngāue tokoni iiki maʻanautolu ʻoku tau feohí, ʻe fakaava ʻe he ʻEikí ha ngaahi faingamālie ʻokú ne tāpuekina ʻa e moʻuí ʻi ha ngaahi founga mālohi fau.