Ngaahi Fakakaukau ki Hono Fakatahatahaʻi ʻo e Hisitōlia Fakafāmilí, Ngāue Fakatemipalé, mo e Ngāue Fakafaifekaú

ʻI hoʻo kau ki he hisitōlia fakafāmilí mo tokoniʻi e niʻihi kehé ke nau fakahoko e meʻa tatau, ʻokú ke kau ai ki he ngāue ʻa e ʻOtuá ki he fakamoʻuí mo e hākeakiʻí ʻi he ongo tafaʻaki fakatouʻosi ʻo e veilí.

• Kau he ngāue ʻi he hisitōlia fakafāmilí mo e ngāue fakatemipalé. Kamata ʻaki hano faʻu haʻo fuʻu ʻakau fakafāmili ʻi he FamilySearch.org, pea tānaki atu leva ha ngaahi tā, ngaahi talanoa, pe hiki tepi e ongo ʻo e kau mēmipa ho fāmilí. ʻE lava ke tokoni atu ʻa e kau faifaleʻi ʻo e temipalé mo e hisitōlia fakafāmilí ke tānaki atu ha fakamatala ki hoʻo fuʻu ʻakau fakafāmilí. Te nau lava foki ʻo tokoni atu ke kumi hoʻo ngaahi kui ʻoku nau fie maʻu ʻa e ngaahi ouau fakatemipalé.

• Feinga ke ke ʻiloʻi hoʻo ngaahi kuí, neongo kapau kuo kakato kotoa honau ngaahi ouau fakatemipalé. Ko e lahi ange hoʻo ʻilo ki ho fāmilí, ko e faingofua ange ia ke vahevahe ʻenau ngaahi talanoá mo e niʻihi kehé. ʻE liliu ho lotó ʻo lahi ange ki hoʻo ngaahi kuí, ʻo fakatupulaki ai hoʻo malava ko ia ke fakamoʻoni ʻi he loto fakapapau.

• ʻAi ke ke maheni mo e kau faifaleʻi fakauooti ʻo e temipalé mo e hisitōlia fakafāmilí. ʻAi ke ke maheni mo e ngaahi maʻuʻanga tokoni ʻi hoʻo senitā hisitōlia fakafāmili fakalotofonuá kapau ʻoku ʻi ai ha maʻuʻanga tokoni ofi mai. Ako ki he founga hono fakaʻaongaʻi ʻo e FamilySearch.org, polokalama FamilySearch Tree mo e FamilySearch Memories, mo e ngaahi maʻuʻanga tokoni kehe ʻi he ʻinitanetí ʻoku lava ke maʻu ʻe he kāingalotu ʻo e Siasí ʻi homou feituʻú. Ko e lahi ange hoʻo ʻiló, ko e lahi ange ia e ngaahi meʻa ke ke fili mei ai ke tokoniʻi ho ngaahi kaungāmeʻá ke nau mahuʻingaʻia ange ʻi he ako lahi ange ki honau fāmilí.

• Feinga ke talanoa ki he kau mēmipa ʻo e fāmilí, kaungāmeʻá, mo e kaungā ngāue ʻoku ʻikai ko e kāingalotu ʻo e Siasí fekauʻaki mo ʻenau ngaahi kuí pe ko honau tukufakaholó. Talanoa fekauʻaki mo e ngaahi talanoa fakafāmilí, feituʻu ne haʻu mei ai ʻenau ngaahi kuí, ngaahi ʻulungaanga kuo nau maʻú, ngaahi fonua tupuʻanga kuo nau mamata pe ʻamanaki ke ʻaʻahi ki aí, mo e ngaahi koloa tauhi-ʻofa kuo tukufakaholo maí. ʻE lava ke iku ha taha pē ʻo e ngaahi tefito ko ʻení ki ha ngaahi fealēleaʻaki mahuʻinga fekauʻaki mo e ngaahi fāmili fakaemāmaní mo e ngaahi fāmili taʻengatá.

• ʻAi ke faingofua hoʻomou fepōtalanoaʻakí. Tokanga taha ki hono fakakau ʻo e ngaahi kaveinga ʻe fakamānako ki he niʻihi kehé ʻi he ako lahi ange ki heʻenau ngaahi kuí. ʻOua naʻá ke fakavaveʻi ʻa e kaveinga ʻo e fekumi ki he hisitōlia fakafāmilí. Kae, tuku ke tataki ʻe he Laumālié ʻa e fepōtalanoaʻakí pea mo liliu e loto ʻo e kakaí ki heʻenau ngaahi kuí. ʻI he taimi ʻoku nau mateuteu ai ke ako lahi angé, falala ki he Laumālié ke ne fakahā atu kiate koe.

• ʻOku faʻa ueʻi fakalaumālie ʻe he ngaahi fealēleaʻaki takai ʻi he hisitōlia fakafāmilí ʻa e niʻihi kehé ke nau fai ha ngaahi fehuʻi fekauʻaki mo hoʻo tuí mo e mēmipa ʻi he Siasí, hangē “Ko e hā ʻoku ʻomi taʻetotongi ai ʻeni ʻe homou Siasí?” pe “Ko e hā ʻoku ongo mālie mo mahuʻinga ai ʻení?” Ko e lelei tahá ke fakaʻatā ʻa e ngaahi fepōtalanoaʻaki ko ʻení ke tupulaki fakanatula, ʻo ʻikai fakamālohiʻi. Lotua mo fekumi ki he Laumālié ke hoko ko ho fakahinohino.

ʻE ʻoatu ʻe hoʻo ako fekauʻaki mo e hisitōlia fakafāmilí kimuʻa peá ke ngāue fakafaifekaú ha ngaahi pōtoʻi ngāue mahuʻinga te nau lava ʻo tataki ʻa e fakafoʻituituí mo e kau uluí ke nau ongoʻi ʻa e laumālie ʻo e ngāue maʻongoʻongá ni. ʻE tokoni foki hoʻo ngaahi aʻusiá ke ke fakamoʻoniʻi ai ʻa e ngaahi fāmili taʻengatá.

• Fakapapauʻi ʻoku ʻi ai haʻo ʻakauni ʻi he Siasí. Ako maʻuloto ho hingoa–ngāué mo e lea-fufuú. Fakaʻaongaʻi hoʻo ʻakauní ke kamata hoʻo fuʻu ʻakau fakafāmilí ʻi he FamilySearch.org.

• Ako e ngaahi tefitoʻi taukei ʻi he FamilySearch.org, hangē ko hono faʻu hoʻo fuʻu ʻakau fakafāmilí, tānaki atu ha hingoa ki hoʻo fuʻu ʻakaú, pea tānaki atu ha laʻitā pe talanoa ki he konga ʻo e Ngaahi Manatu Melié.

• Ako e ngaahi talanoa fekauʻaki mo hoʻo ngaahi kuí pea mateuteu ke vahevahe kinautolu mei hoʻo manatu melié.

• Teuteuʻi e hingoa ʻo ha kui ʻe taha pe lahi ange ki he ngaahi ouau fakatemipalé. Kapau ʻokú ke nofo ofi ki ha temipale, fakakakato honau papitaisó mo e hilifakinimá. Fakahoko ʻeni mo ho fāmilí kapau te ke lava. Kapau kuó ke ʻosi maʻu ʻenitaumeni, fakahoko e ngaahi ouau fakatemipale kehé. Kapau ʻoku ʻikai ke ke nofo ofi ki ha temipale, fakahū ʻa e ngaahi hingoá ke tuku ke fakahoko ʻe he niʻihi kehé ʻa e ngāue ouaú.

• Kapau ʻoku ʻi ai haʻo smartphone pe tablet, download ʻa e polokalama FamilySearch Tree mo e FamilySearch Memories. Ako e founga ke fakaʻaongaʻi ai kinautolu ke vakai ki he puipuituʻa, ngaahi tā, mo e ngaahi talanoa hoʻo ngaahi kuí. Akoako hono tokoniʻi ʻo e ngaahi kaungāmeʻá ke maʻu ha fakamatala fekauʻaki mo ʻenau ngaahi kuí.

• ʻAi ke ke maheni mo e Ngaahi ʻEkitivitī ʻo e Hisitōlia Fakafāmilí pea Kumi ha Taha ʻi he ngaahi konga ʻo e polokalama FamilySearch Tree ke ako ha ngaahi founga fakafiefia ke fakakau ai e kakaí ʻi he ngaahi ʻekitivitī mo e fealēleaʻaki hisitōlia fakafāmilí.

• Kapau ʻoku ʻi ai haʻo kui ʻoku kei moʻui pe kui ua, fakaʻaongaʻi ʻa e polokalama FamilySearch Memories ke ʻinitaviu kinautolu fekauʻaki mo ʻenau moʻuí. Tauhi e tepi ongo ʻoku hiki ʻi he FamilySearch.org, fakataha mo honau taá.

• ʻAi ke ke maheni mo e kiʻi tohi Ko Hoku Fāmilí: Ngaahi Talanoa ʻOku Nau Fakatahatahaʻi Kimautolú pea mo e Ngaahi Fāmilí mo e Ngaahi Temipalé pea mo e kiʻi tohi tufa ʻa e kau faifekaú.

• Lotua ke tataki koe ʻe he Laumālié ki ha ngaahi aʻusia te nau fakaloloto hoʻo fakamoʻoni ki he ngaahi fāmili taʻengatá.

ʻOku kehekehe pē ʻa e ngaahi faingamālie ke kau atu ki he hisitōlia fakafāmilí mo e ngāue fakatemipalé mei he misiona ki he misiona. ʻE tokoni atu hoʻo palesiteni fakamisioná ke ke ʻiloʻi ʻa e meʻa ʻoku taau ʻi ho misioná.

• Lotua ke tataki koe ʻe he Laumālié kiate kinautolu ʻoku lotu ʻenau ngaahi kuí ke maʻu e ngaahi ouau ʻo e temipalé.

• Feinga ke ke maheni mo e kau faifaleʻi ʻo e temipalé mo e hisitōlia fakafāmilí ʻi he feituʻu ʻokú ke ngāue aí.

• Akoako kamata ha fepōtalanoaʻaki mo e kakaí fekauʻaki mo honau ngaahi fāmilí. Ako ki he feituʻu ne haʻu mei ai ʻenau ngaahi kuí mo e meʻa ʻoku nau ʻilo fekauʻaki mo e ngaahi talanoa ʻo ʻenau ngaahi kuí.

• Toʻotoʻo ha tatau ʻo hoʻo saati pe saati tohi hohokó ʻoku hā ai hoʻo fuʻu ʻakau fakafāmilí. Mateuteu ke vahevahe ia ʻi ha laʻipepa pe fakaʻaongaʻi ʻa e polokalama FamilySearch Tree. Tokoni ki he niʻihi kehé ke kamataʻi ʻenau fuʻu ʻakau fakafāmilí pe faʻu haʻanau saati manako pē ʻanautolu.

• ʻI he taimi ʻoku ʻeke mai ai ʻe he kakaí pe ko e hā ʻoku fuʻu tokanga ai hotau Siasí ki he fāmilí mo e hisitōlia fakafāmilí, mateuteu ke tali ʻenau ngaahi fehuʻí. ʻOange ha taimi ki he Laumālié ke ongo ki honau lotó pea fakamoʻoniʻi ange ʻa e malava ko ia ke fakataha mo honau fāmilí ʻo taʻengatá.

• ʻI he taimi ʻokú ke faiako aí, muimui ki ha fakakaukau meia Sisitā Uenitī W. Nalesoni ke ke fakakaukauloto ki ha kakai tokolahi ange ʻe toko 100 ʻi he lokí. “Ko e kakai ʻeni ʻe toko 100, ko e ngaahi kui ʻa e kau fiefanongó mo e ngaahi kui ʻa e kau faifekaú.”¹

• Ako pe ko e hā ʻa e ngaahi maʻuʻanga tokoni ʻoku maʻu ʻi homou feituʻú, hangē ko ha senitā hisitōlia fakafāmili. ʻOmi ʻa kinautolu ʻokú ke akoʻí ki he senitā hisitōlia fakafāmilí ke nau ʻilo lahi ange ai ki honau ngaahi fāmilí, ʻo ka feʻunga ke fai pehē.

• Kapau ʻoku ofi mai ha temipale, fakaafeʻi ʻa kinautolu ʻokú ke akoʻí ke nau ʻaʻahi ki he ngaahi kelekele ʻo e temipalé. Tuku ha taimi ke talanoa ai fekauʻaki mo e palani ʻo e fakamoʻuí mo e ngaahi tāpuaki ʻo e fāmili taʻengatá. Talanoa fekauʻaki mo e fiefia ʻi he tokoni ki hotau ngaahi ʻofaʻanga kuo mavahe atú ʻi he temipalé.

• Kole ki ha fāmili mēmipa ke nau vahevahe ha ngaahi talanoa ʻo ʻenau ngaahi kuí pe ʻoange kiate kinautolu ha aʻusia mahuʻingamālie ʻo fakaʻaongaʻi ʻa e FamilySearch.org pe ko e polokalama FamilySearch Tree. Ko e meʻa ʻeni te ne fakaafeʻi ʻa e Laumālié. ʻI he tūkunga ko ʻení, fehuʻi ange pe ʻoku nau ongoʻi fēfē ʻi he taimi ʻoku nau talanoa ai fekauʻaki mo ʻenau ngaahi kuí. Pea,ʻi he ueʻi ʻa e Laumālié, fehuʻi ange pe ʻoku ʻi ai hanau ngaahi kaungāmeʻa pe mēmipa ʻo e fāmilí te nau fiefia ʻi heʻenau maʻu ha aʻusia tatau.

• Poupouʻi e kāingalotu toki papi ului foʻoú ke kau ʻi he ngāue hisitōlia fakafāmilí pe ngāue fakatemipalé. Ko ha founga mālohi ia ke tokoniʻi kinautolu ke nau nofo maʻu ʻi he hala ʻo e fuakavá.

Te ke lava ʻo hoko ko ha tokoni fakaʻofoʻofa ki he kau faifekaú ʻi hoʻo muimui ki he Laumālié ʻi hono vahevahe hoʻo ʻiló.

• Lotua faivelenga ke ʻiate koe ʻa e Laumālié ʻi hoʻo tokoniʻi ʻa e niʻihi kehé, tautautefito kiate kinautolu ʻoku teʻeki ai ke nau kau mai ki he Siasí, ʻa kinautolu ʻoku foki mai ʻo mālohí, pea mo kinautolu ʻoku toki papitaiso foʻoú. Tuku ke tataki ʻe he ngaahi meʻa ʻoku saiʻia ai e niʻihi kehé, ngaahi fiemaʻú, mo e ngaahi holí hoʻo fepōtalanoaʻakí mo e faʻahinga hisitōlia fakafāmili ʻoku tokoni atu ke ke fakahokó.

• ʻAi ke ke maheni mo e kau faifekau ʻoku ngāue ʻi homou feituʻú. Fakaafeʻi kinautolu ki he senitā hisitōlia fakafāmilí ke nau ʻiloʻi ʻa e kakai mo e ngaahi maʻuʻanga tokoni ʻi aí. Talitali lelei e kau faifekaú mo kinautolu ʻoku nau akoʻí ʻi heʻenau haʻú. Feinga ke mo feʻilongaki kimuʻa pea toki kamata ki he ngaahi kaveinga ʻo e hisitōlia fakafāmilí.

• ʻI he ngaahi misiona ʻoku fakangofua aí, akoʻi ha ngaahi taukei lahi ʻi he hisitōlia fakafāmilí ki he kau faifekaú. Akoʻi kinautolu ke nau tokoni ki he niʻihi kehé ʻi hono ʻai ha ngaahi ʻilo fakafāmili mahuʻinga mo tauhi ha ngaahi manatu melie fakafāmili mahuʻinga.

• Kapau ʻe fakaafeʻi, kau fakataha mo e kau faifekaú ʻi heʻenau ngaahi polokalama akoʻí ʻa ia ʻoku fakahoko ai e aleaʻi e ngaahi fāmilí mo e ngaahi temipalé. Mateuteu ke vahevahe hoʻo ngaahi ongo fekauʻaki mo e mahuʻinga ʻo e fāmili taʻengatá pea mo e ngāue ʻoku tau fakahoko maʻa hotau ngaahi ʻofaʻanga ʻi he temipalé. Tauhi hoʻo ngaahi fakamatalá ke faingofua.